الثقب الأسود

أكيد كلنا دلوقتي سمعنا عن صور الثقب الأسود أو الblack hole اللي ظهرت امبارح لأول مرة في التاريخ بعد ما العلماء في كل حتة في العالم كانوا معتبرين ده شئ مستحيل يحصل.

الشئ بقى اللي ناس كتير لسه متعرفهوش هو مين ورا الإنجاز ده أصلًا ومين خلى المستحيل ممكن، وده عالمة الكمبيوتر د. كاتي بومان!

مين كاتي بومان وعملت ايه؟

عالمة الكمبيوتر د.كاتي بومان اللي عندها 29 ومتخرجة من MIT قدرت أنها تعمل Algorithm  أو طريقة حسابية أو برنامج كمبيوتر من الآخر ينقل داتا جايه من الثقب الأسود وينتج صور نقدر نشوفها.

ازاي ده حصل؟ 

لأن كان مستحيل أن أي حد يلاقي أو يعمل تيليسكوب كبير بما فيه الكفاية أنو يرصد الثقب الأسود، فمجموعة من العلماء بدأوا مشروع اسمه Event Horizon Telescope، و صمموا 8 تليسكوبات ووزعوهم في مناطق مختلفة وبعيدة عن بعض في الكوكب وركزوهم على نفس المكان بحيث يرصدوا نفس الحركة من نفس المكان واللي هو موقع الثقب الأسود في مركز مجرة اسمها M87.

ال8 تليسكوبات دول مع بعض كونوا عدسة تليسكوبية بحجم كوكب الأرض كله، وقدرت العدسة دي ترصد شكل الثقب الأسود وحالة الظل اللي على سطحه!

الdata اللي رصدتها التليسكوبات دي مع بعض كان لازم تتحول لصور عشان نقدر كلنا نشوفها، وهو ده اللي قدرت كاتي بومان أنها تعمله.

كاتي بومان بدأت من 3 سنين -بمساعدة فريقها- انها تشتغل على Algorithm أو طريقة حسابية تنقل الداتا اللي بتيجي من التليسكوبات وتنتج منها صورة للعالم يشوفها.

وفعلًا كاتي نقلت الداتا على آلاف من Hard Drives عشان تقدر تبرمجها وتنتج منها الصورة اللي احنا شوفناها امبارح دي.

الثقب الأسود

و طبعًا بما أنها هي اللي كانت مسئولة عن تحويل الداتا دي وانتاج الصورة، كاتي كانت أول واحدة تشوف صورة الثقب الأسود على الكمبيوتر بتاعها وبالرغم من أنها قعدت سنين تشتغل على ده سعادتها لما الصورة ظهرت كانت متتوصفش.

كاتي دلوقتي بقت بطلة وكل الناس في كل المجالات العلمية بتضرب بيها المثل وبتتحاكى باللي هي عملته. والحقيقة هي تستاهل.

الأجمل أن كاتي لما اتسألت عن إنجازها، ردها كان إن اللي حصل ده محدش كان هيعرف يعمله لوحده وأن الصورة دي شارك في إنتاجها أكتر من 200 عالم في كل المجالات، مش إنتاجها لوحدها.

عشان نفهم ليه كاتي بقت بطلة هي وكل اللي اشتغل على الصورة دي لازم نفهم الأول ليه اللي حصل امبارح ده حاجة كبيرة أوي (عشان في ناس شايفة أنه عادي وكدة) أو أن دي مجرد “صورة منغمشة”.

ليه “الصورة المنغمشة” اللي شوفناها امبارح دي غيرت الواقع؟

للي ميعرفش الثقوب السوداء أو الBlack holes دي كان في اختلاف أساسًا على وجودها على مدار السنين اللي فاتت لأن كان مستحيل إثبات وجودها عشان محدش كان عارف حتى يشوفها، فما بالك يصورها .

ليه محدش كان عارف يشوفها؟ 

-أولًا  الثقب الأسود بيبعد عن الأرض بملايين السنين الضوئية فلو حتى عرفت تعمل التليسكوب اللي قد الكوكب ده محتاج يكون دقته خيالية عشان يعرف يرصد حركة في البعد ده.

-ثانيًا الثقب الأسود حجمه أكبر من حجم كوكب الأرض كله تقريبًا 3 مرات، فعشان تصوره أو ترصده محتاج تليسكوب على الأقل قد نص الكوكب كدة.

-ثالثًا الثقوب السوداء طبيعتها أن فيها قوة جاذبية عالية جدًا فبتجذب (أو من الآخر بتشفط) أي حاجة تقربلها. فبالتالي من المستحيل حد يروح أو يبعت أي نوع من أنواع السفن أو المكوكات الفضائية  هناك عشان ببساطة هتتشفط قبل ما ترجع بأي صور أو معلومات.

-رابعًا بقى قوة الجاذبية اللي في الثقب الأسود دي قوية لدرجة أنها بتشفط حتى النور، يعني النور مبيعديش منه، يعني إنعكاس الضوء اللي بيخلي أي حاجة مرأية لينا مش موجودة فيه. يعني من الآخر كدة ده حاجة غير قابلة أنها تتشاف أساسًا.

أيوة طيب ده بيثبت ايه بردو؟

الصورة اللي أثبتت وجود الثقب الأسود دي، أثبتت بدورها نظريات وأبحاث كتير أوي عن وجود أكوان تانية غير العالم المادي بتاعنا أو موازية ليه وكون الثقوب السوداء دي هي الحاجز بين الكون بتاعنا والأكوان التانية، من أهم النظريات دي نظرية النسبية لأينستاين اللي عمرها 104 سنة، ونظرية ستيفن هوكينج أن الثقوب السوداء بوابات لأكوان متعددة، اللي المجتمع العلمي كله حاربه بسببها.

الاتنين العلماء اللي غيروا التاريخ دول حاربوا عمرهم كله عشان يوصلوا ويثبتوا وجود اللي احنا شوفناه بعينينا امبارح ده، ناس كتير كدبتهم وحاربتهم. بس عاشوا وماتوا من غير ما يثبتوه لأن ببساطة كانت حاجة مستحيل إثباتها. 

فطبيعي لما حد يتمكنمش بس من أنه يثبت وجوده و يرصده، لأ وكمان يصوره صورة مرأية للعين المجردة ويعرضها على العالم، يبقى الحد ده غير الواقع و ملامح التاريخ والمستقبل، وحقق المستحيل.

عشان كدة د. كاتي بومان وكل اللي تعبوا سنين معاها على إنتاج الصورة دي أقل ما يُقال عنهم أنهم أبطال.