ازيك عامل ايه؟ اخبار الشغل و كده ايه؟ احنا آه لسه متقابلناش و ممكن منتقابلش اصلا بس انا حبيت يعني اكتبلك حاجات نتفق فيه على شوية اساسيات كده
-
مش هقدر اقول لمامتك يا ماما
اصل بص انا ماما حملت فيا و خلفتني و غيرتلي و استحملت قرفي سنين فهيبقى ظلم اوي ليها اني اخد منها اللقب اديه لمامتك. مامتك على عيني وراسي لو طيبة هحبها واشيلها فوق دماغي ولو خبيثة هستحملها برضه بس موعدكش اني هقدر اكون صاحبتها برضه.
-
بلاش فرح و النبي
ليه نعمل فرح نصرف فيه كل الفلوس اللي حوشناها ، عشان نتصور فيديو نصه صورة ثابته لينا و انت بتبوسني على دماغي والناس يقعدوا يتريقوا علينا ! لما ممكن نسافر بقى ونتفسح و نشم هوا نضيف في اول ايامنا سوا.
-
مش هنكد عليك لما تخرج مع أصحابك
ده وعد مش هخلفه ولا هخنق عليك اقولك انا زهقانه وانت على طول بره، بس في المقابل انا انسانة اجتماعية وليا اصحاب برضه احب اشوفهم يعني وكده.
-
مش لازم كل جمعه نروح لأمهاتنا
اصل ليه في الويك اند ما عندنا يوم التلات يوم جميل في نص الأسبوع، الجمعة ده اتعمل للأنتخة والفرجة على الأفلام او اننا نخترع اختراع في المطبخ ويبوظ ونطلب ديليفري.
-
مش هقارنك بظافر العابدين ولا اياد نصار
انا عارفة كويس اني مش دره يعني ولا جنيفر انستون وعارفة ان اصلا ظافر العابدين وإياد نصار مش كده في الحقيقة بس تعالى نوعد بعض اننا لو كرشنا بقى وبقلظنا ننزل جيم او نلعب insanity في البيت او يا سيدي اضعف الإيمان نروح نتمشي في مركز التنمية.
-
هتعلم Play Station
مش عشان اقعدك جمبي ومتنزلش والجو ده لأ، اصل عيب اوي اما ابقى شحطة كده ومش بعرف العب يعني وبعدين ممكن نلعب على غسيل المواعين *ضحكات شريرة*
-
مش هفضل اكتب رمضان احلى مع جوزي، العيد تحفة مع حبيبي، مش هقدر
اصل بص هقولك حاجة احنا اصلا بطلنا يجلنا الExcitement بتاعة العيد ورمضان من ساعة ما بطلنا نبيت لبس العيد جنبنا على السرير، هو طبعا انا مبسوطة اننا مع بعض بس خليها بيننا وبين بعض
-
تعالى معانا الGraduation او حفلات المدرسة بتاعة العيال معلش يعني
اصل هقولك حاجه احنا بعد مانطلع معاش ذكرياتنا مع ولادنا هي اللي بقيالنا الميتينج والإيميل اللي هيتأجلوا هننساهم اخر الاسبوع
-
هسيبك تتفرج على الماتش