رمضان دخل علينا وكل سنة وانتم طيبين، وزي ما كلنا عارفين إن الشهر ده هو الموسم الرئيسي والأهم لكل المسلسلات العربية، وده معناه إن اللي بيتفرج على التليفزيون مش هيلاقي مكان يهرب منه من سيل المسلسلات العربي اللي جايلنا!
بس لو كنتم زي حالاتي مالكمش في العربي، هرشحلكم شوية مسلسلات أجنبي حلوة.. صراحة الاختيار كان صعب جدًا إني اختار عدد معين من المسلسلات اللي تستاهل تتشاف، خصوصًا إن الحاجات الحلوة كتيرة فعلًا، بس قررت –في المقال ده واللي بعديه- إني أركز على حاجات معينة أرشحهالكم.
في حاجات مش هتكلم عنها.. يعني مثلًا المفروض إن الكل شاف Friends، وحاجات قديمة نوعًا أغلب الناس شافوها زي Lost و Fringe و Prison Break و Heroes، وحاجات أحدث شوية شافها أغلبهم برضه زي The Walking Dead و Game of Thrones و Breaking Bad و Dexter، وحاجات سوبرهيروز زي The Flash و Daredevil و Gotham، فاحنا الحاجات دي كلها مش هنتكلم عنها هنا، وهنركز على حاجات تانية أقل شهرة وتستاهل تتشاف.
بعد ترشيحات الجزء الاول (تقدر تقرأه من هنا) بنكمل معاكم بمجموعة تانية من المسلسلات اللي هتنبسط لما تشوفها :

Luther

Luther

المسلسل بيحكي عن محقق شرطة عبقري، مخلص جدًا في شغله بس عنده هوس كبير بيه؛ وبيستخدم وسائل غير تقليدية في حل الجرائم اللي بيشتغل عليها، وكل ده بيأثر على حياته الشخصية بطريقة شبه دمرتها.. من ضمن الشخصيات الرئيسية في حياته هي واحدة عبقرية/مختلة عقليًا كان بيحقق في جريمة قتل متورطة فيها، بس فشل إنه يثبتها عليها، وبمرور الوقت بقت بتتعاون معاه في حل شوية قضايا بيشتغل عليها.
تريلر المسلسل:

 

Flashforward

header_flashforward

المسلسل بيحكي عن ظاهرة غامضة خلت كل العالم يقع في غيبوبة وتجيله رؤية لأحداث هتحصل في المستقبل، فتقرر المباحث الفيدرالية إنها تعمل وحدة خاصة تتحرى عن الموضوع ده، وبتحصل كتير من المفاجأت في رحلة البحث عن حقيقة اللي حصل.
تريلر المسلسل:

Misfits

Misfits

المسلسل بيحكي عن شوية شباب بيتورطوا في مشاكل بتجبرهم إنهم يتجمعوا في مكان واحد يقضوا فيه فترة “خدمة المجتمع”، بس في يوم من الأيام بتضرب المكان عاصفة برق، فيكتشف كل واحد فيهم بعدها إنه اكتسب قدرة خارقة مختلفة عن الباقيين.. المسلسل بيركز على طريقة استغلال كل واحد منهم لقدراته الخارقة، وكمان على علاقته بزملاءه التانيين.
تريلر المسلسل:

 

Banshee

Banshee

المسلسل بيحكي عن مجرم بيخرج من السجن بعد فترة عقوبة طويلة، وبيروح مدينة صغيرة والصدفة والظروف هناك تخليه بينتحل شخصية المأمور الجديد للمدينة، فيبدأ من ناحية إنه يحاول يكمل شغله القديم كمجرم بالتعاون مع شوية من أصحابه القدام ومن ضمنهم حبيبته اللي اتسجن بسببها، وفي نفس الوقت شغله الجديد كمأمور بيواجه عصابات المدينة والناس اللي بيتحكموا فيها.
تريلر المسلسل:

 

Pushing Daisies

Layout 1

المسلسل بيحكي عن شاب عنده قدرة خارقة إنه يرجع الناس الميتة أحياء تاني، ومن ضمن اللي بيرجعهم للحياة البنت اللي كان بيحبها وهو صغير، بس المشكلة إن أي لمسة تانية منه لأي حد بيرجعه حي؛ هترجع الشخص ده ميت تاني للأبد!.. طبعًا عشان في قدرات خاصة في الموضوع؛ فهيكون فيه جزء بوليسي في المسلسل؛ واللي هيكون متعلق بمحقق بيكشف سر الشاب ده وبيطلب منه يساعده يحل شوية قضايا غامضة.
تريلرالمسلسل:

 

Episodes

Episodes

المسلسل بيحكي عن نسخة خيالية من شخصية الممثل المشهور مات لوبلانك، بيظهر فيها هنا إنه وغد سافل زير نساء، انسحبت الأضواء منه بعد ما خلص مسلسل Friends.. المسلسل بيحكي كمان عن 2 كتاب بريطانيين متجوزين عندهم مسلسل ناجح في بلدهم، وبيسافروا هوليوود عشان يعملوا نسخة أمريكية منه، بس بيتصدموا إن شركة الإنتاج خلت لوبلانك بقى هو بطل المسلسل، وإن أحداث المسلسل نفسه اتغيرت بغير إرادتهم، فالموضوع اتحول لكابوس مش عارفين يخلصوا منه.
تريلر المسلسل:

 

Person of Interest

PERSON OF INTEREST

المسلسل بيحكي عن عميل مخابرات سابق فقد الرغبة في الحياة بعد أحداث كتيرة حصلت في حياته، لحد ما يقابله ملياردير عبقري يقنعه يشترك معاه في مشروع جديد.. المشروع باختصار هو إن في آلة بيشيروا ليها باسم The Machine ليها عيون وآذان في كل مكان في العالم، وبتقدر تحلل مليارات المعلومات، وبتتوقع حوادث هتحصل، فبيكون دور العميل السابق إنه يتدخل فيها وينقذ الأبرياء من إن يحصلهم أذى.
تريلر المسلسل:

 

Once Upon a Time

Once Upon a Time

المسلسل بيحكي عن شابة بتوصل لمدينة غريبة، بتكشتف مع الوقت إن سكانها هم الشخصيات الحقيقية للقصص الخيالية المعروفة زي سنووايت ورامبل ستيلستكين، وإن المدينة وسكانها معمول عليهم لعنة من الساحرة الشريرة، وإنها هي الوحيدة اللي تقدر تكسرها.
تريلر المسلسل: