في الخمسينيات من القرن الماضي، انتشر استخدام مصطلح “كاريزما” في المجتمعات الغربية، بعد ما تم استخدام المصطلح ده في العلوم السياسية وعلم النفس وعلم الإدارة، لوصف الزعماء وقادة الدول اللي بيتمتعوا بشعبية كبيرة  وصفات قيادية مميزة وبيتم اعتبارهم رموز خالدة.
كلمة كاريزما أصلاً مشتقة من الكلمة اليونانية “خاريزما” واللي معناها “هدية من الإله” .. بمعنى أن الإله بيمنح بعض الأشخاص جاذبية وحضور طاغي بتخليهم محبوبين من الجميع.
ومن بداية الألفينات تقريباً، بدأ العالم كله في استخدام مصطلح “كاريزما” وبدأنا نقولها بشكل تلقائي على أي حد بيعجبنا وبيأثر فينا بدون أي أسباب واضحة .. فنانين ورؤساء دول وشخصيات عامة .. وحتى بعض الأشخاص اللي بنقابلهم في حياتنا عموماً.
الشخص “الكاريزماتيك” بيمتلك قدرة غير عادية وغير مفهومة في الحصول على إعجاب الآخرين .. تحس إنها فعلاً حاجة ربانية بتخلي أي حد يفرفر قدامه، وممكن الشخص ده ميكونش بيمتلك أي من الصفات الظاهرية اللي بتخلي الناس تعجب بأي حد .. زي الجمال مثلاً .. هي حاجة كدة بتبقى زي الشعاع اللي كان بيطلع من عين محمد صبحي في مسرحية “تخاريف”
وعشان كدة .. وبرغم إن الكاريزما غالباً بتبقى حاجة من عند ربنا .. إلا إن أي حد ممكن يكون “كاريزماتيك” لو عمل شوية حاجات كدة .. هنتكلم عليها دلوقتي.

1- خلي اللي قدامك مرتاح في وجودك

1111
الناس اللي عندها كاريزما وبتخلي كل الناس تحبها .. هي الناس اللي تقدر تخلي أي حد مرتاح في وجودها .. أكتر واحد بيبقى محبوب في الشلة هو اللي بقية الشلة بتبقى مرتاحة معاه وبتبقى على راحتها وبتحس إنه مش واقفلهم على الواحدة وبيقفلهم.

2- خليك واثق في نفسك .. بس متبقاش “بجح”

8
الثقة في النفس من أهم الصفات بالنسبة لأي شخص ناجح .. ومفيش حد عنده كاريزما أو عايز يبقى “كاريزماتيك” مش واثق في نفسه .. بس في فرق بين إنك تكون واثق في نفسك وإنك تكون مغرور ومش بتعمل حساب لحد.

3- اسمع كويس

55
عايز تبقى شخص جذاب ومحبوب .. يبقى لازم تبقى مستمع جيد .. يعني لما أي حد يتكلم معاك تركز في كلامه وتتفاعل مع كلامه وتبص في عينيه .. مش تعمل نفسك سامعه وأنت مركز في حاجة تانية .. وباصص في حتة تانية.

4- ابتسم

 عايز تبقى جذاب وعندك كاريزما إزاي وأنت قافش معظم الوقت ومكشر وضارب بوز .. أي حد هيشوفك بالمنظر ده مش هيبقى عايز يتكلم معاك أساساً .. خليك مبتسم ابتسامة خفيفة دايماً وأنت بتتعامل أو بتتكلم مع أي حد.

5- شجع غيرك

2 لما تلاقي حد غيرك بيعمل حاجة كويسة .. حاول تشجعه وتحمسه إنه يستمر فيها .. حتى لو أنت مش قادر تعمل الحاجة دي .. ده هيسيب أثر حلو في نفس الشخص ده .. حاول تعمل ده مع كل الناس المحيطة بيك .. هتلاقيهم كلهم بيحبوك.

6- مجامل بس مش منافق

23 خليك مجامل وكلامك حلو ومتطلعش زلط من بوقك .. بس اعرف امتى تجامل وامتى تسكت .. عشان متبانش كداب ومنافق….في خط رفيع بين المجاملة الشيك والنفاق وده بيبان قوي في الكلام.
دي حاجات أساسية لو عايز يكون عندك كاريزما وجاذبية وتبقى محبوب من الجميع .. قولولنا رأيكم إيه في النصايح دي .. وأمثلة لناس تعرفوها عندها كاريزما