العيدفرحة ومااااااء،لالا،ماء دي بتاعة العيد التاني،العيد ده بتاع اللحمة، الخرفان،  العيد الكبيييير أوي، الي المفروض انه يوم بس الناس خلته أسبوع قهر كدة، المهم:
بما اننا مش زي أي بلد في العالم،عمرنا ما هنبقي زي أي بلد،لأننا “أوم الدونيا” فلازم العيد عندنا يكون غير، العيد عندنا مختلف كومبيلتلي، لازم يكون ليه أمارات وعلامات، وأي بنت بتقعد فالبيت فالعيد ومش بتنزله تعرفانا بتكلم فايه كويس..المهم خلينا دلوقتي ندخل فالمفيد ونشوف كدة، ايه هي العلامات الخمسة دي اللي انا مصدعاكم بيها مالصبح وبارك الله فيما رزق

العلامة الاولي: اللحمة..!

4047257484

بيتميز العيد الكبير بحاجة جميلة جدا، ألا وهي وفرة اللحمة في البيت، ف تلاقي ع الفطار، لحمة وفتة، ع الغدا، رقاق باللحمة الضاني، ع العشا حاجة جديدة خالص: لحمة مشوية، وهكذا، الناس بتنغمس في اللحمة لحد ودانها وكأن اللحمة مكانتش موجودة قبل العيد، أيوة انا فاهمة انك بتحتفل وانك ضحيت، بس انت كدة بتضحي بنفسك مش بتضحي بالخروف، مفيش حد يقدر يعيش بكم اللحمة ده بعد كدة أبدا..!
طبعا بما اننا غاية في التدبير المنزلي، ف كمية اللحمة الي بيشتروها ف العيد عادة ما بتقعد شهرين ف الديب فريزر بعد كدة والحاجة بتفضل تزغطكم لحمة، لدرجة انك ممكن تجيب كشري ديلفري من شوقك للأكل النباتي..!

العلامة الثانية: السفر..!

3

تفتكر كام مرة قعدت في البيت بالاكراه عشان صحابك مسافرين البلد في العيد؟ كتير..! فيه ناس عندها السفر في العيد طقس مقدس،
فيه موضة انتشرت مؤخرا نتمني انها تستمر وتنتشر وتتوغل ألا وهي: السفر للبحر في العيد، ودي حاجة كويسة جدا لو تعلمون، لأنك كدة بتغير جو  وبتشوف البحر، قبل ما تترمي ف مطحنة الشغل، سافرو في العيد يا جماعة، انبسطوا
بس حتي دي بقي صعب تلاقي مكان تروحه متلقيهوش زحمة …وفالاغلب هتلاقي كل الناس اللي تعرفهم فالسفر وياسلام لو هما الناس اللي بتحبهم او خفاف علي قلبك

 

العلامة الثالثة : الأفراح..!

4

زي ما شهور الصيف مواسم للتزاوج بين الذكور والاناث في مصر، مواسم الأعياد برضه بتعتبر سبوبة لأصحاب قاعات الأفراح والفنادق؛ انا مش هتكلم كتير علي الجزء ده، بس عاوزة كل واحد يقولي هو بالظبط اتعزم علي كام فرح عشان يعمل حسابه وينقسم ميتوزيا عشان يحضر كل الأفراح دي مع بعض، لأن الموضوع ده للبنات كارثة…
انتا فاهم يعني ايه بنت تتعزم علي تلات او أربع أفراح في أيام العيد؟ يعني كل فرح فستان، وكل فستان باكسسوارات، وكل فستان ب بشوز وبورتوفيه، وميكاب، وميكاب آرتيست، دي كارثة محققة علي البنت ، وربنا يبارك للجميع..!

 

العلامة الرابعة : الملل..!

5

الصديق الصدوق لكل شاب ولكل فتاة مصرية في أيام العيد، بعد حضور الأفراح، انت بتلاقي نفسك بقيت ياعيني أشلاء انسان، معملتش أي حاجة مفيدة في العيد، ومجرد قاعد قدام التليفزيون، تقلب يمين تلاقي مسرحيات منتهي الاسفاف، نفسي أفهم ايه علاقة العيد بالمسرحيات المسفة..! تقلب شمال تلاقي فيلم “أفريكانو” عرض أول علي القناة الأولي، تفتح الراديو تلاقي “سعد نبيهة” ف ودانك..!
طبعا بعد كل ده هتقولي ليه ملل ..ماهو طبيعي مدام قاعد فالقاهرة ومسافرتش مش هتعرف تخرج عشان العلامة الخامسة للعيد في مصر هي …ألتحرش