زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..! حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير” ومائي “بلاش تنزل الغويط”.

 

النهاردة معادنا مع برج مميز، عاقل، راسي، برج برنس البرانيس في نفسه، بيكره الكسل، والاهمال، بيعرف يلعب من ورا الستارة وبيميل دايما لدور “الPuppeteer” بيحب يحرك الخيوط من ورا الستارة، بيحب يتحكم في كل حاجة، لكن عنيد، ممكن يكون خجول شوية، لكن في النهاية هو تركيبة عجيبة، ملهاش زي، حاسب لا ينطحك عامة، برجنا النهاردة هو برج “الجدي”..!
برجنا برج ترابي، وطبعا زي ما كلنا عارفين ان “العند” وال”تحكم” من أهم صفات الأبراج دي، واسألو برج الثور، مواليد الجدي اتولدو ما بين 22 ديسمبر ل 91 يناير، جو خريفي شتوي مميز، كفيل انه يخلي شخصياتهم مميزة ملهاش زي، اسمه بالانجلش: Capricorns، كابريكورنيس،
الأسطورة الاغريقية بتقول ان “بان” إله المراعي عند الاغريق كان بيتفسح كدة عند حتة قابله إله تاني اسمه “تايفون”، وعرف يسيطر علي “بان” وحوله ل”جدي” فكان من كبير الآلهة “زيوس” انه كرم “بان” وحطه حارس البوابة اللي أرواح البشر بتدخل منها للسما، كنوع من التكريم مش أكتر، المهم،
يلا نبدأ بالستات والبنات زي ما اتعودنا؟ ونشوف برج “الجدي” في الستات مخبيلنا ايه؟ يلا…!

أولا الستات..!

 

  1. بتتحكم في نفسها كويس..!

vlcsnap-200132

من أكتر الستات اللي عندها Self Control وبتعرف تظهر عكس ما بتبطن، بتكون من جواها بتغلي وترسم ابتسامة علي وشها، وتكون متدايقة ومحدش ياخد خبر، لذلك دايما تلاقيها في مواقع قيادية، لأنها بتكون مديرة ناجحة، لأن من صفات المدير الناجح انه ميديش انطباع، يفضل Poker Face  كدة طول الوقت..!
  1. عندها احساس بالمسؤولية

46ad07388b74151e48220485ba74b83d_123622270_102

زي ما قلنا ان شخصية أنثي برج الجدي، شخصية قيادية، ف دايما بردو عندها احساس بالمسؤولية سواء في البيت أو الشغل، أو بين أصحابها، دايما بتلاقيها جواها حتة المسئولية، عمرها ما بتعرف تعيش من غير ما تكون In charge  لذلك دايما حاول تديها اعتبارها، لو لقيتها بتتناقش مع Waiter  في مطعم متناقشهاش، حاول تتفرج عليها وهي بتتكلم هتعرف من لغة جسدها هي قد ايه انسانة جميلة..!
  1. قلبها قلب خساية

341345_0

نتيجة لتحكم أنثي برج الجدي في نفسها بشكل كبير، لذلك، بتبقي عاملة زي الكتاب المقفول طول الوقت، لما بتدخل في علاقة صداقة، أو حب، بتاخد وقت أطول من المعتاد عشان تكشف عن الجانب الجميل اللي جواها، ف تحت الملامح الصارمة، هتلاقي قلب طيب، وهتلاقي مشاعر فياضة وهتلاقي أنثي بمعني الكلمة..!
  1. أنانية شوية..!

Names

هدف أنثي برج الجدي الأسمي هو النجاح، سواء في الحياة أو في الصداقة أو حتي الحب، لذلك ممكن تكون بتركز شوية علي نفسها، وعلي نفسها بعض الشئ، مش أنانية منها قد ما انها دايما شايفة انها لازم تمسك بزمام الأمور وتتحكم في كل شئ، لذلك بتتخيل ان العالم كله كون صغير، وهي دايما مركزه.
  1. دايما ليها وشين..!

ÇáæÌåíä

للأسف أنثي برج “الجدي” من الستات اللي ليهم وشين، يمكن لأنهم متقلبات المزاج بشكل كبير، ف في لحظة تلاقيها ست جميلة لطيفة، وفجأة تتحول تبقي “كينج كونج” مثلا تقوم تجري ورا الولد بشبشب عشان يذاكر، او مثلا تكون في الشغل بتحب في التليفون وفجأة تقوم تمسك في مديرها وهكذا، هي مش متناقضة قد ما بتخلي لكل شخص البروفايل المناسب بتاعه، ف ده ممكن يوتر الناس اللي بتتعامل معاها وخصوصا أقرب المقربين ليها..!

