مفيش حد فينا يقدر يحدد إمتى أو إزاي بيقع في الحب، ولا يقدر برده يمنع نفسه من إنه يحب حد معين مهما حاول وقاوم مشاعره، وده لإن الحب مالوش علامات أو مؤشرات واضحة، لكن اللي نقدر نعرفه ونلاقيله تفسير واضح هو إمتى وليه بطلنا نحب، وإزاي ممكن حد كان في يوم من الأيام بالنسبالنا كل حاجة في الحياة، يبقى مجرد ذكرى يمحيها الزمن مع مرور الوقت.
في السياق ده، هنقولكوا انهاردة ايه هي الأسباب اللي ممكن تخلي أي شخص يبطل يحب شريك حياته من خلال برجه.
الحمل .. اوعى تستهتر بيه
مواليد برج الحمل ميقدروش يتحمّلوا الإستهتار بمشاعرهم، وده دايماُ بيكون سبب كافي يخليهم ياخدوا قرار إنهم يبعدوا عن اي شخص يتصرف معاهم باستهتار أو تجاهل مهما كانوا بيحبوه.
برج الثور .. لو جرحته هيهرب منك
مواليد برج الثور بيتأثروا بسرعة جداً من أقل حاجة، وبالتالي، فأي موقف أو تصرف يجرحهم أو يأذي مشاعرهم، وخصوصاً من حد بيحبوه، كفيل إنه يخليهم يبطلوا يحبوه ويبعدوا عنه.
برج الجوزاء .. متزهقهوش
أكتر حاجة بأه ممكن تخلي مواليد برج الجوزاء يهربوا فوراً من أي علاقة ويقرروا ينهوها هي الروتين والملل، وده لأنهم شخصيات هوائية بتعشق التغيير والخروج عن المألوف.
برج السرطان .. اللي يبعني ابيعه
قسوة مواليد برج السرطان وتحولهم المفاجيء من منتهى الحب لمنتهى الكره سببها دايماً بيكون الغدر، لو بيحبوا حد وحسوا إنه مش وفي وممكن يتخلى عنهم في أي وقت بسهولة بيتحولوا 180 درجة.
برج الأسد .. مينفعش يحس إنه بيحبك أكتر
مواليد برج الأسد مبيكرهوش في حياتهم قد الحب من طرف واحد، يعني لو في يوم من الأيام حسوا إن شريك حياتهم بيحبهم أقل ما بيحبوه هيدوسوا فوراً على مشاعرهم وهيبعدوا على قد ما يقدروا.
برج العذراء .. لازم تكون كتاب مفتوح
في نظر مواليد برج العذراء، تعتبر الصراحة من أهم عوامل نجاح أي علاقة، وعشان كدة لازم دايماً شريك حياتكم يكون زي الكتاب المفتوح، لإنهم لو اكتشفوا في يوم من الأيام إن الطرف التاني عنده أسرار مخبيها هيبعدوا عنه وهيبطلوا يحبوه.
برج الميزان .. موته وسمه الأنانية
من اسمه باين جدا إن أكتر حاجة بيحبها مواليد البرج ده هي العدل والمساواة، وعشان كدة مبيقدروش يحبوا حد أناني بياخد بس ومبيديش، وعلى قد ما ممكن يستحملوا ويجوا على نفسهم عشان اللي بيحبوه، إلا إن قلبتهم بتكون هي النهاية.
برج العقرب .. اياك والكذب
الصدق يعتبر من أهم الصفات اللي بيدور عليها مواليد برج العقرب، وعشان كدة لو في يوم من الأيام أكتشفوا إن شريك حياتهم كذب عليهم ولو في حاجة صغيرة بيفقدوا الثقة فيه وبيقفلوا منه قفلة بلا رجعة.
برج القوس .. متحطلوش حواجز
مواليد برج القوس مبيحبوش يحسوا بالرفض، فعلى الرغم من إنهم لما بيحبوا بيحبوا قوي، إلا إنهم لو حسوا أن الطرف التاني بيصدهم أو بيبعدهم هينسحبوا فوراً من العلاقة من غير تفكير.
برج الجدي .. التقدير
مواليد برج الجدي ممكن يعدولك 100 غلطة صغيرة ومش مقصودة، لكن يوم ما تغلط في حقهم غلطة كبيرة هيجيبولك القديم والجديد، ومش بس كدة، دول هيبطلوا يحسولك أي مشاعر أصلا وهتبقى ولا كإنك كنت موجود في حياتهم في يوم من الأيام.
برج الدلو .. متحسسوش إنه حد عادي
مواليد برج الدلو بيحبوا دايماً يحسوا إنهم كل حاجة وأهم حاجة في حياة شريك حياتهم، ولازم يشوفوا ده من خلال تصرفات الطرف التاني طول الوقت، لإنهم يوم لما هيحسوا إنهم مبقوش مميزين هيفقدوا رغبتهم في الاستمرار في العلاقة، حتى لو كانوا بيحبوا.
برج الحوت .. الاهتمام ثم الاهتمام ثم الاهتمام
مواليد برج الحوت بيفقدوا مشاعرهم تجاه الطرف التاني بمجرد ما يحسوا إنه مبقاش بيهتم بيهم وده لإنهم بيدوروا دايماً في أي علاقة على التقدير والاهتمام معظم الوقت وده يخليك تكسبهم دايما.
