بقلم : حسام أحمد
من يومين صدر حكم للمذيعة الامريكية ارين اندروس بتعويض 55 مليون دولار بعد ما اتصورت فيديو “بدون علمها” عارية وهى فى اوضتها فى فندق فيرمونت المحكمة الزمت الفندق بدفع الملبغ بعد ما اعتبرت ان ده كان بسبب تقصير وتهاون من الفندق, مش هسألك لو اتعرض عليك تتصور فى فيديو و تاخد 55 مليون دولار(نص مليار جنيه تقريبا) تعويض هتعمل ايه لان فيه ناس طالبت بتعويضات على حاجات ابسط من كده بكتير.
1-دلقت القهوة على نفسى يا سعادة البية :
ستيلا ليبيك اشترت قهوتها من ماكدونالدز ,ركبت العربية لبست المطب القهوة اتدلقت عليها وهى سخنة ,قررت تقاضى ماكدونالدز لان القهوة سخنة بزيادة ومش مكتوب تحذير عالكوباية وكسبت القضية وخدت تعويض “2.8 مليون دولار “
2-شربت ريدبول ومطلعليش جناحات ! :
فى 2014 اترفعت قضية على ريدبول لان واحد شرب ومطلعلوش جناحات ولا ديل ولا اى حاجة ,اتحكم على ريدبول ب13 مليون دولار تعويضات عن الفترة من 2002 ل 2014 عبارة عن 10 دولار لكل واحد شرب ريدبول ,وعملوا موقع تدخل تسجل اسمك قبل ميعاد معين وتاخد ال10 دولار كاش او ريدبول ببلاش, علشان يبطلوا يسرحوا بالناس 😀
3- البنطلون ضاع :
يرضيك كده بتوع الدراى كلين يضيعولى البنطلون ؟ انا رايح ارفع عليهم قضية
عم بيرسون رفع قضية اتهم المحل بضياع البنطلون والكذب لانهم كانوا معلقين يافطة مكتوب عليها satisfaction guaranteed” ,بيوعدوه انه يطلع مرضى من عندهم وده محصلش وطالب بتعويض 40 مليون دولار “ليه بنطلون ممضى من نابليون :D” بيرسون خسر القضية بس بعد اربع سنين جرى فى المحاكم لان كلنا عارفين ان “المنطلون لأ” .