مين قال الرجالة مبتعرفش تحب, هو اه حبهم بيختلف عن حب المرأه – بس ده ميمنعش انهم “لما” بيحبوا بجد بيبدعوا في حبهم لدرجة تخليكي مش مصدقة ان في رجالة ممكن تبقي كده, و العلامات اللي هاتلاقيها في الراجل اللي بجد بيحب, هاتلاقيه بيعملها و هو مش قاصد, لانه بيعملها بدافع الحب و بس و بيحس ان اللي بيعمله ده طبيعي و مش كفاية كمان
مهما طال الوقت هايفضل يحبك
الراجل اللي بيحب بجد, مهما عدت سنين و شاف من مغريات مش هايحب غير واحدة – حتي لو قابل و شاف و دخل ناس في حياته مش هايكون في قلبه غيرها.
اوعي مثلا تقتنعي براجل اتجوز و خلف و يقولك اصلي كان لازم اتجوز – او اوعي تصدقي الراجل اللي يقولك اصلي كنت بحبك من زمان و متكلمتش و كمل حياته عادي… الراجل لما بيحب بيحارب عشان يوصل للست اللي بيحبها و مهما عدي الوقت مبينسهاش… كتير من الشعراء و الرجالة اجمعوا ان الراجل ممكن يعشق في دقيقة, بس بيحتاج لسنين و سنين عشان ينسي ست موجودة في قلبه و بيعشقها.
رجال افعال لا اقوال
هاتلاقي الراجل لما بيحب بينفذ وعوده ليكي لانه ببساطة عايز ينفذها.. لو قالك هاسعدك, فعلا بتلاقي نفسك سعيدة و مرتاحة معاه – لو قالك هايعمل حاجة بيعملها حتي لو الظروف اللي حواليه مش مساعداه – و بتلاقيه كمان من غير ما يتكلم بيعمل حاجات انتي محتاجاها و هاتلاقي نفسك بتحبيه اكتر, و هاتلاقيه مابيتكلمش قد ما بيعمل..
الراجل لما بيحب بيعمل كل حاجة و اي حاجة عشان يكون مع الست اللي بيحبها و مش هايدور علي مبررات عشان يؤجل وجودكم سوا
بيحبك زي ما انتي
الراجل اللي بيحبك بجد – هاتلاقيه بيحبك زي ما انتي, شايفك احلي واحدة و اجمل واحدة..
مش هايقولك انتي محتاجة تخسي شوية ,ولا يقولك طريقتك مش عاجباني, ولا هاتلاقيه بيقلل منك و من شغلك ولا هايقولك مثلا مش عاجني شغلك غيريه او مش عاجبني حجابك اقلعيه ولا هاتلاقيه بيطلب منك تغيري حاجة في نفسك, مش هايغير فيكي حاجة, لأنه ببساطة بيحبك مهما كنتي – بيحبك زي ما انتي…
مهما حكيتيله برده بيحبك
مهما قولتي له عن عيوبك و مهما حكتيله عن نفسك و اسرارك و اللي انتي شايفاه وحش فيكي – برده هايفضل يحبك و عمره ما هايعايرك بأي حاجة لأنه مش شايف ان دي عيوب اصلا – لأ ده كمان هايحب الوحش اللي انتي شايفاه في نفسك قبل الحلو… اكيد مش هاتكوني عايزة حد يحبك بس لما تكوني مبسوطة و في احلي شكل ليكي او بس وانتي مبينة انك كاملة و مثالية – اللي بيحبك بجد هايحبك بكل اشكالك و عيوبك..
هايشجعك و يحب نجاحك
حتي لو اجمعنا ان قليل الرجالة اللي مبتغيرش من الستات الناجحة اللي معاهم – الا ان صدقيني الراجل اللي بيحبك هايتمنالك النجاح و كمان هايشجعك تعملي اللي انتي بتحبيه سواء في شغلك او بره شغلك, و هايساعدك و يساندك تبقي حد احسن و انجح – لأنه بيحب يشوفك مبسوطة و عايزك دايما تكوني سعيدة و محققة اللي انتي عايزاه..
كلنا لينا طموحات و احلام, مش الارتباط اللي بيوقفها.. الفرق بس انك لما تكوني مع راجل بيحبك فعلا و بيقدرك, هايطلعك لفوق و العكس صحيح…
طول عمره هايحترمك
مهما عدي عليكوا و مهما اختلفتوا او دخلتوا في مشاكل, عمره ما هايقلل منك او من احترامه ليكي, و مش هاتلاقيه غير طريقة كلامه معاكي لما تختلفوا في حاجة, و مش هاتلاقيه اتحول لشخص تاني و افتكرلك كل حاجة سودة قولتيهاله قبل كده.. لأ هايفضل محترمك… و كمان بيحترمك سواء كنتي موجودة او مش موجودة معاه, مش هايكون من وراكي بشكل و قدامك بشكل تاني, لأنك اصلا بالنسبة له انتي دايما موجوده في باله…
المتابع الرسمي
قالوا ان “الرجل في حبه يحب دائماٌ أن يعرف ما تفعله المرأة”
يعني هاتلاقيه متابعك حتي لو من بعيد – لو سألتيه علي حاجة عنك هاتلاقيه عارفها – و هاتلاقيه عايز يعرف كل حاجة عنك الكبيرة قبل الصغيرة – بتحبي ايه و بتكرهي ايه, و ايه بيفرحك و ايه بيزعلك… و ده اكتر واحد هايسمعلك, حتي لو ساعات بنكون عايزين نتكلم في حاجات تافهة, برده هايسمعك…
و اخيرا يا رجال, كتير قالوا ان المرأه بطبعها عنيده و مبتقدرش ولازم يكون في استراتيجي ماشية عليها – لكن بالعكس, ده حتي في شعراء قالوا “من الممكن ان تشعل المرأة أصابعها العشرة للرجل شموعاٌ…في حالة واحدة فقط: أذا أحست أنه يستأهل أن تحرق أصابعها من أجله ..ولايكفيها إحراق الأصابع ..بل من الممكن أن تحرق عمرها من أجله”
الست لو حاسة و متأكدة من حب الراجل اللي معاها – ممكن تعمل عشانه اي حاجة لو متأكده انه يستاهل – ممكن تلاقيها بتعمل حاجات عمرها ما عملتها بس عشان متأكدة من حبه – هاتلاقيها اتحولت لشخص تاني تماما بس عشان مع راجل معين – راجل معين بيحبها بجد و بيحسسها بكده…
