مفيش يوم بيعدى عليك الا و بتسمع او تستخدم امثال مصطلحات ومصطلحات مصرية كلنا عارفين معناها واللى مقصود بيها بس غالبا مش عارفين المثل ده ابتدى منين ؟ يعنى ايه علاقة الكوسة بالواسطة ؟ والاستعباط ببنها ؟ والابل بتكدب فى ايه اصلا وعلشان دايما اللى ميعرفش يقول عدس فحاولنا ندور على اصل الحكاية ورا شوية امثال ونجيب اصلها

 

1-لا دى كوسة بقى :

فيه ناس بتقول واسطة او مجاملة او recommendation او تعري* ,مصطلحات كتير بس كل المصريين اتفقوا على مصطلح واحد يعبروا بيه عن الحالة دى اسمه الكوسة , اشمعني الكوسة ؟ ليه مش البامية مثلا اصل الحكاية ان فى عصر المماليك كان فيه سوق كبير بيفتح فى ميعاد معين الصبح وتجار الخضار كانوا بيقفوا بالطابور علشان يدخلوا , بس كانوا بيعملوا استثناء لتجار الكوسة انهم يدخلوا الاول لان الكوسة دى حتى طعمها احلى بتبوظ بسرعة ومنها جه مصطلح الكوسة .

1

 

2- عامل من بنها !

لما حد يستعبط وميردش او يحاول يستنصح يقولك ده عامل من بنها , بيقولك زمان الناس اللى بتركب قطر الوجه البحرى اول محطة بيعدى عليها بعد ما يخرج من القاهرة هى بنها , وكان الراكب اللى ملهوش مكان يقعد فيه يستأذن من اى حد قاعد انه هيقعد مكانه المحطة دى بس لانه نازل بنها وكلها كام دقيقة , بس دى بقت عادة عند اى حد ملوش كرسى وعاوز يستنصح يعمل نفسه من بنها ونازل قريب ويقعد . “بس تفتكر بقى لو حد من بنها وعاوز يستنصح يعمل نفسه منين ؟!”

2

 

3-كداب كدب الابل :
طبعا اشهر واحد كداب كدب الابل هو “المعلم فلانتينو” فى فيلم بوحة .بس هو الجمل بيكدب فى ايه ؟! الجمل احيانا بيحرك بقه كده كأنه بياكل لبان ولا حاجة بس هو فى الحقيقة مبياكلش حاجة وكان زمان البدو بيتخدعوا فى الحركة دى وهم بيرعوا فى الصحرا وبيفتكروا ان الجمل لقى حاجة تتاكل فعلا ,بس الجمل طلع بيشتغلهم !

3

 

4-احنا دافنينه سوا :

كل واحد مننا عنده صاحبه اللى دايما دافنينه سوا وعارفين مصايب بعض , واصل المثل برضه كان بين كان فيه اتنين صحاب زمان بس نصابين سرقوا فلوس ودهب من قرية وقرروا يهربوا بيهم على اى قرية جديدة محدش يعرفهم فيها وكانوا شايلين حاجتهم على ضهر حمار كانوا مسمينه “ابو الصبر” وقبل ما يوصلوا القرية الجديدة الحمار مات قريب من القرية و قرروا يدفنوه وبنوا حواليه سور ,اهل القرية لما شافاوهم سألوهم انتوا بتدفنوا مين وايه ده , واحد من الاتنين قالهم ده سيدى ابو الصبر مات ,وده كان راجل صالح معانا وليه كرامات وده المقام بتاعه ,اهل القرية صدقوا وبقوا بيدفعوا تبرعات للمقام علشان تجيلهم البركة والنصابين ياخدوا الفلوس و يغتنوا و فلوسهم تزيد, وفى يوم واحد منهم شك ان صاحبه بيسرقه وقام علشان يضربه ,صاحبه قاله : “لو مديت ايدك عليا هدعى عليك واشتكيك لسيدى ابو الصبر” ,رد عليه: اتنين صحاب, “تشتكينى لمين ؟! دا احنا دافنينه سوا” .

4