ثانيا الرجالة..!

  1. انطوائي

hqdefault

رجل برج الجدي من نوعية الرجالة اللي دايما لازم تديها Space   ومتكبسيش علي نفسها طول الوقت، لازم تسيبيله الحرية، هما الرجالة عامة كدة، بيقضو وقتهم يفكرو في الـ”ولا حاجة” ولو قاطعتيهم يبقي يا ويلك يا سواد ليلك، انتي ازاي تقاطعيه وهو بيعمل ولا حاجة، دي جريمة… طبعا مش محتاجة أقولك ان رجل برج الجدي بيكون حساس جدا للنقطة دي، ولازم تسيبيه في جلسات التأمل بتاعة “ولا حاجة” دي بس مش كتير..
  1. طموح وحكيم

891590614

من أكتر الرجالة اللي شفتهم بيجتهدوا في شغلهم، وبيعرفوا يحققوا ذاتهم كويس اوي فيه هما رجالة برج “الجدي”، عندهم العمل واجب مقدس، ونداء العمل هو أول نداء بيتلبي، رجل برج الجدي بيرد علي تليفون مديره أسرع ما بيرد علي تليفون أمه وأبوه، وتليفون صاحبته أو مراته، رجل برج الجدي طبعا من كتر ما هو انطوائي، بيتمتع بحكمة كبيرة جدا، من كتر ما بيراقب الناس وتصرفاتهم.
  1. بيحب الاستقرار وراسي

55cfbec323bffc663242247fc405437b_123682834_147

“بيتوتي وهادي وراسي” ده شعار برج الجدي في الرجالة، الرجل من دول بيفضل يفكر كتير، ويخطط كتير، عشان في النهاية يبدأ يكلم واحدة، ويبدأ يفكر انه يكون أسرة او يرتبط عاطفيا، هو مش من نوعية الرجالة اللي بتقول “بحبك” كل خمس دقايق، بيكون اكتر رجل أفعال لا أقوال، ف متضغطيش عليه كتير عشان يقعد يقولك كلام حلو، هو هيعمل أفعال هتبسطك في النهاية.
  1. بيفكر في المستقبل كتير

احمد عيد

عزيزي رجل الجدي، انتا من أفضل مخططي المستقبل، من الناس اللي عندها ملكة تحويش الفلوس، ثم استثمارها وتحويلها لأرباح وأضعاف مضاعفة، رجل برج الجدي مش بيوقف تفكير في مستقبله أو مستقبل عيلته للحظة، دايما شغالة دماغه فيما ينفع الجميع.
  1. واقعي متشائم

53d967790fafa

رجل برج الجدي إلي حد ما متشائم، مش لمجرد السوداوية وخلاص، لأ، لأنه بيعتمد في حياته علي المنطق بشكل كبير، مش بيعيش في الكنافة زي باقي الناس، ولا بيقعد يبني قصور في الهوا، لذلك زي ما قلنا بيحسبها أوي بالورقة والقلم، ودايما زي ما احنا عارفين ان الواقعية لازم يكون ليها جانب مظلم، لو قالك علي حاجة “بلاش” اعرفي انه حسبها كويس اوي وانه عارف عواقب الموضوع ده، ويمكن أكتر منك كمان..!
حابة برضه ليكم يا بنات أكتبلكم روشتة كدة لو ربنا كرمك وارتبطتي بواحد من برج الجدي، روشتة سريعة كدة عشان تكسبي قلبه.
  1. اتقلي عليه، هو مش هيقولك “بحبك” إلا لو كان متأكد منها.
  2. اهتمي بشغلك، هو مبيحبش الست اللي مهملة في شغلها، بيعتبرها دليل اهمال عامة.
  3. متلعبيش بمشاعره، بطلي كلمة “لو كنت مهتم كنت عرفت”.
  4. ادخلي معاه في نقاشات مثمرة، واظهري الجانب المفكر اللي جواكي.
لو عجبتك المقالة اعملها شير وريتويت ولايك، واعمل تاج لصاحبك/صاحبتك اللي من برج “الجدي” واستنوني الحلقة الجاية..!