خلينا متفقين اننا كلنا كمصريين، من أوائل الحاجات اللي بنسمعها واحنا صغيرين، أو معديين ف الشارع، بعد أغاني المهرجانات ومصطفي كامل عامة هي “أم كلثوم”، الست أم كلثوم من الحاجات النادرة الي محافظة علي نفسها ف مصر من ساعة لما بدأت غنا، لحد ما ماتت، مفيش حد أكبر منها لا ف الشهرة ولا ف النجومية برغم وفاتها من أكتر من 40 سنة، ولغاية دلوقتي أغانيها بتتسمع وبتتكرر وبتتعاد، وبتتباري عليها المغنيات عشان تثبت صوتها ونفسها.
دي الرحلة الي بيمر بيها كل واحد سميع للست، خطوات كلنا عدينا بيها وف الاخر بقينا كلنا بنسمعها، بنسهر علي صوتها، بنفركش علي صوتها، بنصطبح بيها، بقت ساوندتراك لحياتنا عامة، ويلا نشوف:

 

خطوة 1: ايه الصوت الفظيع ده مش قادر مش قادر

1

أول حاجة بتيجي ف بالك وانتا بتسمع “أم كلثوم” هي صوتها القوي، طبعا طبلة ودانك اللطيفة مبتعرفش تستحمل، ف اول ما بتسمعها بتقلب المحطة، توطي الراديو، ولسان حالك بيقول “ماله عمرو دياب؟”، ف الوقت ده انتا بتكون كطفل أو كمراهق معندكش طاقة تسمع لواحدة عندها سبعين سنة وهي بتقول “خدني ف حنانك خدني”، ف تقلب وتاخدها من قصيرها بدل ما أبوك وأمك يسمعو الغنوة ويشبطو فيها..

 

خطوة 2: بتكح تراب

2

الخطوة التانية انتا بتكون ودانك أخدت وطبقت علي صوت أم كلثوم خلاص، ف مش بتقلبها، لكن بتبدأ تشوفها وتسمعها بمنظور مختلف، يعني بتشوف فساتينها الماكسي وتقول ايه القدامة دي، حفلاتها القديمة لما القصبجي كان بيبقي قاعد وراها، وتقعد تتريق علي شكله، وياسلام لو ربنا كرمك واتكعبلت ف فيلم “فاطمة” ولا “سلامة” ولا “نشيد الأمل”، هتفطس م الضحك علي طريقة الكلام القديمة، أو الموضوع المومياوي اللي الفيلم بيتناوله، ف المرحلة دي كلها بتكح تراب.

 

خطوة 3: الملل عزيزي آرثر

3

الخطوة التالتة يا ابني يا حبيبي باختصار انك بدأت تتقبل وجود أم كلثوم كأمر واقع ف حياتك، لكن بتكون زهقان منها فشخ، يعني ايه أصلا اسمع أغنية ساعة ونص؟ يعني ايه هي بتكرر ليه؟ هي بتحفظني الكلام؟ يا ولية بس بقي *وتمد ايدك للراديو تقفله* وهكذا. أم كلثوم بالنسبة ليك ف المرحلة دي عبارة عن واحدة لتاتة بتهري ف كلام كتير…وبتاعة الناس الأوفر ايدج.

 

خطوة 4: ما تقوم تهز للرجالة يا سيد

4

خطوة اكتشاف المزيكا الحلوة ف أغنيات أم كلثوم، لما بتلاقي نفسك بشكل لا ارادي بتقوم تهزها علي “يامسهرني”، أو “ألف ليلة وليلة” أو “انت عمري”، ف تلاقي نفسك بدون وعي بتقوم تشغل أغنيات الست عشان ترقص أو حد يرقصلك –ولعانة يا سيدي- بتتجاهل من جواك أم كلثوم وهي عمالة تعيد، طالما المزيكا شغالة وانتا متسلطن وبترقص، مفيش مشكلة خالص..!

