زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..! حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير” ومائي “بلاش تنزل الغويط”.
النهاردة أعزائي القراء معادنا مع برج “اللهم احفظنا” رغم اسمه اللي المصريين بيقفشو منه إلا انه برج حساس ورومانسي وعاطفي وحاجة كدة كيوت خالص، برج الفامبيارز الليليين، برج العاشقين والمحبين، برج الغرام والمحبة، برج “السرطاااااااااان”، مواليد البرج ده أعياد ميلادهم ما بين 22 يونيو ل 22 يوليو، وبرجهم مائي، متكلمناش احنا عن برج مائي قبل كدة، لكن المؤكد انه برج لطيف، هادي، رومانسي، وده اللي هنشوفه مع بعض في المقالة. بما ان البرج ده مسيطر عليه بشكل أساسي القمر، فتلاقيه كدة سارح مع نفسه هوبا شوية، يلا نشوف كدة هما ايه بالظبط..!
أولا: ليديز فيرست “كالعادة” سيدات برج السرطان
1- عندها سلام داخلي
سيدات برج السرطان الجمال، أكتر ناس متصالحة مع نفسها في الكون، وأكتر ناس بتعرف تهدي اللي حواليها، بيلاقو راحتهم في الأماكن الهادية، مبيتعصبوش علي حد، راضيين عن نفسهم وعن تصرفاتهم، الموضوع ده بينعكس بثقة كبيرة في تصرفاتهم وبيخليهم فعلا ستات في منتهي الهدوء والرزانة.
2- خيالها واسع
طبعا بما ان عندها Inner peace كتير فهي بتغمض عينيها تتأمل طبعا في الملكوت الواسع، ف خيالها يشتغل بقي، ف تلاقي أنثي السرطان من دول تعرفك النهاردة بكرة تقعد تختار المدارس بتاعة أولادكم، تقولها بحبك، تقضي يومين ف اختيار لون أوضة نومها، خيالها واسع بشكل لا يصدق، ممكن تلعب فيه كورة وانتا مرتاح، ف حاجة عجيبة جدا، بس ف النهاية بما ان البرج ده عاطفي بزيادة ف الموضوع بيقلب معاها باحباط، ثم تشاؤم 😀
تحسها بتنفذ كلام أغنية “ثلاثي أضواء المسرح” اللي بيقول:
“مولودة فى ايدها كمنجة .. عاطفية لدرجة خطيرة ..
بتسمى القلقاس مانجة .. والفيل تعملّه فطيرة ..
اصلها خياليه وحساسه وخيالها مركب نفاثه
عزمتني فى يوم على فنجان شاي مرسوم على ورقة كراسه !
ويا إما اشرب واستطعم يا إما تزعل وتبرطم”
3- متشائمة
نتيجة لأنها عاطفية، حساسة، بتواجه مشاكل كتير في مواجهة الواقع المتوحش الأسود السرمدي البائس، دايما بتحط أسوأ فروض وأسوأ احتمالات وتواجه الحياة بمود صعب ، دايما قافشة وجازة، ف حاول عزيزي آدم انك تتجنب حبيبتك/مراتك/زميلتك من برج السرطان، لأنها هتوريك أيام سودا..!
4- أم لكل الناس
لو أنثي برج السرطان حبت بتدلع حبيبها كأنه ابنها، بتفضل تسألك كل ربع ساعة “انتا كويس” وتبدأ التحقيق “كلت ايه؟ شربت ايه؟ أكيد الصداع اللي جالك ده من الموبايل” وهكذا، بتتعامل بأمومة مبالغ فيها مع الي حواليها، عندها طاقة حب لا محدودة وبتحاول تستغلها قدر الإمكان، ف حاول تتقبل الموضوع ده بصدر رحب..!
5- أوفرأتاتش..!
بما انها عاطفية، ف لو دخلت في علاقة عاطفية بتتعلق بحبيبها جدا، ولذلك أنثي السرطان بتواجه مشاكل فشيخة لو جت فركشت، وهكذا، بتتعلق بزيادة بحبيبها، بجوزها، بتستأذنه ف كل خطوة، بتطمنه عليها كل عشر دقايق، حاجة كدة اوف يعني…
ثانيا: الرجالة “ربنا يستر”
1- سوما العاشق
عارفين اللي مشاعره “فياظة”؟ هو ده بقي اللي مشاعره مدلدلقة ف كل مكان، رجل برج السرطان لما بيحب بيحب بجد، بيقولها “بحبك” كل عشر دقايق، وكل مرة كأنه بيقولها اول مرة، ده ممكن يعمل مشاكل لشريكته، لأنها من كتر التكرار ممكن تفقد معني الكلمة، لكن هو بيقولها من قلبه بجد، ربنا معاك يا بطل..!
2- عنده حدس قوي
من أكتر الحاجات المميزة ف رجل برج السرطان هو انه عنده “حدس” قوي جدا، بيعرف يوجهه، فلو قال علي حاجة وحشة تبقي وحشة فعلا، قال رأي ف حد، ف الحد ده بيكون تحت نفس الرأي، حتي لو تايه، وبيمشي ورا توقعاته غالبا ما بتكون توقعاته صح، علي اتصال دائم بال”أنا” الداخلية بتاعته ودي بتخليه محصن ضد خوازيق التوقعات بتاعة الحياة..!
3- انطوائي
غريب رجل برج السرطان، رغم مشاعره وحدسه القوي الا انه انطوائي، ممكن لأنه بيكون حذر شوية في التعامل مع الناس، وعنده قدرة انه يخفي تعبيراته ومشاعره، بالتالي بيتقوقع ف عالمه الداخلي ومبيكونش أبدا م السهل انه حد يطلعه منها، لازم الأول يعرفك، ويطمن ليك، ويحبك ف يبدأ يضمك لعالمه الصغير..
4- صحابه كتير
زي ما قلنا انه حذر في التعامل مع الناس، أحيانا بدافع خوفه من الوحدة بيكون صداقات كتير، ف تلاقي أغلب رجال برج السرطان عندهم “شلة القهوة” وشلة الشغل، وشلة النادي إلخ، صحابه كتير وهو بيبقي نجم وسطهم عامة، ف تلاقيه بوب ف نفسه.
5- علي ابن الناس الكويسين
للأسف البرج ده بتاع العيال اللي بتفرق شعرها م النص وتقفل القميص لحد آخر زورار، تقليديين ف كل حاجة، اختيار الألوان، اللبس، الشغل، وأكتر شئ هو تقليدي فيه ومبيحبش يغيره هو “احم” السيكو سيكو، لأنه بيعتمد ع المشاعر كوسيلة لتوصيل الحب، ف مبيهتمش كتير بعلاقاته مع الستات ولا شكلها، ده طبعا بيكون ممل شوية، لأنه باختصار عنده السيكو سيكو، وسيلة للخلفة ليس إلا، حذاري عزيزتي حواء..!
