كرة القدم بالنسبة للمواطن المصري لا تقل أهمية عن الأكل والشرب .. ورغم إن الاهتمام بالكرة في مصر قل شوية بعد ثورة يناير والمتابعة مبقتش زي الأول .. إلا أن ده ميمنعش أن الكرة في مصر جزء لا يتجزأ من حياة أي مواطن.
وبما إننا داخلين على موسم كروي ساخن .. وكوبا أمريكا واليورو هيبدأوا كمان أيام .. قررت أعمل موضوع كروي نفصل بيه شوية عن بقية المواضيع اللي أنتو متعودين عليها.
في الجزء ده هنتكلم عن أشهر المصطلحات الكروية في مصر واللي معظمها يعتبر مصطلحات كروية عالمية بس انتو عارفين طبعاً إننا لازم نحط التاتش بتاعنا على أي حاجة وبالتالي حطينا التاتش المصري الأصيل على المصطلحات دي لغاية ما وصلت للحالة اللي هي عليها دلوقتي.
وهنبقى نعمل جزء تاني نتكلم فيه عن المصطلحات المصرية الخالصة زي الكوبري والترقيصة
-
البلانتي
البلانتي أو ضربة الجزاء .. وأصل الكلمة هو Penalty Kick يعني النطق الصح بتاعها “بنالتي” مش “بلانتي” أو “بلن” .. لكن في مصر هو ده النظام إذا كان عاجبكم ولو قولتها صح هيتحفل عليك .. فالأحسن أنك تقول ضربة جزاء ومش لازم تجود.
-
الفرود
كلمة “فرود” وجمعها “فراودة” والمقصود بها اللاعب اللي بيلعب في مركز المهاجم .. أصلها كلمة “Forward” .. الكلمة يا عيني اتبهدلت معانا في مصر واتمرمطت وبقت تتقال “فرود”.
-
التلاتة بونط
ودي بقى جريمة في حق كرة القدم واللغة الإنجليزية معاً .. في أي لقاء مع أي لاعب بعد أي ماتش تلاقيه يقولك “الحمد لله على التلاتة بونط” .. تلاتة بونط إيه يالا .. ده أنت المفروض تتوقف بعد الكلمتين دول!
المقصود بالكلمة التلات نقط اللي بيحصل عليها الفريق الكسبان .. وأصل الكلمة ” 3 Points” .. يعني بوينت في مصر بقت “بونط” وجمعها “بناط” !
-
الخواجة
ودي مقصود بيها المدرب الأجنبي اللي بيدرب الفريق .. يعني متستغربش لما تلاقي لاعب بيقول بعد الماتش “إحنا نفذنا كل اللي قاله الخواجة” .. ده معناه أنه نفذ تعليمات المدرب يعني بس هو تقريباً بيعايره أنه خواجة أو متأثر بأيام الاحتلال.
-
السنترة
ودي المقصود بيها “Kick Off” أو ضربة بداية المباراة أو بداية الشوط التاني أو ضربة البداية بعد أي جول .. بس هي عشان بتتلعب من نقطة ال”Center” أو نص الملعب فبقى اسمها سنترة عندنا في مصر.
-
كورنن
