إذا تخرجت من الجامعة- بعد أربع سنوات من الجلوس على رصيف الكلية- وحان الوقت لشق طريقك في الحياة، ربما لا يجب عليك التفكير طويلا، فمكانك محجوز ضمن أي “شغلانة Mainstream”!
وإذا كان موضة قبل نحو 20 عاما هي “Internet cyber” و”السنترالات الشعبية” هي استثمار الشباب المفضل، فالوضع الآن تغير، فالآن لديك خمسة وظائف لن يكون عليك تأهيل نفسك لفترات طويلة حتى تصبح أحد روادها.
• “حمادة.. فوتوغرافي”
من الحاجات اللي انتشرت بكثرة في الفترة الأخيرة، وجود عدد كبير من مصورين الفوتوغرافية وللأسف أغلبهم ليس لديه أدنى خبرة أو معرفة بأساسيات التصوير، فمجرد شرائه لكاميرا والتقاطه بعض اللقطات في الأزهر بارك، أو شارع المعز لأصحابه وإنشائه لصفحة على الفيس بوك تحمل اسمه “Hamada Photography” من هنا استطاع أن يحصل على لقب مصور.
• “SoSo Accessories designer”
ممكن تبقي مصممة اكسسوارات في 3 خطوات بس، أول خطوة تروحي الحسين تشتري شوية خرز وسلاسل، تاني خطوة تبدأي تعملي شوية سلاسل وbracelets بالخرز اللي جبتيه، أخر خطوة هي أنك تصوري شوية الحاجات اللي عملتيهم دول وتعملي صفحة على Facebook تسميها “SoSo Accessories designer” وتحطيهم عليها، وبكده هتكوني مصممة اكسسوارات قد الدنيا وهتحسي إنك بتقطعي على عزة فهمي ذات نفسها.
• “هي بتشتغل موديلــــــــز”
وعلى رأي المثل “نص البلد بقت فوتوغرافي والنص التاني موديلز” أي واحدة ممكن تبقى موديل ببساطة جدًا، مجرد أن يصورها أي شخص معاه كاميرا، فهي كده استطاعت اقتحام عالم الـ modeling حتى لو معندهاش مميزات وسمات الموديل.
• Make-Up Artist
لو كنتي من البنات اللي بتحب الشخبطة ع الوجه، إذا ده مكانك المناسب، من غير ما تاخدي أي كورسات أو تدرسي حتى الموضوع، ابدأي اشتغلي على صاحباتك البنات ومكيجيهم في فرحهم وخطوبتهم، وكعادة أي شخص لديه رغبة في الشهرة ولانتشار، قومي بإنشاء صفحة على Facebook لنفسك، وخليكي فاكرة كل لما تزودي المكياج أكتر وتخلي صاحبتك شبه البليتشو أكتر كل ما هتتشهري أكتر.. وطبعًا بعد ما توصلي ل 2000 معجب.. جهزي نفسك لعمل كورسات ميكاب هتكسبي فلوس من الهوا.
• “شاعر الجيل”
وجع البنات.. لو عايز تكون شاعر بصحيح ويبقى عندك معجبين بالآلاف اكتب عن وجع البنات، وازاي هي دايمًا مجروحة وادايمًا قلبها مكسور.. اوعدك أنك هتنتشر بسرعة البرق، بس الأكيد إنك في وسط ده كله ماتنساش القافية، لازم كلامك ينتهي بنفس الحرف عشان يتقال عليك شاعر بروفيشنل.
