الست والراجل مهما اختلفوا على حاجات كتير واتفقوا على حاجات أكتر، فهيفضل الـ Shopping هو محور المشاكل الأساسي والأول بجدارة..!
الستات بتعشق الـ Shopping، بتحبه، بتقدسه، أسعد لحظات حياتها بتبقى وهي بتشتري أو بتقيس أو حتى بتلف ع المحلات بس تتفرج. أحلى كلمة ممكن تشوفها في الوقت ده هي “Sale” مالية المول كله وموجودة في كل حتة حواليها.. كلمة ليها تأثير سحري والله.. بتلاقي رجليها بتاخدها كدة لا إرادي وتدخلها المحل اللي فيه Sale.. الست ممكن تتعب وتزهق وتمل.. إلا وهي بتلف ع المحلات.. مستحيل تلاقي ست بتقولك “أنا تعبت من اللف وعايزة أروح” مستحيل!! دي كلمة مش في قاموسها أساسا.. ده هي بتفضل تلف تلف تلف لحد ما المول يعلن إنه هيقفل خلاص.. ساعتها بتقول لنفسها “مش مشكلة هاجي بكرة”..!

12837174_10209350897836555_1649740332_o

الست في وقت اللف ده بيبقى عندها قوة عصبية عضلية مش هتشوفها في أي كائن حي ولا في أجمد أبطال ألعاب القوى.. أغلب الستات بتعمل Shopping بالكعب العالي.. صدق أو لا تصدق!
نيجي للراجل بقى..
أولا: ممكن نتكلم عن علاقة الراجل بالـ Shopping في سطرين.. الراجل حاجته سهلة ومفيهاش تفاصيل كتير، ده غير إنه بيشتري أول حاجة تعجبه وخلاص (وده من رابع المستحيلات يحصل مع الست). ده غير إنه مش بينزل يشتري غير عشان فعلا محتاج الحاجة مش بس عشان يتسلى.

shopping

ثانيا: الراجل بيكفر ذنوبه كلها في اليوم اللي بينزل مع مراته وهي بتعمل Shopping.. بس نبص للجانب الإيجابي للموضوع.. بيتعلم الصبر أكتر من الصيد ولذلك أطالب بتغيير مقولة “الصيد بيعلم الصبر” لـ “ال Shopping مع مراتك بيعلم الصبر”. كمان ممكن ينجز أي حاجة كان مأجلها. ممكن يروح يقعد ع القهوة، ممكن يدخل سينما، ممكن يتغدى ويتعشى ويحلي، ممكن يلعب ضغط، ممكن يقعد مع نفسه كدة قعدة صراحة ويفكر في مستقبله تفكير عميق، ممكن يحضر دكتوراه، يتعلم لغة جديدة… حاجات كتير يعني ممكن تتعمل وممكن أخر ما يزهق بردو يروح يقولها “ها يا حبيبتي خلصتي ولا لسة” ونصيحة مني ميتوقعش رد بره الإتنين دول:
1- “لا طبعا هو أنا لاقية حاجة أصلا! مع نظرة لوم وعتاب ومسكنة وتعجب”
2- اه يا حبيبي خلاص هشوف بس المحل اللي دخلناه في أول اليوم والمحل اللي جنبه واللي في الدور الأرضي وخلاص. مع نظرة يعني مستعجلني ليه مش فاهمة” عايزة أقولك انك ممكن تكون عامل ذكي ومسيطر عليها..

بس اسمحلي أقولك ان ال Shopping ما هو إلا خدعة عشان يطلع عينك بمزاجك..! استحملها.. حتى لو من 10 الصبح للمغرب.. حسسها إن الفستان اللي جابته بعد كل ده لقطة ومفيش منه فعلا وده نتاج لف وتعب يوم كامل ومقارانات ودرجات ألوان كلها زي بعض وصراعات داخلية.. متستغربش كمان او نزلت ترجعه أو تغيره تاني يوم.. متحاولش تفهم إيه علاقة الستات باللف والشرا والقياس.. دي حاجة كدة في الچينات، دي حاجة هم شخصيا مش لاقيين لها تفسير.. بس دي بتبقى من أكثر أوقات حياتهم سعادة.. وأكثر أوقات حياتكم ملل..!