 

خطوة 5: مقاطع أم كلثومية ساخنة

5

السم بدأ يتسرسب لدمك، انتا بدأت تحب الست، بس أغانيها طويلة، تبدأ ايديك تدور علي “ساوندكلاود” ويوتيوب علي حاجات زي “وصفولي الصبر” – “قد ايه من عمري قبلك راح” – “الهوي العطشان ف قلبي بيندهك” وهكذا، تبدأ تنكش كدة علي كوبليهات، ومع الوقت ف المرحلة دي المزيكا بالكوبليهات بتفضل تلف وتزن ف ودانك وانتا مش عارف تتحكم فيها، فتبدأ تتنقل للمرحلة البعدها، انك تسمع الغنوة كاملة..!

 

خطوة 6: ما أروعك..بس انجزي

6

ف الخطوة دي انتا بدأت تتقبل وجود أم كلثوم، بأغانيها، بمزيكتها، بسلاطتها وبابا غنوجها، وبدأت تسمعلها حاجات مشهورة زي “انت عمري” أو “ألف ليلة وليلة” بتزهق منها شوية بس الأغنيات عامة بتفضل ف نظرك حلوة، بس لما بتتفصل بتقفلها علي طول، وف الفترة دي بالذات بتبدأ تدور علي Covers لأم كلثوم من امال ماهر، أو أنغام، نسخ أقل طولا وفي نفس الروعة.

 

خطوة 7: الست دي بتقول كلام زي الفل

7

الادمان اتمكن منك خلاص، انتا بقيت بتحب الست دي، بقيت برنس، وصلت لمرحلة انك لما بتشوفها بتستني تعرف هي بتغني ايه، بتجيب الراديو الساعة 11 عشان تقدر تسمعها كل يوم، وبتعرف تستحضر الأغنية المناسبة لمودك ف كل وقت، أم كلثوم بقت جزء من العالم بتاعك.

 

خطوة 8: معندكش حاجة لأم كلثوم؟

8

مرحلة الادمان،بتهرش علي الأغاني بتاعتها، ف هتلاقي عندك الست ف الموبايل، ع الساوندكلاود، لما بتركب العربية مع حد بتسأله “معندكش حاجة لأم كلثوم؟”، لما حد بيسألك مين مطربك المفضل بتقول “أم كلثوم وعبد الحليم”، الدندنة عمال علي بطال، أول اختيار بينزلك ف الأوبشنز هي اغاني ام كلثوم.

 

خطوة 9: أمي وأبويا كان عندهم حق..!

9

الخطوة دي عبارة عن وقفة مع النفس، بتبدأ كدة تفتكر لما كنت صغير ومراهق بتجري ورا حفلات “عمرو دياب” و “منير” و”حماقي” وبتتريق علي أبوك وأمك وهما قاعدين بعد المغرب بكوبايتين الشاي بيسمعوها ع الكنبة ف الليفنج، لأنك بقيت ف نفس مرحلتهم كدة، حاول ف المرحلة دي علي قد ما تقدر انك تتفادي والدك ووالدتك لأنهم هيبهدلوك زي منتا بهدلتهم زمان، it’s payback time!

 

خطوة 10: عظمة علي عظمة علي عظمة يا ست..!

10

مش كل الناس بتوصل للخطوة دي، المرحلة دي هي مرحلة الدكتوراة ف أم كلثوم، نادر لما حد يوصلها، ف المرحلة دي انت بتكون خلاص قسمت أغاني الست حسب الوقت، وحسب الملحن، من طلعة الغنوة بتعرف هي للسنباطي ولا عبد الوهاب ولا بليغ، م الكلام بتعرف ده أحمد رامي ولا أحمد شفيق كامل، بتسمع للست أغنيات مش مشهورة، بتحبلها قصائد صعبة جدا، بتكون فعلا وصلت ف أغنيات أم كلثوم لدرجة الاستاذية، أحييك لو وصلت للمرحلة دي..

 

شارك المقالة لو عجبتك وقلنا انت ف انهي مرحلة من المراحل دي 😀