رمضان جه، فات نصه تقريبا ، أيام صعبة وسط الحر والرطوبة والشغل والمناهدة والتعب، بعد سنين طويلة من الخبرة في الفرجة ع التليفزيون، قررت النهاردة اني أوهب ليكم عصارة خبرتي في الفرجة وسط الاعلانات ع التليفزيون، وده حصل بعد حادثة كدة، حصلت في رمضان م الرمضانات، لما كنا بنتفرج علي مسلسل “الخواجة عبد القادر” ومرة واحدة المسلسل راح فاصل، قد ايه؟ حوالي ساعتين تقريبا، اعلانات بشكل متواصل، وقتها قررت اني أغير ستايل حياتي..خصوصا ف رمضان..!
ازاي تعرف تتفادي الاعلانات؟ خلينا نشوف مع بعض بطرق بسيطة وسهلة ازاي نعرف نتفادي الاعلانات..!

 

  1. تجنب وقت الفطار

tameem1

أكتر وقت بيكون فيه ضغط اعلانات ع القنوات، هو وقت من بعد آذان المغرب لحد الساعة عشرة تقريبا، الفواصل بتكون بواقع ربع ساعة من الفواصل مع سبع أو تمن دقايق من المادة المذاعة، ف حلقة المسلسل اللي بتاخد تلاتين دقيقة بتتعرض ف ساعة وربع، وهكذا، ف حاول وقت الفطار تسمع النقشبندي، تشغل قرآن، انتا كدة كدة مصدع م الصيام، ف مش ناقص الاعلانات..!
  1. العالم منتهاش في القنوات المصرية..!

tameem2

القنوات المصرية عامة مفيش فيها احترام للمشاهد بتاعها، والمسلسلات المصرية بتتباع لأكتر من جهة، ف مثلا ممكن تشوف مسلسل مصري علي قناة “ليبية” أو قناة “تونسية” والقنوات دي نسبة الاعلانات فيها ضعيفة جدا، لأن أغلبها قنوات حكومية، واللي منها بيذيع اعلانات بتكون حاجات بسيطة جدا، حاول تدور علي القنوات دي وصدقني هتنبسط جدا 😀
  1. في الاعادة الافادة..!

tameem3

عزيزي المشاهد مش عاوزة أصدمك وأقولك ان المسلسل بيتذاع وبيتعرض تلات مرات في اليوم علي أي قناة بيتعرض عليها، ف حاول تنقيلك وقت كدة يكون محدش بيشوف فيه التليفزيون زي مثلا الضهر، الصبح بدري، وظبط منبهك وقوم اتفرج، منتا اللي غاوي مسلسلات بقي وحابب تتفرج
  1. اليوتيوب موجود..!

tameem4

عندك أنترنت؟ عندك كومبيوتر؟ مبروك انت من المحظوظين اللي ممكن يتفرجو ع المسلسل أونلاين بعد ما يتعرض ع التليفزيون بدقايق، شاهد دوت نت بينزل الحلقات أول بأول و HD  واليوتيوب موجود، وكل قناة بتحط المسلسلات أول بأول ع التشانلز بتاعتها

 

وطبعا فيه حل سحري لطيف انك تستني بعد رمضان وتتفرج ع المسلسلات عرض تاني وتالت، وقتها مش هتلاقي حتي حراز العطار بيعمل اعلان ف وسط المسلسل، بس نقول ايه، الظاهر ان الصيام مش بيتقبل إلا بالكنافة والقطايف والمسلسلات العربي