حمي مسلسل “لعبة العروش” مجتاحة العالم كله، الناس كلها بتستني شهر مايو كل سنة، وبتتفرج ع الحلقة كل أسبوع علشان تفضل تهري فيها لحد الأسبوع اللي بعده، ولما السيزون بيخلص، الناس بتفضل تهري م السنة للسنة، كل ويب سايتس السينما، الأخبار، التريقة والكومكس، بتشتغل، وسيرفرات التحميل بتولع كل سنة ف نفس السيزون ده، كل حاجة بتتجمد حرفيا لحد ما السيزون بيخلص، الزمن بيقف، لحد ما الحلقة بتخلص..!
في حياتي مشفتش حاجة عليها نقاش أو جدال أكتر من المسلسل ده، اللي واكل دماغ الناس، من أصغر واحد ف اخر نقطة في العالم، لحد “باراك أوباما” أكبر راس في العالم حاليا، اللي طلب بشكل شخصي من صناع المسلسل السيزون، وهو الوحيد اللي شافه لنهايته.! ماهو أكبر راس ف العالم بقي..!
الجنان بتاع GOT اجتاح العالم لدرجة ان فيه ناس بطلت تكلم صحابها عشان نشرو Spoilers للمسلسل، بل ان فيه دكتور في جامعة أمريكية شهيرة، دخل المحاضرة، سأل الطلاب قالهم: “مين بيحب GOT؟” طبعا تلات تربع المدرج رفع ايده، قالهم هايل، انا قريت الروايات، ولو سمعت أي صوت خلال المحاضرة هقولكم ايه اللي هيحصل لنهاية الرواية..! مش محتاجين نوصف طبعا المحاضرة دي ازاي كانت أهدي محاضرة في العالم…!
بما اني مؤمنة بأن الحاجة المينستريم لازم متتشافش، ولازم نرازي في خلق الله ونقول عليهم كلهم مبيفهموش حاجة، وبما اني كل ما بفتح أي حاجة حتي ولو حنفية المطبخ تطلعلي Game Of Thrones فقررت عملا بمبدأ “بيرازو فيا” الشهير اني أقاوم التيار، وأوريكم خمس حاجات تقدرو تعملوها عشان تخلصو من سيرة Game of Thrones اللي بيصدعنا كل سنة في نفس الوقت ده، وربنا ينتقم م الظالم بقي..!
1. الحاجة الأولي: اعمل Hide !
أول وأهم حاجة ممكن تعملها في تاريخك ترحمك من القرف ده كله، انك تقطع مع كل الناس اللي بتتفرج ع المسلسل ده، وده طبعا حل مش عملي، لأنك لو عملت كدة مش هتلاقي صحاب ليك أصلا، أو انك تريح نفسك وتعمل Hide From Newsfeed لكل وأي قلشة، كوميك، سبويلر للمسلسل ده، بالتالي هتشتري دماغك، وتضمن انك ميجيلكش صداع من المسلسل ده، بما انك أكيد مش مهتم تتفرج أو تعرف أي أخبار عنه، الله يخربيتك يا جورج يا ار أر يا مارتن مطرح ما نت قاعد..!
2. الحاجة التانية: اتفرج علي كورة..!
مالها الكورة ها؟ الكورة اجوان علي رأي الكابتن لطيف، عندك دوريات العالم كله، الألماني، الايطالي، الأسباني، الانجليزي، دوري أبطال أوروبا، كاس الاتحاد الأوروبي، اليورو اللي قربت تبدأ، علي الأقل الكورة حلوة، مش هتلاقي كتير بيحزقوا بسببها، وبسيطة وسهلة ومشوقة، ومش هتفضل تستناها م السنة للسنة وتتذل علي السيزون، وييجي عيل ميسواش تلاتة جنيه في الاخر يروح حارقهولك فتموت بحسرتك يا عيني، علي الأقل الكورة طازة بطازة، طيب مش عاجباك الكورة العالمية؟ عندك الدوري المغربي، الدوري السنغالي، اي دوري هيبقي شغال دلوقتي أرحم من أم المسلسل ده..!
3. الحاجة التالتة: اعمل أنشطة مفيدة في البيت..!
في الوقت الفاضي، اللي كل صحابك فيه متكومين ف بيت واحد منهم بيتفرجو ع الحلقة اللي نزلت جديد، انتا ممكن تتجه مثلا للدولاب بتاعك، استكشفه، طلع هدومك القديمة، البالطو اللي هتلاقي فيه ان شاء الله عشرين جنيه م الشتا اللي فات، بنطلوناتك وسكارفاتك ، كل الحاجات اللي انتا مكومها، أو مخبيها، من مامتك عشان متغسلهاش وتبوظها، او انتا تخنت عليها ومخبيها لحد ما تخس عشان تلبسها تاني، اعمل رحلة جوة الدولاب بتاعك، وهتلاقي فيه حاجات مثيرة ومشوقة أكتر من التنانين في GOT!
4. الحاجة الرابعة: خلص شغلك المتكوم..!
واجه الواقع المرير بأنك لسه عندك خمستلاف تاسك متأخرين عليك بسبب وحش ال..كسل الشرير، انا لو منك مش هسكت، وهستغل الوقت ده الي مديري فيه بيتفرج علي GOT وهخلص التاسكات دي وكأنه مخدش باله من حاجة، علي الأقل يا راجل تبقي كسبت بونط ف زميلك اللي سايبك وقاعد بيتفرج، وتبان انتا الموظف المثالي وغيرك مهمل وماشي ورا المسلسلات، مسلسلات ايه ياراجل و GOT ايه، اومال مين هيشوف مسلسل يسرا الجديد ف رمضان؟!
5. الحاجة الخامسة: خش نام..!
