كائن الانثي البشري من سابع المستحيلات تقدر تنجم او تحاول تعرف نواياها مهما كنت تعرفها او قريب منها او حتى واكل معاها عيش وملح وده لا ينفى انها كائن جميل مسالم بعضهن رقيق الا ان تبتدى انت بالشر ساعتها بس محدش يقدر يرحمك منها
وفي تاريخنا الغنائى الجميل القديم والمعاصر فيه كدة شويه اغاني بالظبط بيثبتوا عدم سلكان انتقام كائن الانثي الجميل ، الاغانى دى لو سمعتها بتسمعهم وبتحبهم اعرف انك داخل على ايام غامضه سودا اللهم بلغت .

 

1 –  انا مش مبيناله انا ناوياله علي ايه ساكتة و مستحلفاله مش قايلاله ساكتة ليه خليه يشوف بعنيه ايه اللي ناوية عليه هخليه يخاف من خياله لما اغيب يوم عن عنيه

شيرين غنت الاغنية دى واحنا هنحللها انثويا
معنى الاغنيه انها ست غامضه اللي في قلبها مش على لسانها تدعى الطيبه وبالتالي هى ساكته ومش مبيناله هى هتعمل فيه ايه نيجي بقى لمرحلة الانتقام المتمثله في هخليه يشوف بعينيه ايه اللي ناويه عليه شوف بقى الذل والمهانه هييجى في مرحلة الانتقام الصريح انها هتخليه يخاف من خياله وده الجبروت الكامن فالانثى .

 

2- خاصمتك بيني وبين روحي وصالحتك وخاصمتك تاني وأقول أبعد يصعب على روحي تطاوعني ليزيد حرماني

السيده الفاصلة ام كلثوم اختزلت كل مرحلة مذبذبه بداخل كل انثي فالجمله دى اللى هى هخاصمك بيني وبين روحى قال ايه وصالحتك وخاصمتك تاني يعنى انا بيني وبيني هخاصمك وهانكد عليك  وهصالح بيني وبيني وهخاصمك وهستناك تقولى مالك وتصالحنى على حاجه انت ماتعرفهاش يا مزدوج يا اناني يا عديم الاحساس ماهو لو انت بتحس كنت عرفت لوحدك انا مالى وجيت صالحتنى يا مذبذب .

3- فيك حته غرور هكسرها فيك عشان احبك

امال ماهر تفوقت على الكل بالكلمتين دول وجابت الخلاصة في الشخصية القوية اللي بتكسر عشان تذل فتحب براحتها ماهى كاسره عينه بقى والحق يتقال الغرور لازم يتكسر قبل الحب .

 

4- وكأني معملتش حاجه من واحد كان يوم ولا حاجه من حقك ما كتير كبرتك كبرتك على سيدك   

أصالة  جابت اخر الكلام هى مثال البنت المصريه بعد ما بتفركش بتفضح وتذل وتفرش الملايه فخلى بالك قبل قرار الفركشه خلى سيرتك واعمالك حلوه البنى ادم سيره يابنى وربنا يستر على ولايانا .
5- لو مندمتش على الأيام اللي بعدتها لو مدفعتش تمن الغربة اللي أنا عيشتها لو مشربتش كاس المر اللي شربتها مبقاش أنا

اصاله تضرب من جديد والاغنيه دى الحقيقه بتمثل بنات كتير تاني يوم الفركشه الاستحلاف بانها هتدمره وهتندمه وهتشربه من نفس كاس العذاب ودى مرحله جميله جدا كلنا بنمر بيها والجدعه فينا اللي بتنتقم والمرحله الاصعب بقى هى رهان البنات هتجيبه تاني وتذله وترجعه وتشمت فيه الباقيين ولا هتفشل .

 

6- قلبك معدش ملكك مدام عشقتك قلبك معدش ملكك مدام سكنتك

انغام في الاغنيه لخصت الحب الاناني الجميل كان ممكن تلخص وتقول انت بتاعي يا حبيب قلبي مش هديك فرصه لا تلف يمينك ولا شمالك ولا فوقك ولا تحتك ولا تهرب ولا تفكر تهرب ولا يبقى في نيتك تهرب فاهمنى يا حبيبي .