محدش منع الحب يا خوانا واحنا عندنا نقص في الرومانسيات والمشاعر فبندور عليها حتى لو ديجيتال مع حد مانعرفوش وممكن مانشوفوش بس بيبقى شكلنا قدام نفسنا وحش قوى لما حد يغدر او يخون او يقل اصله بسكرين شوت .
حافظوا عالمشاعر الحلوه ماتبيتوش الغدر ومتخليش اخر علاقتك بالتانى بلوك .
دلوقتى انت مش محتاج تخرج كتير وتقابل ناس اكتر عشان تدخل فى علاقه حب او صحوبيه او اعجاب او حتى مجرد ملي فراغ في حياتك وبعيدا عن الكلام القديم الرخيص بتاع العالم بقى قريه صغيره والانترنت قصر المسافات الا ان الكلام ده بمرور السنين علينا اكتشفنا انه صح .
الناس بيجيلها شغل من عالسوشيال ميديا ، فى ناس بتتشهر وناس تانيه بتموت بمجرد بوست بيتكتب او فيديو بيتعمل ، في ناس حبوا بعض وسابوا بعض وناس تانيه اتجوزوا بعض لما عرفوا بعض من على الفيسبوك دى حقيقه وجوديه لازم نعترف بيها .
الفيسبوك بقى البوابه اللى لما بتتعرف على حد عشان تعرفه لازم تدخل تعمل دراسه في بروفايله وصوره مابالك بقى لو انت اصلا ماتعرفوش وعلاقتك بيه كلها اون لاين
وللعلاقات الديجيتال اعراض ومراحل بقت معروفه وبقت مراحل مصيريه في اى علاقه
1- مرحلة الـ Poke
ودى مرحه انا هنا خد بالك منى وبتبدأ بـ Poke قال يعنى عشان تاخد بالك ان فيه بنى ادم او بنى ادمه عينيها منك وواخده بالها منك ومتابعاك وفي لغه الاعجاب الـ poke ده مرحله النكش اللذيذ ” انا بنكوشك” تروح انت بقى داخل فاتح البروفايل عشان تشوف مين .
2- مرحلة الـ ِAdd
ودى المرحله الصريحه بتاعه احنا هنبقى صحاب ونتابع بعض واعرف عنك وتعرف عنى كل حاجه ويليها فتره دراسه وماجيستير في الاكونت المزعوم ولو ولد اللى عمل لبنت Add فيه مرحله اسمها اوريه لكل اصحابي البنات واتفشخر بيه ده في حاله ان الولد يبقى امور وحلو ودمه خفيف او حتى لو غامض ولافف نفسه بغطاء محدش يعرف عنى حاجه .
3- مرحلة الـ Likes
مرحله ابداء الاعجاب وانى متابعك ومراقبك ومابفوتش صوره الا وانا بلايك ومابفوتش حاجه الا لما بقراها وساعات بشير كمان ودى فعليا اسمها مرحله رجله جت فالموضوع .
4- مرحله الـ chat
ودى المرحله التعارف بقى الجميل اللى بنتعرف فيه على بعض ونقعد نسال على بعض وعلى موود بعض وعلى اصحاب بعض دى المرحله الحلوه بتاعه الكلام والايموشنز الكتير اللى فيها بوس واحضان وgif متحرك يحرك المشاعر ويوصل التهاب الحب.
5- مرحلة الـ hot chat
دى المرحله اللى بعد ما بتاخدوا على بعض بقى والكلام استغفر الله العظيم يتطور تتطور في الاحاس والمشاعر والتعبيرات والرغبات المصريه المكبوته والصور اللى بتتبعت قال ايه بالغلط وصورك بالعضلات وصورك بالهوت شورت .
6- مرحلة الـ Screen shot
اوعوا تفتكروا ان الاسكرين شوت بيتاخد بس للفضايح لا في ناس بتاخد اسكرين شوت للكلام الحلو والذكريات الحلوه واول مره يتقال فيها معجب بيكى وبموت فيكي وعايز اكمل عمرى معاكى
7- مرحلة الـ screen shot الغدر
دى بقى المرحله اللى بيبقى فيها طرف مخون التانى وبيصطاد غلطات عشان وقت مايحب يفك ويخلع يهدد بالصور دى وطبعا دى مرحله لا اخلاقيه منتشره ويستخدم ايضا الاسكرين شوت للتوقيع بين الحبيبه او لاثاره الغيره او للتفرقه بين الزوجين ده في حاله الرجاله الحلوه اللى بتحلى مرار الايام بالعلاقات الالكترونيه .
