بما اننا كمصريين، معندناش كوميكس نعمل منها أفلام، ولا أساطيرنا الشعبية محدش غالبا هيتفرج عليها ، والكوميديا هي سيدة الموقف سواء كشعب أو كفن، ف النهاردة قررت أجمع ليكم كوليكشن من السوبر هيروز المصريين، اللي ممكن ميكونش شكلهم حلو ولا أذكياء، بس بيعملو حاجات كويسة في الاخر، زيهم زي أي سوبر هيرو، معلش احنا مش أقل من باتمان، ولا سوبر مان، ولا أكوا مان، ولا أي مان م المانات، وعذرا هوليوود، المصريين قادمون 😀
-
سلطان “غبي منه فيه”
هاني رمزي قام بدور تاريخي لما عمل دور “سلطان” في فيلم “غبي منه فيه” برغم ان الفيلم وقت عرضه منجحش تماما، لكن بعد اعادة عرضه في التليفزيون، اكتشفنا وجود قنبلة كوميدية، بحسب تعريف كلمة “الأنتي هيرو” ف التعريف تماما بيتطبق علي سلطان، لاهو جان، ولا هو ذكي، ولا هو أي حاجة، بس في النهاية بيسعي عشان يعمل الحاجة الصح، ويرجع الفلوس لاصحابها.
-
القرموطي “معلش احنا بنتبهدل”
الحاج القرموطي، ماي فيفوريت هيرو فور أول زا طايم، دايما باحب القرموطي، لأسباب كتير، القرموطي راجل مكافح، أب حنون، مع انه ناصب علي نص نزلة السمان، وكداب كدب الإبل، وبيسوح وحيد، وبيخرب الدنيا، بس ف الاخر بيرجع بكل شجاعة بيروح يجيب وحيد م العراق، وأظن الرسالة وصلت 😀
-
حزلقوم “لا تراجع ولا استسلام”
تالت “أنتي هيرو” معانا هو حبيب الجماهير، كائن الحزلقوم، الشئ اللي أي كعب جزمة بيفهم عنه، وأيمن ابن أحلام كراوية عامله خورم ف دماغه، حزلقوم برغم غباوته الشديدة إلا انه بيحب مامته جدا، وبناءا علي الحب ده بيتصرف وبيتحرك، وبينقذها وبيقبض ع العصابة، وده بيدينا مثال انك مش لازم تكون ف ذكاء أينشتاين عشان تكون قلبك أبيض.
-
عبود “عبود ع الحدود”
بطلي المفضل بين كل الأبطال، هو عبود، عبود اللي دخل الجيش غلط، وعنده التصاق، وكان عايم في بحر من المخدرات ومش هامه حاجة، برغم ان ابوه راجل عسكري وشديد إلا انه طالع بايظ، تخيل واحد ف حجم “علاء ولي الدين” وأخلاقه بايظة، لكن في النهاية بيستعيد روح الصاعقة، وبيقبض علي “تاجر المخدرات” وبيكسب احترام وثقة والده من جديد.
-
اللمبي “اللمبي”
بطل الحارات الشعبية، ظروفه صعبة، كل الناس عليه، الحكومة أخدت عربية الكبدة بتاعته، بس مفيش ولا حاجة م الظروف دي وقفت اللمبي انه يعمل فرحه، وكل الكفاح ده تكلل بالنجاح لما لقي الكراسة الصفرا ، وعمل الفرح واتجوز نوسة وخلفوا وعاشوا ف تبات ونبات..!
-
عصفور “الرجل العناب”