السوشيال ميديا عامة سواء فيسبوك او تويتر او اى ابلكيشن تاني على قد ما هما مصدر معلومات وتعارف ووصال بين الناس على قد ما فيه ناس مجرد وجودها على الاكونت بتاعك مزعج وممل وكئيب بيجيبوا لنفسهم الكلام والشتيمه والخمقه مما يؤدى ذلك لبلوك مضمون .
  • ناشر التفاصيل نجم نجوم هوليوود الاسطورة

34250hlmjo

وده كائن يستمتع بنشر كل تفاصيل حياته على الفيسبوك يعامل نفسه وذاته معامله نجوم السيما اللي متخيل يا عيني ان الناس كلها مستنيه تعرف صحى الساعه كام وحلم بايه وهو نايم هيلبس ايه وهو رايح الشغل قابل كام اشاره مرور وكام كمين ومستنيين سيلفي عم احمد بتاع البوفيه وصوره مج قهوه الصبح وصورته على المتكب وهو قدامه ورق شغل كتير وصوره تانيه للبريك الحلو ابو سيجاره وبوست شتيمته للمدير ثم بوست يلقح فيه كلام عالواد العصفوره اللي بيترقى بسرعه ويوصل في الشغل وهكذا لحد سيلفي السرير بالليل قبل ماينام .
  • المصوراتى الملقب بالـالفوتوجرافير

large-تصوير+فوتوغرافي

الموهوم حلم انه مصور شاطر يفصل يبوست صور لاى حاجه قدامه مجين نسكافيه من منظور افقي او راسي اتنين عرايس صحابه جاملوه وصورهم صورتين ، صور طبيعه خلابه لزرعتين يتوسطهم ورده فوشيه اللون اى حاجه والسلام وده بنى ادم مزعج جدا عنده قدره رهيبه لازعاجك بخمسين صوره فى اليوم الواحد .
  • الصحفي المجتهد لافت الانتباه

resize

كائن الصحفي المجتهد كائن مزعج جدا خاصتا لو في بدايه مشواره الصحفي فهو بيتصور مع اى حد ممكن يكون بيمثل او بيخرج او بيعدى من ورا الكاميرا عشان يثبتلك طول الوقت انه قريب من اهل الفن وبينزل يغطى اهم الاحداث ولما مايلاقيش فايده فى جلب الانتباه لبروفايله يحطلك اى صور انشالله صوره مج نسكافيه ويكتب فوقه انتحار قالب سكر غرقا داخل احد اكواب النسكافيه وهكذا .
  • كائن الـباولو كويلهو

images

شخص فاضى ممل يعتقد في اغلب الاحيان انه عاقل رزين مفكر مبدع وده بردوا بيحط صور كتير طول اليوم وبيكتب جمل من وحى خياله غالبا بتبقى جمل كئيبه غير مفيده زيه بالظبط على شاكله المراه يمكنها ان تلد كل 9 اشهر او مثلا يكتب الراجل المصري هو اكتر راجل مصري في مصر او يكتبلك على صوره لجيفارا  مش قد الحريه ماتطلبهاش مش قد الكلمه ماتقولهاش مش قد العهد متوعدهاش وهكذا .
  • اللعيب

image_1378282201925

ده شخص قاعد فاضى بيلعب طول النهار على الفيسبوك وطول الوقت بيبعتلك نوتيفيكيشن بيطلب منك لايف للعبه كاندى كراش او المزرعه السعيده .
  • الكابلز الحبوبين

download

ثنائي مرح كده لسه بيحبوا بعض جديد فبيلبسوا زى بعض نفس القميص الكاروهات او تيشيرتات عباره عن جمله من نصين نص هو ونص هى ويقعدوا يقرفوك بصور استغفر الله العظيم لا منها صور رومانسيه ولا منها صور الواحد يتعظ منها حتى وهتلاقيهم دايما بيكتبوا نص انت ونص انا ، انا نص وانت كملته وهكذا .