زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..!
حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير” ومائي “بلاش تنزل الغويط”.
هنبدأ بـ برج العظماء، عمهم وحارق دمهم، أكتر ناس بتاخد علي قفاها من غير أي مبرر واضح، البرج اللي فاضحنا في الفضائيات ومبهدلنا معاه في كل حتة.. “برج الحمل”.
تعساء الحظ مواليد برج الحمل اتولدو من 21 مارس لحد 20 أبريل، طبيعي يطلعو كدة، اتولدو في أكتر فترة فيها زعابيب وعواصف ترابية، وتقلبات جوية في السنة كلها، برج ناري، بيسيطر عليه كوكب المريخ “بنلف ف كواكب، والكوكب لف بينا”.
امرأة برج الحمل “ياستار”:

 

  • مستقلة بذاتها

aries1

مبتقفش معاها علي راجل، مش هتشيل الشنط هشيلها، مش هتصلح الدولاب هجيب شاكوش وأدقدق، مش هتوديهم المدرسة هوديهم، مش هتعمل مش مهم بس براحتك بقي، هي حذرتك وانتا حلقتلها، ف انتا حر.
  • زعيمة 

aries2

دايما ستات برج الحمل بيتولوا مناصب قيادية، ولو المناصب مش قيادية ف هي بتخليها قيادية، دايما دايرة الضوء مش لازم تتشال من عليهم، لأنهم لو اشتغلو في الضل بيدبلو ويموتو، زيهم زي النباتات مش محتاجين أكتر من شمس تغذيهم وتنور طريقهم.
  • شغل البيت

putzfrau

بتكره ست برج الحمل شغل البيت بنسبة كبيرة، الفوضي الخلاقة اللي حواليها بتطلع منها أفكار كتير، لكن في النهاية ممكن تكون بتشتت تفكيرها، فبتقوم مضطرة تروق عشان تلاقي الهدوء اللازم للتفكير.
  • جريئة

download

ستات برج الحمل، وأولهم أنا كلهم “مدب” بيرمو كلام زي الرصاص ف أي حد، مفيش حدود، ولا فرامل، مش مهم مين واقف قدامها، المهم بس الكلمة تطلع، عشان هي ميحصلهاش حاجة، تموت يعني؟ لا نرمي الكلام ف وش الناس.
  • سريعة الاشتعال

firestorm-2-160452

  • بما ان ست برج الحمل نارية الطبع، فهي زي العربية البورش بالظبط، بتطلع من 0 ل 180 ف تلات ثواني، ممكن تكون قاعدة ماسكة الايباد ف أمان الله، فجأة تنزل تمسك في مرات البواب، ممكن تكون ورا مكتبها عادي جدا، فجأة تلاقيها مسكت ف مدير إدارتها، مفيش أي نوع من التوقعات في التصرفات، سريعة الاشتعال، بس بتهدي بمعدل أبطأ، والشئ المبهج انها بتسامح بسهولة.

 

رجل برج الحمل

  • متقلب المزاج

CQBflePUwAAZ7t_

الرجل من برج الحمل زي الست تمام، متقلب المزاج، لكن بمعدل اهدي، مش هتلاقيه فجأة قام مسك ف مرات البواب، ولا البواب نفسه، هو بس مزاجه بيتعكر بسهولة، ويقولك الكلمة الشهيرة “يووه، هو كل يوم قرف، والله ما قاعدلك ف البيت” وياخد ديله ف سنانه ويروح ع القهوة مع صحابه.
  • أناني

137580

من أهم صفات الرجل الحمل إنه إلي حد ما أناني، حتي لما بيدي حد حاجة أو هدية، بيعمل كدة ارضاءا للأنا العليا جواه، الرجل الحمل عامة بيتصرف من منطلق “أنا ومن بعدي الطوفان” و “اللي يحتاجه البيت يحرم ع الغيط” وهكذا.
  • حازم وصارم

images (1)

لو رجل من برج الحمل حط قانون أو قاعدة، بيمشيها حتي علي نفسه، القانون عنده هو القانون، النظام هو النظام، لو حركت اللابتوب بتاعه من مكانه هيمسك فيك، ولو حطيت مكنة الحلاقة بتاعته ف مكان تاني هيقتلك، هيقطع وشك، آمين؟ اللهم بلغت 😀
  • حبّيب أوي

s320112013514

رجل برج الحمل حبيب مخلص، بيحسس الست اللي معاه انها ملكة الكون، مفيش حاجة هي عاوزاها مش هتاخدها، وبيديها فرص لا نهائية، لأنه بيدي ألف عذر وعذر، بس لو النهاية جت، بيقلب الترابيزة ويمشي عادي.
    • شمّات

برج الحمل عامة رجالا ونساءا، بالذات الرجل، بيمتاز بطبع الشماتة، طبعا لحكمته الكبيرة في كل حاجة في الحياة، ف لما تقوله حاجة وميعملهاش ويرجعلك بخفي حنين بيقول الكلمة الشهيرة “مش قلتلك؟؟”
نهايته، برج الحمل ده برج ابن لذينة، لو شفت حد من برج الحمل داخل ف شارع، انصحك تغير اتجاهك، أنصحك متحتكش بيه ف اوقات غضبه، وحاول تديله شوكولاته كتير، هو بيحب الشوكولاتة والفلوس