رجال
وزى ما البنات بيبقى ليها كلام وتصرفات مستفزين يضايقوا أى حد، الرجالة كمان عليهم شوية تصرفات وكلام يخلوا الواحدة مننا مش طايقة حتى تشوفهم حواليها! زى ايه؟ أنا أقولك..

 

1- يا واد يا بت

متبقيش عارفاله ياختى هو ازاى راجل وكل تصرفاته تصرفات بنات! يعني تلاقيه بينم مع باقى البنات على كل الناس، رغاى لدرجة انك تبقى عايزة تسكتيه ومش عارفة، والأغرب انه بينفسن على باقى الناس زى البنات بالظبط! اما الاجمل والاجمل لما تلاقي له اوقات معينة في الشهر كده مزاجه مش مظبوط وكل ساعة بحال وبيعاني من ال mood swings وعصبي بزيادة ..اللي هو كفاية PMsing مش عارفين نشوف عينك ياحبيبي …. أسوأ أنواع الرجالة هو الراجل “المنسوّن”

Alatnen-Mohamed-Saad-Qfshat-film-Karkar-Komntat-Facebook-Funny-Comics

 

2- Sharing is not caring خالص على فكرة

تبقى واقفة فى الشارع لا بيكي ولا عليكى وفجأه تلاقى شحط ضهره للشارع ووشه للحيطة ولا للكوبرى وبيلبى نداء الطبيعة ولا كأنه واقف فى حمام بيتهم عادى وبمنتهى الأريحية ! الفكرة انك تحسى ان ده مش أسوأ منظر ممكن تشوفيه لما توّدى وشك الناحية التانية فتلاقى شحط تانى وشه للشارع وإيده لسبب ما فى مكان مينفعش تكون فيه قدام الناس بيحاول يعدل حاجة خاصة حبتين تلاتة وهو ما يُعرف بالبلدى بال”حبرشة” .. شكرا لكل الرجالة اللى بتشاركنا أكثر لحظاتها خصوصية بس حقيقي your sharing is not caring !

11900025_10207447489564382_2696038082422224788_n

 

3- تلهيك واللى فيها تجيبه فيك

للأسف الصفة دى طلعت فى الرجالة بشكل غريب، فتلاقى كل واحد فيه عيب بيحاول يتهم بيه اللى قدامه، فتلاقيه مثلا فشّار وبيحاول يقنعك ان دى صفة موجودة فى كل اللى حواليه إلا هو! وهتلاقيه دايما بيقول على زميلكوا فى الشغل انه بيحاول يبان كول وروش موت فى نفس الوقت اللى لو ركزتى هتلاقيه هو اللى كده بس معروفة ان المشتبه فيه دايما بيحاول يبعد التهمة عنه ويلبسها لحد تانى.

1966737_678369078886382_6361565729671615337_n

 

4- الحمام مملكته

تيجي تدخلى الحمام بعد الراجل من دول تلاقي شعر دقنه وراسه فى كل حتة فى الحوض مطرح ما كان بيحلق وطبعا قاعدة الحمام مرفوعة كالعادة وكأن هُمَ بيتولدوا ب default ان القاعدة مينفعش تنزل ولا كأنها كلمته هى اللى هتنزل!

5- صوتك العالى دليل على ضعف موقفك

لو واحدة فينا صوتها علّى شوية وهى بتتكلم مع حد تلاقى الناس كلها بتقولها وطي صوتك؛ يا إما من باب ان صوت المرأه تبع بقية ما يخصها aka عورة، يا إما عشان عيب الست تعلى صوتها فى مجتمعاتنا العربية المتطورة النظيفة الجميلة.. المهم ان فى كل الأحوال المشهد ده مبنشوفوش مع الرجالة بالعكس ماليين الدنيا زعيق بأصواتهم من أول إمام الجامع اللى صوته أنكر الأصوات حرفيا لحد سواقين التكاتك والمكروباصات والأوتوبيسات اللى ماشيين يزعقوا فى خلق الله، مع ان دول صوتهم أكثر استفزازا وإثارة للأعصاب بس نقول ايه بقى، صوتك العالى دليل على ضعف موقفك *IYKWIM*

