الستات، أرق مخلوقات ربنا، الستات: الكائنات اللي عارفة هي عاوزة ايه بالظبط من حياتها، الستات اللي ربنا خلقهم في الأرض نسمة للرجالة، الستات اللي عمرهم ما اجتمعوا ولا هيتجمعوا علي حب حاجة أبدا، واللي بينهم اتفاق ضمني انهم عمرهم ما يتفقوا، انا مشفتهمش متفقين علي حاجة واحدة أبدا غير “جورج كلوني”..!
جورج كلوني من ممثلين هوليوود البلوك باسترز، معرفش معناها ايه، بس هي تقريبا نجم شباك، وسيم، عسول، دمه خفيف، وعشان انا باحبه، وهجيب ناس تحبه، قررت النهاردة أشارككم أسباب حبي للراجل العسل ده، بالعند في الرجالة كلها
ليه احنا بنحب جورج كلوني؟
-
وسيم..وسيم..وسيم…
طبعا مش محتاجين نتكلم كتير علي ان جورج كلوني ومن ساعة ما طلع، زمااااان أيام ER أيوة لما كان ف كلية الطب، كان الاقبال ع المسلسل تاريخي يا افندم، انتوا متصورين انه دكتور؟ ده لو دكتور وانا دخلتله العيادة هخف من أول نظرة والله..
الوسامة مش عيون زرقا وشعر أبيض وبس، الوسامة باختصار هي توافر ملامح الرجولة، تقاطيعه جميلة، عيونه حلوة، شعره حلو…هييييييح..
-
العذراء والشعر الأبيض..
نص بنات مصر طبعا، ميعرفوش ان جورج كلوني، مولود وشعره كان أسود ف وقت م الأوقات، بل كان سايح ونايح، بس متفهمش، هو ليه من ساعة ما شعره بقي رمادي فضي هو بطل يصبغه “إلا ف السياق الدرامي طبعا”، راجل محترم، مش بيعاند الزمن، ولا شفناهوش راح عمل بوتوكس ونفخ..خدوده..
طبعا الرجالة محتارين، طب احنا عاجبنا الشعر الفضي ده؟ أكيد يا أخي، انت مش شايف الراجل بقي عامل ازاي حتي بعد ما عدي الخمسين؟ ده بقي أحلي من زمان والله..! وكل ما الزمن بيرسم خط تجعيدة علي وشه باحسه بيكون أحلي…زي النبيذ المتعتق بالظبط..!
-
بعد ما لف وبعد ما دار..
كلنا طبعا عارفين المحامية “أمل علم الدين” وازاي هي بتترافع قدام محاكم العالم، ومتخرجة من أهم مدارس القانون، الحقيقة ان جنس السيدات كله بيدين للست دي بالفضل لأنها توبت “كلوني” عن الهلس اللي كان عايش فيه، والفسااااااد اللي كان عايم فيه من وقت ما بقي نجم، وستات رايحة وستات جاية، هوب، جت أمل، قفلت الباب ورمت المفتاح ف المحيط..!
ناس كتير تيجي تسألني تقولي يا كابتن مدحت: ايه اللي يخلي جورج كلوني اللي محاط بمزز العالم يبص لأمل علم الدين، وانا اجي اقولك بقي: ان ازاي محامية مرموقة زيها تبص لحتة ممثل عابث لاهي بتاع ستات؟
الحقيقة ان جورج كلوني من الفنانين القليلين الواعيين سياسيا، وله أنشطة تطوعية كتير وتبرعات للاجئين ومجهودات في دارفور، زي ما كان أحد الداعمين لحملة باراك أوباما، يعني ف دماغ الراجل اللعبي ده فيه مخ، مش صينية بطاطس يا سي السيد انت وهو
-
صوته العميق..
لو كل الناس بتحب صوت مورجان فريمان، ف ده لأنهم مبيركزوش مع صوت كلوني خالص، صوته عميق، ليه نبرة مميزة، وبيعرف يبقي Narrator شاطر جدا…
لو كنت شفت فيلم Up in the air أكيد كنت هتبقي زيي، واستمتعت بالفيلم، لأن الفيلم أجزاء كتير منه برواية صوت جورج، الموضوع اللي كان ممتع جدا علي الناحية السمعية..
-
دمه شربات..!