بلاش تعملي الـ5 الحاجات دول لو مش عايزة تطلقي

 الرجاله عبارة عن أطفال.. مات الكلام.. مش هنتناقش في ده.. بس الأزمة انه لما بيعمل حركات الأطفال وهو شحط كبير كده ده بيدي إيحاء للست أنه يا اما خاينين أو أشرار أو اغبياء.. بس في الواقع هما فعلا مجرد اطفال.. فنصيحة لو انتي متجوزة واحد بتحيبه ومش في خطط المستقبلية أنك تطلقي.. بلاش تعملي الحاجات دي خالص

• مش وقته

في ستات كده عندها كيف غريب أن أول ما جوزها يدخل الحمام ويقفل عليه.. ترجع لها الذاكرة وتفتكر كل الحاجات اللي عايزة تكلمه فيها وتسأله أسئلة مستفزة من  نوعية .. تحب تاكل ايه النهارده.. بجد صدقيني الحركة دي مستفزة للغاية حتى لو جوزك مش بيقولك وكاتم في نفسه.. مجتش ع الكام دقيقة دول استنى لما يخرج وبعدين استفردي بيه عادي

• أمه وصحابه خط أحمر

صدقيني.. أه أنتي بتسمعيه بيشتم صحابه في التلفون بابشع الألفاظ.. بس اللي متفهموش أن ده الدلع بين الرجاله.. وبالنسبة لأمه مفيش راجل في الدنيا هيسمح لمراته تتريق على امه.. ده غير أنه ممكن يروح يقولها وانتي اللي تلبسي في الحيط وهو هيفضل اللي على الحجر برضه ومش هتزعل منه مع العلم أن ما شتمك إلا من بلغك.. بس الأمهات عندها قانون كده أن  أبنها اكيد مش بيغلط.

• ما تترقيش عليه

مش بقولك أطفال .. وده ملوش علاقة إذا كان قدام حد و لالا .. حتى لو لوحدك أوعي تتريقي عليه لو عمل حاجة غلط.. أو وقع.. أو حاجة وقعت من ايده.. هتلاقيه اتهز كده وثقته مظبطش معاه وبعد شوية عشان يعوض الاحساس بالدونية دي هيقوم مزعقلك وعامل معاكي خناقة على اي حاجة عبيطة.. وطبعا ده يندرج تحت بنده أنكم لو لعبتوا حاجة تسيبيه يغلب.. معروفة دي!

• ماتغيظهوش بحد

أوعي.. صدقيني مش هتحققي مرادك بالطريقة دي.. لو فاكرة أنك هتخليه يغير عليكي ويحاول يرضيكي لما تشكري في راجل تاني حتى لو فنان في التلفزيون.. تبقى غبية.. بالعكس هيقلب عليكي وهيتفه من الشخص ده كل شوية ويتيرق عليه وهتحسي فعلا ان الموضوع قلب شغل عيال بشكل اوفر. وساعتها متلوميش حد الا نفسك لأنك انتي اللي بدأتي

• ما تعنديهوش

بلاش العند.. بقولك هو اصلا طفل.. لو انتوا علاقتكم من نوع انك لازم تاخدي أذنه عشان تعملي حاجة – ودي غلطتك اساسا ان شكل العلاقة يكون كده – فاختاري الوقت الصح اللي يكون مزاجه رايق فيه.. وادلعي عليه وحسسيه انك عمرك ما هتعملي حاجة إلا لما يكون موافق عليها وساعتها هتلاقيه بيوافق عادي.. مش تنقي الوقت الغلط – زي وهو في الحمام كده – ولما يقولك لك تقومي معانداه وعامله مشكلة وحتى لو ساعتها عملتي الحاجة دي هتكوني متنكدة يعني ماستفدتيش حاجة.

في البداية هتحسي أن الموضوع صعب وأنك بتعملي حاجة ضد طبيعيتك.. بس لما تلاقي في المقابل أن المشاكل بتقل هتحسي براحة وتكتشفي إنك وفرتي وجع دماغ كتير جدا على نفسك ومشاكل بدون سبب مقنع أو واضح.. وسيبيه يخرج مع صحابه يا ستي ويلعب معاهم بلاي ستيشن مش أحسن ما يقعد وياكل دماغك.