طبعا الفلانتين قرب و الحياة كلها هتبقى ورد و دباديب و احمر فى احمرلكن فى شوية قواعد فى اليوم دا الكل بيمشى عليها فى الفلانتين وهذه القواعد بتختلف على حسب الحالة الإجتماعية و الفئة العمرية، المهم سيبكم من الكلام المجعلص دا و تعالوا نشوف القواعد دى.
-
لو انتِsingle يبقى لازم تتريقى على الفلانتين و على المناظر الى بتحصل فيه وافورته و انه مبيعبرش عن اى مظهر من مظاهر الحب بالعكس دا بيعبرعن “المُحن”
-
و لو ولد بقى single هتبقى برنس فى نفسك كدا و تقعد تقول “يا عم فلانتين ايه دا كلام سيس و حياتك انا لو ارتبط عمرى ما هحتفل بالفلانتين و لو احتفلت مش هجيب هدايا و عاجبها اهلا وسهلا معجبهاش متلزمناش”
- لو مرتبطة لازم الحياة كلها تتحول لاحمر فى احمر، البلوزة احمر و الطرحة احمر و لو مش محجبة هتصبغى شعرك احمر!
-
لو انت بقى مرتبط لازم الاحمر يكون موجود، قميص، كرافتة بس و حياة والدك بلاش البنطلون يبقى احمر و على فكرة البوكسر الاحمر لايدل على شىء بتاتاً !
-
لو فى اول زواجك بالذات اول سنة جواز قبل الاطفال و المدارس و الكلام دا احب ابشرك، هتحتفلى بالفلانتين بس طبعا معدل و منسوب الهدايا هيقل زى النيل كدا بالضبط. يعنى مثلا لو ايام الخطوبة كان ورد و شيكولاتة و ساعة يبقى كفاية الورد و الشيكولاتة و احمدى ربك .
-
طبعا كرجل متزوج و عنده مسؤليات مش بعيد تستغل الفلانتين دا فى استغلال اخر تماما بانك تطلب من مراتك الهدية تبقى ملابس داخلية كمساعدة معنوية في الظروف الحياتية.
-
مستمرين فى الزواج و الحمد لله كملتى 5 سنين من جوازك فاكيد يعنى مش هتحتفلوا بالفلانتين، الزواج و الفلانتين “do not mix” و هتحاولى تقنعى نفسك بان الحب ميكفوش يوم
-
انت بقى بعد 5 سنين لو فكرت تكلمك فى الفلانتين هتبقى الاجابة محفوظة، مختومة و مضمونة كمان و هى “اجيب منين، دا كان قبل الجواز مكنش فيه مصاريف مدرسة و دروس خصوصية و دكاترة و اكل و الخ… الخ..الخ..
-
بعد 10-15 سنة اظن خلاص المناعة قويت و اكتملت فهترجعى تانى لقواعدك سليمة و تشوفى الفلانتين دا اوووفر و المناظر الموجودة فيه “مُحن”.
-
اما بالنسبة ليك ايها الرجل الكريم مش بعيد تقلب مرة واحدة عم الشيخ و تقول الفلانتين بدعة و الفلانتين اصلاً حرااام.