يقال ان فيه ثمانية وثلاثين حبكة درامية فالكون مبيخرجش عنها اى مؤلف مهما اختلفت التفاصيل, وعلى الرغم من ان الاعلانات مجالها اوسع من الثلاثين حبكة “لان مش بالضرورة الاعلان يكون فيه قصة” والخروج عن المألوف المفروض انه اسهل لكن فى احيان كتير الاستسهال و قلة الابداع “او خوف الكلينت على فلوسه” بتموت الاعلان اوتخليه يمر مرور الكرام وسط الزحمة.
واحنا هنستعرض فى المقال اهم الاعلانات اللى اللى اتعرضت فى اول اسبوع من رمضان الاكثر مشاهدة و اللى مخدش حقه واللى اتوقف بقرار جهاز حماية المستهلك بعد اقل من اسبوع على عرضه.
فودافون :
فودافون نحجت فى انها تخطف الاضواء بنزولها فى اوائل الاعلانات السنادى وفعلا كان اول اعلان عمل رد فعل واثار جدل كبير عالسوشيال ميديا واولهم كان الجدل السنوى بتاع “مش خسارة الفلوس دى كلها وكنتم اديتوها للفقرا افيد” ,فودافون سنة بعد سنة بتنجح فى انها تعمل positioning ان احنا اكتر شركة “بتصرف فى الاعلانات” ومن جدل الفلوس واشاعات اجور النجوم فى الاعلان لجدل تانى بيخلقه الاعلان وهو “ايه الجديد؟!” زى ما الاعلان عجب ناس كتير برضه اتوجهله انتقادات بان الفكرة مستهلكة ومفيهوش اى ابداع , وممكن يكون السبب فى ده ان فودافون بتحب تplay safe فى رمضان وخصوصا بعد الbudget الفظيعة اللى بتتصرف على اعلان رمضان فالغلط فيه غير مقبول وبيحبوا يلعبوا بحاجة مضمونة وتخلى اسوء الاحتمالات ان اللى مش هيحب الاعلان مش هيكرهه.
وكان الجدل التالت فى اعلان فودافون “هى شيرين بتقول ايه؟” .
فى النهاية كان اكتر اعلان حقق مشاهدة فى رمضان باكتر من “15 مليون مشاهدة” على فيسبوك و 3 مليون على يوتيوب ,الا انه لايزال اعلان رمضان السنة اللى فاتت هو اكتر اعلان لفودافون حقق مشاهدة على الاطلاق وكسر حاجز ال10 مليون مشاهدة.
اتصالات:
اتصالات عودتنا على اعلانات كوميدية فى رمضان لكن السنادى تخلوا عن الثيم ده ,موسيقى حلوة وصوت جميل والوان مبهرة بس تحس انه كليب لاصالة اكتر من انه اعلان اتصالات ومفيش اى حاجة ليها علاقة برمضان ومش هتحس ان ده اتصالات غير لما تشوف اللوجو فالاخر على عكس اعلانات السنين اللى فاتت اللى كانت مميزة بالشخصيات الجرافيك اللى تفهم منها ان دى اتصالات من قبل ما تكمل الاعلان لكن فى النهاية الاغنية حلوة وعجبت ناس كتير , وبعد اقل من اسبوع نزل اعلان تانى لمحمد الننى بشكل مختلف تماما علشان يكمل على سلوجان “تخيل بكرة” اللى اعتقد انه مش هيكون اخر اعلان لاتصالات فى رمضان .
اورانج
اول سنة لاورانج فى رمضان واكتر اعلان كنت مستنيه, ياترى اورانج هتعرف تعلى على موبينيل ؟
بعد نزول فودافون واتصالات ,اورانج نزلت باعلان قصير جدا 20 ثانية بتقول للناس عندنا باقات “المدفع” وبعدها بيومين نزلت اعلان لزيدان “نسخة فرنسية” من غير اى adaptation ومجرد ترجمة وبيتكلم عن اليورو, بصراحة انا حسيت انهم عاوزين يملوا بأى حاجة وخلاص علشان الموسم ميهربش مننا.
لكن بعد سابع يوم اول اعلان لاورانج نزل ووضح اكتر انه الاعلان الاول كان مجرد teaser ,اكرم حسنى و احمد فهمى شخصيات دمها خفيف و مخليه الاعلانين حلوين جدا وخصوصا الاعلان التانى اللى ربط الكورة ورمضان واليورو مع بعض بذكاء.
