أخدت ختم الخروج من سلطات مطار القاهرة بتاريخ 3 يونيو اللي فات، أول ختم خروج آخده علي جواز سفري من ساعة ما طلعته، بصراحة، أول ما نزلت مطار أبو ظبي، لقيت نفسي زي “فلاح في الكونجرس” بالظبط، قروي ساذج بهرته أضواء المدينة، ودي مش مدينة بصراحة، دي كوكب تاني..!
في المقالة دي، حابة أرصدلكم أهم سبع ظواهر شفتها في أبو ظبي، وجدير بالذكر انها ظواهر تافهة جدا، بس كلها كوميدية..!

 

  • التاكسي مبيقولش لأ..!

download (11)

سبحان الله، أول حاجة احتكيت بيها هنا لما نزلت من مطار أبو ظبي هي خدمة “التاكسي” سبحان الله، أول ما بتركب التاكسي، بتشوف عداد مفتوح، تاكسي مكيف، واسع، السواق بيعاملك بكل احترام، والشئ المثير للجدل ان التاكسي بيبقي واقف، وانتا بتركبه، وبعد ما تركب، بتقوله انتا رايح فين، بعد كدة بيفتح العداد، وبيتحرك..!!!
في أول يومين هنا، كنت بفتح الباب واقوله انا رايحة فين، يقولي: اوكاي، أركب العربية، طبعا بعد ما اتهزقت من زمايلي ف الشغل، وقالوللي حدانا ف الامارات سواق التاكسي لو رفض يركبك بتتسحب منه رخصته.!
  • كله بالطابور

hang

وقفت علي محطة الباصات، لقيت الناس بتطلع الباص بالطابور، مفيش حد بيدي حد بالكوع، ولا واحدة بتطلع ومعاها ست عيال ف الباص، وبتدفع تذكرة واحدة، لا، مفيش الكلام ده، الناس هادية وهي بتطلع وهادية وهي بتنزل…ومحترمة سبحان الله..!
أروح السوبر ماركت أشتري حاجة، ملقاش ناس تزاحم، وتضرب، أقف علي لاين السينما اشتري تيكت الاقي الناس واقفة محترمة..! حاجة تزهق..!
  • في الموقف يا حبيبي

130218906011292572620X300

الشئ المثير للجدل هنا في أبو ظبي، وفي الامارات اجمالا ان التاكسي غير مسموح ليه بالوقوف ف أي مكان كدة، فيه أماكن مخصوصة ومعينة للانتظار، في أوقات الرحرحة بتلاقي التاكسيات واقفة Line  بردو، مفيش فايدة النظام في كل مكان، وطبعا الباص مبيقفش ف كل مكان، ولا تشاور للسواق يقفلك والكلام ده لأ، أصلا هو لو وقف ف غير الموقف هيلبس غرامة محترمة
  • اشارة المرور..بتقولنا انتباه..!

hqdefault

الفنانة “ليلي نظمي” زمان كانت عاملة أغنية بتقول “أشارة المرور، بتقولنا انتباه، اتجمعوا طابور، عند عبور المشاة” أغنية كدة من ثمانينيات القرن الماضي، مكنتش فاهمة ليها أي معني إلا لما ربنا كرمني وسافرت، فهمت يعني ايه مينفعش تعدي من وسط الشارع، ومينفعش تعدي والاشارة مفتوحة وتلعب بخت مع العربيات، ومينفعش تعدي غير من خطوط عبور المشاة، وان فيه أنفاق أو كباري عبور مشاة لو عملت فيها فكيك وعديت من تحتها فيه “شرطي” هيوقفك، وهيغرمك كأنك عربية كسرت الاشارة بالظبط
  • مولات ياما يا هبة..!

destinations-abu-dhabi-mall-hero

اول سؤال غبي جه ف دماغي بصفتي كائن عشوائي هو  “محلات الملابس فين؟” و”سوق أي حاجة فين؟” وكانت الاجابة الاسطمبة الي بسمعها من ساعة ما جيت: “في المول”، المول فيه كل حاجة، من أول منتجات الألبان، مستحضرات التجميل، الميكاب، كراسي المساج، ولو دورت شوية كمان جوة ممكن تلاقيهم بيبيعو حيوانات أليفة..! اما فكرة الاسواق الشعبية وما الي ذلك فهو منعدم
  • الGPS شغال..!

1434095814544

بصفتي عشت خمسة وعشرين سنة ف مصر، ف الGPS  ده كان اختراع بيطلع في الأفلام، وبنستعمله عشان نشوف بيتنا م الخريطة من فوق..! لكن الموضوع هنا عكس مصر تماما..! انا بفتح الGPS  وبسيرش علي مكان، وبشوف الDirections  وسبحان الله..بوصل..!
حضرني مرة موقف، كنت في المعادي بحاول اوصل لمكان معين، الGPS   كان بيشاورلي، أروح للDestination  ولما اوصل يروح السهم متحرك لمكان تاني، لفيت حوالين نفسي أربع مرات بسبب ان الاختراع ده عطلان في مصر..!
  • مفيش متحرشين.!

734

آخر وأهم نقطة، انا كان المعاد الرسمي لرجوعي البيت تقريبا عشرة بالليل؟ بالظبط، ولما كنت بحاول ارجع البيت في الوقت ده، كانت العيون بتبصلي باعتباري واحدة مش محترمة بتيجي بالليل متأخر ف قشطة يلا نبص عليها ونقرفها ف حياتها..! المثير للجدل هنا ان مفيش واحد من ساعة ما جيت من أسبوعين وأكتر سمعني كلمة واحدة، او حتي حط عينه علي جسمي..! مفيش سواق تاكسي بصلي بصة مش كويسة…ولا واحد معدي بصلي ورمي كلمة وخلع…! انا فعلا حاسة بانبهار..!