رمضان مش بس موسم الصيام والتراويح ولاالخشاف والكنافة والقطايف. في مصر، رمضان موسم الإعلانات. وطبعًا معروف أن إعلان في السنة ده مجهود كبير جدًا ومحتاج تحضيرات كتير وكدة.

بس السنة دي إعلانات رمضان الجميلة أثبتتلنا أنك لو محترف كفاية وفاهم انت بتعمل ايه ممكن تخلص إعلان كامل شاكب راكب في قعدة، ومن غير أي مجهود عادي.

عايزين تعرفوا إزاي؟

اتبعوا معانا الوصفة السحرية دي المكونة من ٨ خطوات بس. مستوحاة من نجاح إعلانات رمضان 2019، نتيجتها مضمونة وآثارها الجانبية محدودة؛ شركتك هتبقى نكتة بس مش أكتر.

1. وات إز كرياتيفيتي؟

بسم الله الرحمن الرحيم يلا يا جماعة بقى نجهز لإعلان رمضان السنة دي إن شاء الله نعمل حاجة حلوة كدة لسه في وقت. “بس رمضان الأسبوع اللي جاي”. ايه ده والله؟ طب خلاص يا شباب طلعولنا إعلان السنة اللي فاتت أواللي قبلها أواللي قبلها مش فارقة، ونغير فيه شوية حاجات وننزله قشطة. “بس كدة مش هيكون إختلف في حاجة!” ويختلف ليه بس لا إله إلا الله ما اللي نعرفه أحسن من اللي منعرفوش!

– نجوم مشاهير، مشاهير نجوم

معروف طبعًا لما تيجي تعمل اعلانات رمضان مش مهم انت بتعلن عن ايه، مش مهم انت مين، مش مهم مين جمهورك، ولا مهم عملت ايه قبل كدة. المهم نجيب نجوم كتيير كتييير كتيييير أو على قد ما البادجت تكفي يعني ونطلعهم كلهم في كادر واحد عشان الناس تقول واو بصوا ناس مشهورة وينبهروا بقى وكدة على أساس أنهم في بقالة مثلًا مش بيتفرجوا على التلفزيون عادي.

– طلع يا ابني النجم اللي احنا متعاقدين معاه من الفريزر

ومادام إعلانات رمضان يعني نجوم ومشاهير يجيب نخزن النجوم بتوعنا ونطلعهم كل سنة يعملوا نفس الحاجة بردو مش مهم! احنا مش ماضيين عقد؟ يبقى لازم نستنفذه للآخر والناس هتتفرج كدة كدة قشطة.

– أغاني، أغاني، أغاني

هو احنا هنقول ايه في الإعلان يا ترى؟ مش هنقول حاجة هنحط أغنية كلامها ملوش علاقة ببعضه ولا له علاقة بالمنتج بتاعنا ولا نغمتها جديدة، المهم تمسك في ودان الناس ونجيب شوية أجانب يرقصوا عليها. أقولكوا احنا نجيب أغنية أجنبي الناس بتحبها ونقول عليها كلمتين عربي والله الموفق والمستعان، أو نعمل نشيد وطني الأناشيد الوطنية بتجيب بردو. “بس احنا منتجنا ملوش علاقة بالوطن!” مش مهم احنا مش كلنا جزء من الوطن ولا انت خاين ولا عميل ولا ايه!

– ايه ده الله لمة وعيلة وكدة

رمضان شهر ايه؟ “الصيام؟” لأ طبعًا شهر اللمة والعيلة والفطار مع بعض وأجدع صحاب صحابي من صغري وكدة. معروفة يعني!

“أيوة يعني هنعمل ايه بردو؟” فاكرين النجوم الكتير اللي قوولنا هنصرف عليهم البادجت كلها؟ دول بقى هنجيبهم نحطهم على الصفرة مع بعض ونحط قدامهم أكل كتير وكركديه وطمر هندي بقى وكدة ونخليهم يضحكوا جامد ويتكلموا مع بعض والأغنية اللي احنا مألفنهاش دي شغالة فالخلفية واللوجو بتاعنا ينزلفي الآخر فالناس تتأثر بقى وتحس ان احنا بنعمل جو عائلي مؤثر لطيف. “بس احنا منتجنا ملوش علاقة بالعائلات!” الله احنا مش في رمضان؟ كل حاجة ليها علاقة بالعائلات انت مقطوع من شجرة يا ابني ولا ايه!

– معلش اتوصى بالنوستالجيا أصل بحبها أوي

طبعًا مفيش جو مؤثر أكتر من الحنين إلى الماضي فاحنا هنجيب نفس النجوم اللي خلصولنا أرباح الشركة دول ونطلعهم بقى وهما بيحنوا للماضي وأيام زمان بقى وكدة. ويا سلام بقى لو جبناهم وهما صغيرين مع صحابهم وكدة وهما بيلعبوا ويضحكوا والحاجات دي. ويا سلام يا سلام لو خادنالنا كام بيفور آند أفتر شوتس عشان الناس تاخد سكرين شوتس وتحطها على السوشيال ميديا وتحط قلوب بقى وكدة. كله طبعًا والأغنية العاطفية بتاعتنا المختلفة جدًا دي شغالة في الباكجراوند.

– هو احنا كنا بنعلن عن ايه؟

ايه؟ استنى كدة. مش كنا كومباوند باين ولا شركة اتصالات ولا غسالات ولا ايه! اللهم أصلي على النبي احنا كنا بنبيع ايه! محدش فاكر يا شباب؟ لأ؟ يلا مش مهم دي شكليات، المهم تعملوا اللي اتفقنا عليه ومتنسوش الأجانب اللي هنجيبهم عشان نبيع بيهم منتج مصري للمصريين.

-ميم ماتريال

تمام يا جماعة تم بحمد الله كدة احنا جاهزين ننزل بإعلانات رمضان السنة دي وأنتوا اللي كنتوا فاكرين مش هنلحق. يلا الحمد لله الإجتماع كان مثمر وإن شاء الله الإعلان هيبقى مثمر بردو كدة كدة! “ليه؟” عشان لو عجب الناس خير وبركة، معجبش الناس هيعملوا عليه ميمز والناس كلها تتكلم علينا فننجح أكتر. “بس ده مش مفيد للبراند إيمدج بتاعتنا!” ايه؟ يراند ايه وإيمدج ايه وكرياتيفيتي وكلام فارغ ايه؟ انت عمال بتقول كلام غريب من الصبح إطلع بره انت مش نافع في الشغلانة دي!

وها هي الوصفة السحرية المضمونة لعمل إعلان رمضاني ناجح في البيت، قصدي في السوق! يلا كل سنة وانتوا طيبين ورمضان كريم…