 

6- على راسه ريشة

من أكتر التصرفات استفزازا، هى إيمان الرجالة المطلق انهم مينفعش يعملوا شغل البيت ولا حتى يساعدوا فيه، من باب ان ده شغل ستات ايه اللى يخليني أنا أعمله؟! فتلاقيه شحط طويل عريض وبينادى أخته تجيبله كوباية المية من عالكومودينو جنبه وأمه تحضرله الفطار فى السرير وهكذا، وسبحان الله نفس الشخص هو اللى لو عاش لوحده ولا سافر بره هتلاقيه بيطبخ ويكنس ويمسح ويغسل لأنه مضطر ووقتها مبيقولش ده شغل ستات! صحيح اللى يهين الولايا فى الدنيا دى بيتهان.

 

7- الهوموفوبيا للجميع

مين قال ان عشان تثبت انك راجل لازم تحاول تنفى الصفة دى عن كتير من أبناء جنسك؟! يعني استفدت ايه بتعليقك على واحد طريقة كلامه أو لبسه مش جاية على هواك أو مختلفة عنك بإنه مش راجل! والألطف بقى انك بتتعامل مع الموضوع ده بمبدأ “انشرها ولك الأجر” فتبتدى تقول لكل الناس المعلومة العظيمة دى عن الشخص ده أو النوع ده من الناس بشكل عام، طب استفدت ايه؟! هل كده بقت أرجل واحد فى الدونيا مثلا؟! ولا كده البنات هتحبك انت بس ولا عايز ايه يعنى؟!

tumblr_nb9z33Krts1rd92xmo1_250

 

8- عاشق تراب البلد

الراجل المصرى ما شاء الله، الله أكبر عليه يعني بيموت فى تراب بلده لدرجة انه دايما بيبقى عايز يكون فيه حتة منه، فتلاقيه من وقت للتانى وهو ماشى يعمل وقوف مفاجئ ويتحفنا ب “خخخوووووووو تففففف” واحدة من أشهر سيمفونياته قبل ما لعابه يعانق تراب البلد من شدة حبه له وبعدين يتركه ويمضى فى سلام زى ما ترك عليه برضه البي بي بتاعه ومضى فى نفس ذات السلام كنوع من أنواع الأنشطة اليومية الوطنية عادى يعني.

1234036_445765235543877_113985450_n

 

9- عات فلوس

دايما بيبقى عندى فضول أعرف ليه فى رجالة بتتجوز وتفتح بيت وهى ممعهاش تعمل ده أصلا؟! يعني ايه اللى يخليك تروح تطلب من أهلك يجوزوك ويدفعولك هُمَ المهر والشبكة ويجيبولك الشقة! طب وحضرتك مشارك معانا بالمجهود مثلا ولا ده تمثيل مشرف ولا ايه بالظبط؟! ماهو لو انت مش قادر تعمل كل ده لوحدك من الأول يبقى فكرة انك تتجوز لازم تتأجل يا ابنى، مانتَ مش هتتجوزها وتروحوا تتغدوا عند أهلكوا!

 

10- مراهم كتير الفترة الجابة

عايز تعرف ايه أكتر حاجة بتعملها بتستفزنى فعلا؟ لما بتبقى قاعد فى المواصلات العامة واخد راحتك بزيادة، فيبقى الفرق بين رجليك الاتنين يكفى ان حد تانى ييجي يقف فى النص مثلا! طب راعى الست اللى قاعدة جنبك ومفيش داعى تضايقها بقاعدتك وانت مريّح برجليك على رجلها لامؤاخذه لمجرد انك ترتاح، ماهو يا إما انت مختلط عليك الأمر ومش عارف تفرق بين القاعدة عالكنبة فى البيت وبين القاعدة فى الأماكن العامة، يا إما بتشتكى من -اللهم احفظنا- تسلخات! وعشان كده عزيزتى المرأه، دايما خلى فى شنطتك مرهم “كيناكومب” للمواقف اللى زى دى وقوليله ان العلم أخيرا لقى حل لمشكلته فلا تسلخات بعد اليوم.

d45a4857596541578a2b4b0d5ecd596370d241b8