من فترة نشرت زميلة لينا مقال باسم (مميزات الارتباط بمصور) وانا حبيت ارد عليها من منطلق ان حق الرد مكفول لو كنت مصور
إليكم أشهر خمس حاجات بتحرق الدم بيقولها الناس لأي حد شايل كاميرا..!
-
ايه ده معاك كاميرا؟ بتعرف تصور؟
اجابة السؤال ده طبعا علي شقين: “ايه ده معاك كاميرا؟” والاجابة تكون “لأ، دي تلاجة” والشق التاني هو “بتعرف تصور؟” والاجابة هي “لأ، جايبها عياقة”، بجد أسئلة عجيبة، أكيد مش هاجيب كاميرا وادفع فيها دم قلبي عشان مبعرفش اصور، طب ما أصور بكاميرا موبايل وخلاص..!
-
تعالي صورنا ببلاش…!
الأسطورة التانية الي محتاجين نحطمها يا حبايبي هي “التصوير أبو بلاش” أكيد انا بما اني مشتري كاميرا، وأكيد بعمل بيها شغل، ف مش معني كدة انك كصديقي تستقطعني وتطلب مني أصور ببلاش، الكاميرا دي بتتكلف فلوس كتشغيل، والصور بتاخد مجهود ف التعديل والريتاتشنج، ف مش معقول هضيع كل مجهودي عشان أجاملك، خلي فيه تقدير لصديقك الي فضي نفسه واداك جزء من وقته.
-
الصور فين يا معلم..الصور فين يا فنان
أغلب الشباب والبنات اللي شايلين كاميرا للتصوير، عندهم وظايف تانية، ان مكانش التصوير مثلا لمجلة أو وكالة أنباء دولية هو فعلا شغلتهم الأساسية، ف لو هو تكرم مشكورا وصورك انت وصحابك، او جالك الفوتوداي ف الكلية وانتو ملطخين نفسكوا ألوان يا ولاد ال…لذينة، وصوركم، انكم تبقو عاوزين الصور تاني يوم، هو مش سلق بيض، سيبو البنت أو الراجل يطلع شغل يليق بمستواه، وده يدخلنا علي طول ف النقطة اللي بعدها.
-
ايه ده، هو لازم تحط توقيعك ع الصورة؟
واجابة السؤال ده ممكن تكون شتيمة بس هنعديها ، أكيد لازم يحط توقيعه ع الصورة، ورقم موبايله كمان، اومال هو كمصور بروفشنال هيتعرف منين انه بيصور؟ منين هاه؟ هينزل اعلان ف الأهرام؟
ياريت نحترم حقوق اللي بيصورو شوية، ومنعملش Crop لل Logo بتاعهم من الصور، عشان بكدة بتضطروهم يحطو اللوجو ف وسط الصورة، وابقي قابلني لو عرفت تشيله 😀
-
اعملي فوتوسشن علي شريط القطر..!
وطبعا السؤال ده تحت شعار “الابتذال ملا الشوال” مش لازم يا جماعة كل الناس تتصور علي شريط القطر اللي ف المعادي، مش اجباري، ومش اجباري وانت بتتصور يكون معاك واحد صاحبك لابس بنطلون جينز أحمر، وعامل قصة عرف الديك، بلاش مناظر مؤذية، فيه مليون مكان تتصور فيه، انت ممكن تتصور ع القهوة بس الصور تطلع مختلفة وجميلة، الفكرة ف العدسة اللي بتلقط، مش ف المكان…