جهينة :
جهينة هى اكتر شركة نزلت اعلانات فى رمضان لحد دلوقتى بسبع اعلانات فى اسبوعين !! وقدرت جهينة تلفت النظر بقوة فى رمضان السنادى بحملة كوميدية وبطريقة جديدة مش متعودين علىها من جهينة ,و متصدرة الtrends على يوتيوب باكثر من اعلان منها الاعلان الاكثر اثارة للجدل على الاطلاق “الدوندو” اللى حقق اكثر من مليون ونص مشاهدة على يوتيوب فقط وانقسمت الناس هل كلمة “دوندو” كلمة خادشة وبيحتوى على ايحاءات جنسية ولا لأ.و فى النهاية اتمنع من العرض بقرار من جهاز حماية المستهلك واتهم انه بيخدش الحياء والذوق العام !! لكن بيظل لحد دلوقتى هو انجح افيه فى الموسم بلا منافس.
قطونيل:
قطونيل السنة دى نزلت اعلانين فى نفس الوقت واحد على نفس فكرة نص اعلانات رمضان السنة دى “نجيب اغنية قديمة ونغير فى كلماتها” وكانت اغنية سواح , والاعلان التانى “القاعدة” اللى انضم لقايمة الممنوعين من العرض برضه بتهمة الايحاءات الخارجة.
دايس
دايس اول شركة السنادى تقرر تعمل brand attack وتتكلم على منافسها قطونيل فى الاعلان ويمكن تكون هى دى الحاجة الوحيدة المميزة و اللى لفتت انتباهنا للاعلان ,ومن بعدها حملة اعلانات للاسف ملحقتش تتهنى لانها اتوقف هى كمان بقرار جهاز حماية المستهلك بتهمة “التشجيع على الفجور وتبرير الخيانة الزوجية “!!
بيريل
بيريل من البراندس اللى لازم يكون ليها تواجد كل رمضان , نزلت بحملة اعلانية بعد خامس يوم بتحتفل ب30 سنة “حسرة” ولسه بتلعب على concept الرجولة , دايما بيريل بتتهاجم بسبب اعلاناتها فلو الاعلانات السابقة ليهم عجبتك يبقى الحملة دى هتعجبك ولو مكنتش مقتنع بيها فيبقى الحال على ما هو عليه , وبيريل كانت من ضمن القايمة الممنوعة من العرض مع دايس وقطونيل وجهينة ,بسبب الاعلان اللى فى الحمام.
اشترى المصرى:
حملة اشترى المصرى اللى بيرعاها البنك الاهلى وconcept “عقدة الخواجة” اللى اتعمل حلو جدا يمكن من اكتر الاعلانات المهضوم حقها فى رمضان ومحدش اتكلم عليها كتير ,ممكن يكون ناقصها الافيه القوى اللى تخليها تعلق مع الناس لكنها اعتمدت بشكل كبير عالhard sell و الاقناع اكتر من الكوميديا.
كوكاكولا:
كوكاكولا نزلت بعد اول اسبوع من رمضان باعلان بيكمل على حملة ال100 قرية بتاع السنة اللى فاتت وانهم نفذوا وعدهم لتطوير القرى وخدمة المجتمع ويمكن بعد الهجوم اللى حصل السوشيال ميديا ضد كوكاكولامن شهور واللى الناس كان بتسأل “فين وعد كوكاكولا؟” قررت كوكاكولا تثبت انهم فعلا اشتغلوا عالارض ومكنش مجرد كلام اعلانات” , الاعلان محققش نفس الانتشار والضجة بتاعة السنين اللى فاتت ويمكن ده بيحسم الجدل بتاع اعلان فودافون اللى بتدفع كتير للمشاهير وهو هل لو اتبرعت بالفلوس اللى بتدفع عالاعلان لخدمة المجتمع اعلانك هينجح ؟؟ متهيألى مفيش مقارنة بين الضجة اللى عملها اعلان فودافون و اعلان كوكاكولا اللى مر من غير ماحد بتكلم عنه.
كوكاكولا نزلت بأعلان تانى بجو رمضانى وصوت عايدة الايوبى لكن لحد دلوقتى و “بعد مرور يومين” لم بتخطى ال1000 مشاهدة على يوتيوب !!
بيبسى :
بيبسى تخلت عن جو النوستالجيا بتاع التلات سنين اللى فاتوا واللى كان ناجح جدا لصالح اعلان بيتكلم برضه عن دور بيبسى فى خدمة المجتمع, ” رحلة ازازة” حلو و رابط رمضان بمشاريع بيبسى المجتمعية بسلاسة ,لكن برضه مقارنته بحملات السنين اللى فاتت مش هتبقى فى صالحه .
