منى المتيم

من غير ما أطول عليكم ، كنت قاعدة في مكان ما،  لفت نظري مشهد بيتكرر كتييير الأيام دي ، ألا وهو ” ولد بيحاول يشقط  بنت .. ويااااعيني البنت ولا هي هنا … زي ما بيقولوا كده عاملة نفسها من بنها “.. وفجأة في لمبة بتنور جنب نفوخي .. وفيها السؤال اياه …  تفتكروا  جدي وجدك كانوابيشقطوا بنات ازاي؟  

وبعد التفحيص والتمحيص والذي منه  … وكانت الإجابة؟!

الكلام :

أول حاجة الكلام ..  الكلام على أيام جدي وجدك كان مختلف خالص عن اللي بنشوفه وبنسمعه الأيام دي .. يعني زمان عمرك ما كنت هاتسمع يا مزة .. يا فورتيكه ..يا مدرعة ، وأكتر من كده .. سوري مش هاقدر أقول  بصراحة .

زمان كان آخرهم في الكلام .. يا حلو صبح … يا جميل مسي علينا ..ماتتقلش علينا اوووي كدة يا جميل …. واللي كان يقول لبنت .. يا غزااال .. مش بعيد كانت تعمله محضر تحرش ☺ ☺

الأغاني الرومانسية في البلكونة :

والوسيلة دي كانت بالنسبة لجدي وجدك السلاح الفتاك اللي يخلي اي بنت ترفع الراية البيضاء وتقع في حبهم من غير كلام .. ولازم يعلي الصوت على الآخر عشان البنت تسمع الأغاني وتعرف قد ايه هو عاشق ولهان .

وزي ما بقولك كده ، كام أغنية لمحمد فوزي وعبد الحليم حافظ والدنيا بتقي زي الفل .

التليفون الأرضي :

ودي كمان كانت طريقة من طرق المعاكسة زمان .. معاكسات التليفون الأرضي ، واللي كان مقطع السمكة وديلها أيامها ، كان بيتصل بالتليفون ويشغل أغاني رومانسية من غير ما يتكلم .

ممكن تجيبيلي الـ …. اللي وقع عندكم في البلكونة

ودي طريقة كمان جدي وجدك كانوا بيشقطوا بيها البنات … بيخترعوا أي حجه عشان يفتحوا كلام مع البنت اللي عجباهم .. يعني مثلاً لو الحظ  مساعدته شويتين يطلع ساكن فوق البنت اللي بيحبها ويرمي أي حاجه في بلكونتها .. وهنا تأتي اللحظة الحاسمة .. وتلاقيه جري ينتهز فرصه أن مامتها مش في البيت ويروح يخبط على الباب ويطلب الحاجة دي ..وساعتها بيقدر يتكلم معاها مرة تانية بحجه أنه بيشكرها يعني .

الجوابات في سلطانية الزبادي:

الجوابات كمان كانت من الافتكاسات – على أيامهم يعني – اللي كان جدي وجدك بيستخدموها عشان يشقطوا بنات، وكانوا بيبدعوا – على أيامهم بردوا – في توصيل الجوابات دي .. زي مثلاً يبعتوها مع أخواتهم الصغيرين، وكانت اشهر افتكاسه منهم .. انهم يبعتوها مع سلطانية الزبادي

من الآخر .. اللي عاوزه اقوله .. أن الناس زمان كان عندها حاجه مهمة أوووي اسمها ” الخجل ”  … كانوا بيعرفوا ازاي يعبروا عن مشاعرهم  بأدب ومن غير ما يضايقوا حد، ودي حاجة مهمة أوي احنا مفتقدنها جداً الأيام دي