من الحاجات المضحكه جدا في مصر كلمه اصلهم قالوا او هيقولوا.. كلمه ليها علاقه ب عاداتنا و تقاليدنا اللي هي اصلا لا عادات ولا تقاليد ..
قالوا ان البنت اللي تدخل البيت بعد 10 بليل تبقي صايعه , مع ان ممكن واحده تروح 4 العصر و الله اعلم كانت فين , حكموا علي اخلاقك ب وقت دخولك البيت ..
قالوا ان كلام الولد مع البنت متأخر في التليفون عيب, علي اساس ان اللي هيتقال بليل مش هينفع يتقال الصبح, فحكموا علي علاقتك ب زميلك او واحد بتحبيه ب إنها عيب, ليه؟؟ عشان الكلام كان بليل

clock-clip-art-dcrakazc9

قالوا ” يا بنتي إستحملي جوزك , إستحملي الاهانه و الضرب و البخل و عدم الاهتمام, مش احسن ما تبقي مطلقه؟ الناس هتاكل وشنا” علي اساس ان الطلاق ده حاجه ربنا مش محللها .. و علي اساس ان شرع ربنا بقي حاجه تخلي الناس تحط وشها في الارض

images

قالوا ان الولد اللي قاعد علي القهوه فاشل , دخلوا حياته و عاشه معاه.. عاشه معاه ف بيته مع اهله اللي محطمينه, عاشه معاه ايام الجامعه لما كان بيذاكر علي امل انه يتخرج يشتغل و يحقق حلمه و في الاخر يترفض لأنه للاسف مش إبن واسطه .. ف بدل ما يروح بيته لتحطيم اكتر, قعد علي القهوه يمكن ينسي, ف حكموا عليه بالفشل ..

14341749073638

سألوا العريس ف جيبك كام و هتدفع , لأ بنتي تتجوز احسن من بنت خالتها, و إترفض عشان لسه بيبدأ حياته, إترفض عشان طنط لازم تتمنظر في الفرح قدام صحابها , إترفض عشان كيد النسا .

wedding-rings

عايشين في عالم قيل و قال , عايشين علي عادات و تقاليد جدود جدودنا,متأخرين في الفكر و كل حاجه  خوفا من الناس .. جرب تعيش حياتك منغير ناس جرب تحط لنفسك عادات و تقاليد جرب تعيش إنسان حر ..