لو عمرك ما روحت محمية وادي الريان إللي في محافظة الفيوم يبقي لازم تقرا الكلام إللي جاي دي كويس وتعرف إن بلدك فيها أماكن حلوة ومش بعيدة ممكن تسمتع بيوم كامل فيها ومش هاتكلفك أكتر من 200 جنيه

 
1- وادي الريان موجود في الجنوب الغربي بالفيوم وده بيخلها منطقة دفا جداً حتى في عز شهور الشتا والشمس فيها حلوة زي شمس شرم الشيخ

wadi elrayan waterfall2

 IMG_1023

2- وادي الريان منطقة أمان ممكن تعمل فيها كامب إنت وأصحابك وماتبقوش قلقانين حتى لو مجموعة بنات مع بعض ، الناس هناك بتعامل الضيوف بمنتهى الحب والإحترام وبيخدموك زي الخمس نجوم

IMG_1016 

3- هايقبلك في الطريق وإنت رايح منطقة “جبال المدورة” ودي للناس إللي غاوية تسلق الجبال والناس إللي مجربتهوش برضو الطلوع والنزول فيها مش صعب والمنظر من فوق الجبل تحفه

wadi elrayan mountain

 

4- أول ما هاتوصل هناك هاتلاقي في استقبالك فطار فيومي أصيل ، فطير مشلتت ومِش وعسل أسود هاتاكلهم وإنت قاعد في مكان كل حته فيه من كراسي وترابيزات معملوة يدوي وهاتحس إنك في مكان غالبة عليه الطبيعية في كل التفاصيل

wadi elrayan eating

IMG_1015 

5- بعد كده تجري على الشلال ، منظر ممتع يتاخد فيه مليون صورة ، وسهل أوي إنك تنزل تحت الشلال وتعوم في المية بمنتهى الأمان

 wadi elrayan waterfalls

6- وشوية وتروح على شط البحيرة وتركب مركب خشب مع أصحابك وتأدف وحواليك أنواع من الطيور عايمة على وش المية وتعيش لحظة هدوء نادرة

wadi elrayan boat trip

 

7- وقت العصاري بقي تروح تعمل ” ساند بوردنج” أو تتزحلق على الرمال ، رياضة ولعبة ممتعة ومسلية جداً ، بس محتاجة خفة ولياقة ، وإعمل حسابك في لبس بديل تقضي بيه اليوم عشان هاتتغرق رمله

wadi elrayan sandboarding 

8- أول ما المغرب يقرب والشمس تبدأ تغيم هاتلاقي قصادك الناحية التانية الباراشوتات ، ودي تقريباً أحلى حاجة هناك ، المدرب المسئول هايقولك على خطوات سهلة أوي تعملها لو أول مرة تركب ، والباراشوت متأمن كويس ، هاتتصور وإنت طاير في الهوا فوق الجبال والشلالات ومستوى الطيور كمان ، هاتعيش دقايق  بإحساس مايتوصفش بجد

ملحوظة: الباراسيلنج خارج ال200 جنيه 😀

wadi elrayan parachuting

 

9- خلص كل ده وروح جرب ركوب الخيل العربي في أحضان الصحرا وإستمتع بالجري المطلق زي سباق الخيول إللي في الخليج

wadi elrayan horseback riding

 
10- الغدا هايكون مشوي على النار قدام عينك ، فراخ فيومي طازة ومشويات تانية كتير ، وهاتحبس بعدها بكوباية شاي معمولة على نار الفحم وإنت قاعد ع الرمله وبتريح أعصابك

wadi elrayan night bonfire 

كل الحكاية ساعتين زمن من القاهرة ، هاتروح بعيد عن الدوشة والزحمة وضغط الشغل أو الدراسة وإستعمال الموبايل وتستمتع بجمال الطبيعة إللي في بلدك وتجدد نشاطك وتظبط مودك