اينعم البنات الطف الكائنات بس احنا مش سهلين برضه، احنا بالصلاة عالنبي نعرف القرد مخبي ابنه فين وبعد مانوصله نسيبه ونمشي ونقول مانعرفش ، احنا المخابرات فينا بس ربنا اللي هادينا ، احنا اقوى من نبيل الحلفاوى فالطريق الي ايلات واشرس من نادية الجندي في كل افلامها
ويا سواده اللى يعجبنا ونقرر ننخرب وراه ونجيب قراره وكل حاجه عنه ونشوف بقى هل يا ترى الولد ده هييجي منه ولا هيتزنق في الفريند زون .
1- لعبة بزل الاسماء
مش معنى اننا اتعرفنا في خروجه او بالصدفه يبقى مش هعرف اجيبك على الفيسبوك ، لا يا بابا صحصح وفوق ده مايجيبها الا ستاتها ومن هنا بتبدأ اول خيوط مغامره قفش الاكونت واحنا كبنات عشان بنحب الاصعب دايما وبنحب نتعب في الحاجات ولاننا عارفين اسم الولد الاولانى بنفضل نسيرش وننجم بكل الاسماء الممكنه عشان ندور على الاكونت بتاعه وفي حاله انه ناصح وفتك وصايع وكاتب nick name بنضطر نروح للفريند ليست بتاعه الحد اللى عرفنا ببعض ونجيبه برضه .
2- مرحله ما قبل الـ add
فكرك انت اول ما هلاقيك هعملك add لا ده انت ساذج اوى صحيح اومال مين هيدور ويبحث في تاريخك الاسود كله بدايه من الصور لتاريخ الميلاد لمرتبط ولا لا ومين الصحاب المشتركين ايه الافلام المفضله وهكذا المزيكا وكل البوستات من يوم ما قولت يا فيسبوك وكافه الاكونتس التانيه تويتر وانستجرام وكله .
3- الصحيفه الجنائيه على Google
دى مرحله البحث عن الماضي والحاضر والمستقبل دى مرحله البلوره المسحوره اللي بترمى فيها اسمه وتشوفي انتى وحظك عليه جرايم او مشهور او نشاطاته وبلاويه ربنا يخليلنا جوجل الاب والام الروحيين للبحث في تاريخك المشرف او الماضي الاليم .
4- الـComments بدايه الخيط
مرحله انك عايزة تعرفي طريقته في الكلام وافيهاته وتقييمه اذا كان شخص دمه خفيف ولا دمه تقيل بتيجي لما تدعبسي في كومينتاته وردوده على اصحابه وتعليقاته على صوره وصور اصحابه وصحاب صحابه اذا لزم الامر ، المرحله دى بيبان مين صحابه المقربين وبيبان ما اذا كان في اعجاب او استلطاف او حب بينه وبين واحده ووقتها هتخشي عندها وتشوفى مدى العلاقه هل متطوره داخله لا قدر الله على خطوبه وجواز ولا مجرد استلطاف ونزوه عابره انشاء الله .
5- الاهل
طبعا لو حاطت حد من اهله هتخشى تاخدى لفه فى اكونت امه وابوه واخواته ومرات عمه وولادها بردوا عايزين نشوف العيله والمستوى الاجتماعي ، العيله عندها كام تاكسي وكام ميكروباص ونطمن على مستقبلنا هلى هندفع ونتدبس في العزومات ولا هيدفع هو .
6- الانستجرام
وطبعا زى ما احناعارفين الانستجرام حاجه وصور الفيسبوك حاجه تانيه ولكل مقام مقال ، النايت لايف هتظهر على الانستجرام انما الفيسبوك للعيله وللاصدقاء الملتزمين ، تخشي بقى على الـ followers وتشوفى بقى البنات اكتر ولا الولاد هل لا قدر الله عامل فولو لبروفايلات مشبوهه ولا كله فالسليم .
7- Follow ولا add
بعد بقى كل المراحل الدراسيه الاستخابراتيه دى هيقف السؤال حائرا في حاله انك لقيتيه سنجل هل اعمل فولو ولا add طبعا الغشيم هيقولك اعملى add بينما انا رايي الشخصي وحفظا لماء الوجه اعملى فولو رد على الفولو بـ add توكلى على الله انما عمل نفسه من بنها يبقى فكك انما فيه بنات قلبها مين وفيه ولاد كتير بتحب قوى يتخطفوا ، القرار ده بتاعك فالاخر عايزه تخطفيه يبقى add عايزه تظهرى من بعيد لبعيد يبقى follow
