زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..! حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير” ومائي “بلاش تنزل الغويط”.
بكل الحزن والأسي، النهاردة بكتبلكم عن آخر حبة في سلسلة “الأبراج” عن برج “أواخر الشتا” برجنا برج حالم هادي ؛اغلب المنتمين ليه فنانين ؛مخرجين؛موسيقين؛رسامين ؛ كلهم احساس وحب وأمل ؛ مواليد البرج ده اتولدو ما بين 19 فبراير ل 20 مارس، برج مائي، أسطورة برج الحوت بتقول ان: فينوس “إلهة الجمال” وكيوبيد “إلهة الحب” كانوا ماشيين بيتفسحوا علي شط نهر كدة وفي منتهي السعادة، وفجأة طلعلهم وحش نكد عليهم حياتهم، اسمه “تايفون”، النهر شافهم وهما مرعوبين من الوحش، ناداهم وخلاهم يتحولوا لسمكتين، وخلاهم سمكتين بلون القمر، زي ما الأسطورة قالت…
والآن: إلي استعراض صفات برج الحوت في الرجالة والسيدات، وكعادتنا من مدة طويلة:
الستات الأول طبعا..!
1. ناعمة ورومانسية
من أكثر السيدات أنوثة علي مستوي العالم، كاريزما، أنوثة، حتي لو مش ملكة جمال دايما فيها جانب جميل بيظهر حتي ولو هي مش واخدة بالها، بالتالي بتكون محط أنظار كل الرجالة اللي حواليها، ده ممكن يسببلها مشاكل، لأن طبيعتها خجولة بعض الشئ.
2. مبدعة وفنانة
في شغلها بتفضل متكونش في المواقع القيادية، لكن هي عبارة عن “بنك أفكار” متنقل، دايما بتطلع أفكار كتير، شخص مبدع من الدرجة الأولي، من نوعية الناس اللي بتلبس وبتجرب وبتطلع موضة جديدة تليق عليها هي بس، بنات برج الحوت من أشيك البنات عامة.
3. بتكره الاستغلال
زي أي ست، خصوصا ستات برج الحوت، بيكرهوا جدا ان حد يلعب بمشاعرهم أو يستغل قلبهم الطيب، ولو دخلت في علاقة عاطفية، وحست ان الطرف التاني بيتلاعب بيها أو بيستغل حبها ليه، هتبدأ تكرهه تدريجيا لحد ما يخرج من حياتها علي طول، زائد انها بتعرف الكدب، وبتميزه بسهولة جدا.
4. شكاكة وحساسة
للأسف دايما سيدات برج الحوت عندهم شك في قدراتهم الداخلية، سواء في الشغل أو في الحياة العامة، دايما بنات برج الحوت حساسين جدا لأي نقد حتي لو كان نقد ايجابي، بيأثر دايما جدا علي شغلهم، لذلك محتاجين دايما يكونو متحاوطين بصحاب كويسين.
5. بتحتاج دعم دايما
زي ما قلنا بنات برج الحوت عندهم مشاكل في الثقة في نفسهم، لذلك دايما بيكون حواليهم شلة أصدقاء قوية، بيقدمولها الدعم والاستشارة والنصايح، وأحيانا مدح ومجاملات، بنات برج الحوت جدعان جدا، لو حست ان فيه مشكلة عند حد من صحابها بتسيب الي وراها واللي قدامها وتروح معاه.
أما عن رجال برج الحوت بقي:
1. كسول..!
“هو انت كل يوم أجازة قدام البلاي ستيشن يا عالقهوة”، الرجل الحوت هو أكسل خلق الله، مش بيتحرك من مكانه ومعندوش أي مشكلة انه يفضل علي هذا الوضع طول النهار، تصور كم المشاكل والخناقات اللي ممكن تطلع من كسله ده، ممكن يوصل بيه الكسل أصلا لأنه ينام مكانه عشان مكسل يقوم يدخل أوضته..!
2. عاشق للظلال
زيه زي بنات برج الحوت بالظبط، بيفضل العمل في الظلام، لكنه أكثر ابداعا وتألقا وانتاجا للأفكار، وأغلب أوقاته بيفضل يتواجد في الخطوط الخلفية في شغله لأنه “بيكسل” بردو، بيتحكم في الشغل بنسبة كبيرة، ودايما حاجات كتير بتقف عليه لأنه مش موجود أو محدش غيره بيعرف يعملها، هو مبدع، بس كسول..!
3. عطوف ورقيق
متستغربيش يا عزيزتي، لو لقيتي واحد من برج الحوت وقاعد قدام فيلم رومانسي وبيدمع، او بيسمع أغنية وسرح معاها وعيط، عادي جدا، هو رقيق، وحساس جدا، مش بأفورة، بيحب الولاد، بيكون أب مثالي، ومن وقت للتاني بيحب يسمع شريكته كلام حب عشان يحسسها بمشاعره.
4. عنده حدس عالي
رادار الكدب عند رجل برج الحوت عالي جدا، مش هتعرف تكدب عليه مهما حورت، ولو كدبت وصدقك او اشتري منك مرة مش هيشتري التانية، والتالتة بالتأكيد هيفقد ثقته فيك، بلاش تكدب عيه أحسن..!
5. طموح وحالم
من أبرز صفات رجل برج الحوت هو انه طموح وحالم، دايما جواه أحلام بتخص مستقبله وحياته، الأحلام دي بتكون رقم واحد في حياته، لو شريكته عامة حابة تحتفظ بيه ياريت تبعد تماما عن تسفيه أحلامه أو التقليل منها، وياريت تساعديه في تحقيقها، معلش تعالي علي نفسك وبطلي تهدي فيه شوية، طموح وفضوله لكل شئ جديد بيحركه، ودي الحاجة الوحيدة الي ممكن تخليه يتخلي عن كسله الدائم…!
