دول اول حاجات جت في بالي كـ بنت لو بقيت ولد في مصر :
1- هتبوأ أماكن حصرية
كل الولاد بيتبوأوا مكان ما هما عايزين في أي وقت، لا بيحتاجوا يدخلوا يشتروا حاجة من ماك عشان يدخلوا الحمام هناك، ولا بيضطروا يتصلوا بأصحابهم في المنطقة عشان يبرشطوا على حد منهم.. أول ما يحسوا بالزنقة يختار أي حيطة ويتبوأوا عندها..
2- هسهر في كبارية
وأطلع أنقط الرقاصة وأقعد 4 فتاحات جمبي على الترابيزة وأفضل أفتح أزايز ويسكي معيش حقها، بعدين أضرب وأتطرد برة الكبارية وتاني يوم أعلق واحدة بالبونية اللي في وشي، وأقولها ده انا قطعتهم ضرب.
3- هشرب سيجارة في الشارع
وأفضل أتمشى بيها كده و انا رافعاها بوريها والناس وأحس بالنصر أن محدش باصص لي بإحتقار وأطفيها في قعر الجزمة عشان أحس أني Bad Ass
4- هربي شعري ودقني
عشان انا كبنت عارفة كويس تأثير البوتي تيل والدقن الطويلة في البنات.. وناوية أستغل ده أسوء إستغلال
5- هفتح زراير القميص كلها
ولحد الحزام… كفاية خنقة بقى !… هيكون شعور رائع والهوا بيلمس جسمك كده منغير من تكون قلقان انك تلاقي أيد جوه عبك وكمان هلبس شورت حتى لو كنا في عزا الشتا ولو لقيت خناقة مليش فيها هدخل اتطوع في الخناقة عشان أقلع ملط
6- أماكن مريبة
وقعدات أكثر ريبة.. أنا مش بقول انه صح.. بس انا هكون شاب مراهق متهور بقى ودي مرحلة بيمر بيها لكل الناس.. ايه الأزمة لما أروح استكشف أجواء الغرز !
7- أنا مش بتاع جواز
حقيقي بجد أنا نفسي أقول الكلمة دي جدا.. يعني على الأقل أقولها مرة واحدة بس وبعد كده أتجوز عادي.. بس أقولها مرة من نفسي.
8- هيا بنا نلعب
أصحاب أكتر من واحدة في نفس الوقت وأوهم كل واحدة فيهم اني بحبها ولما واحدة منهم تكتشف أني خاين وتصارحني وتسألني “كنت هتسامحني لو كنت انا اللي عملت كده”
وأرد عليها الرد اللي طال إنتظاره ” في فرق.. انا راجل وانتي بنت”
9- حتى مطلع الفجر
هنزل اتمشى في الشارع في نص الليل من غير ما أخاف من أي حاجة.. وأدخل السينما حفلة 12 بليل وأخرج منها الساعة 3 الصبح أتمشى لحد البيت واثقة الخطوة أمشي ملكاً
10 – انا م البلد دي
تقريباً 90 % من البنات بيعيشوا حياتهم يا أما عاملين دايت.. يا أما عايزين يبدأوا الدايت.. يا اما جواهم شعور بالذنب أنهم مبوظين الدايت.. بالنسبة للرجالة فـ 90 % منهم بياكلوا كل اللي نفسهم فيه من غير ما يتخنوا… أكل بيفترا
