المأساة اللي عادة بتحصل مع أي بنت، هي إنتقالها من بيت الأهل لبيت الزوج مباشرة، من غير ما تخوض تجربة المعيشة بمفردها ابداً، وده طبعاً صعب جداً يحصل في مجتمعنا العربي، لك أن تتخيل لو أي بنت دخلت قالت لأهلها انا هأجر شقة وأعيش لوحدي، أبقى تعالوا زوروني باي باي، طبعاً هتتحدف بحاجة، بس ساعات البنات المغتربات بتخوض التجربة دي غصب عن الأهل بسبب ظروف تعليمها أو شغلها، وتقريباً بنات كتير عارفين مميزات أنهم يعيشوا لوحدهم قبل الجواز، وعشان كده الموضوع ده موجه للأهل قبل البنات، أو الأمهات الصغيرات اللي عندهم أطفال دلوقتي، ليه ماتفكروش تربوا بناتكم بشكل مختلف وتخليهم لما يكبروا يستقلوا بحياتهم، للأسباب دي:
  • أنا مين يا دادا

hqdefault-1

البنت وهي عايشة مع أهلها بتعيش بالنظام اللي تم وضعه على أيد والدها أو والدتها، ولما بتتنقل لبيت الزوج بتعيش بردو بنظام الزوج، وممكن جداً البنت توصل لدرجة أنك لو سبت لها البيت فترة لوحدها، تعطل، ماتعرفش هي المفروض تعمل ايه، فتنفذ نفس السيستم الخاص بالأم أو الزوج، لكن لو البنت عاشت لوحدها فترة، هيكون ليها  نظام خاص بيها هي، وهيكون هو الأكثر راحة ليها جسدياً ونفسياً، ولما تيجي تتجوز هيكون بيتها هو مزيج من نظامها ونظام جوزها وهتكون مرتاحة وسعيدة أكتر.
  • وأطير وأرفرف في الفضا

film1155

إحساس الحرية الحقيقي اللي بجد، للأسف عمره ما كان جزء من حياة البنت المصرية، والراجل المصري كمان، الانسان بشكل عام صعب ياخد حريته بشكل كامل، ودايما في قيود ما خفية بتحركه، بس على الأقل، البنت لو عاشت لوحدها لفترة قبل الجواز، هتحس بقدر من الحرية محستوش قبل كده، تاكل في اي وقت، تنام في اي وقت، ولو عملت حاجة غلط هتتحمل نتيجة خطأها وهتتعلم، ومع الوقت هيكون ليها شخصية مستقلة صعب تنمو وهي في بيت أهلها لبيت جوزها مباشرة.
  • اخرها ايه

canvas

البنت لما بيكون عليها قيود كتير، بتحس أنها نفسها تعمل حاجات كتير غلط من وجهة نظر المجتمع، وساعات كتير بتكون عايزة الحاجة دي مش لسبب غير إنها ممنوعة، وعشان كده إستقلال البنت بيديها الفرصة انها تعمل اي حاجة وكل حاجة، والمفاجأة اللي هتكتشفها البنت انها هتكون حريصة جدا على تصرافتها، ومش بعيد تقول لنفسها الكلام اللي اهلها بيقولوا ليها قبل ما تسمعه منهم اصلا، وبالطريقة ده عمر الكلام ده ما هيكون مرفوض او كلاشيه، هيكون درس البنت اتعلمته بنفسها.
  • ماهي اصلها لوكاندة

00

عارف كل الحاجات اللي بتعيشها البنت مع أهلها أو بالأخص مع أمها عن التنضيف والترتيب والاكل، الإستقلال هيخلي البنت تعرف أن الحاجات دي مش سبب الأم بتكدر بيه بنتها، دي ضرورة في الحياة، لأنها لو مغسلتش هدومها مش هتلاقي هدوم تلبسها ببساطة شديدة، لو مغسلتش الأطباق مش هتاكل، معروفة!
في النهاية، انا عارفة ان ممكن يكون كلامي بعيد عن خيال اللي بيقراه، بس انا بكرر، انا بكلم الأمهات الصغيرات اللي كان نفسهم يعيشوا التجربة دي، ليه تحرموا بناتكم منها؟