معظمنا تقريبا اتولد لقى نفسه بيحب عيلة أمه أكتر من عيلة أبوه لسبب ما مش قادرين نعرف هو ايه حتى واحنا كُبار كده!
بس جه الوقت اللى نحاول نلاقى سبب للموضوع ده لأن مش طبيعي شعب بحاله تقريبا بيفضل عيلة الأم عن عيلة الأب من غير سبب. المهم واحنا بندّور عالأسباب، اكتشفنا الآتى:
فاكر لما كنت لسه جنين
من وانت لسه جنين فى بطن مامتك وتحديدا ليلة ولادتك وقت ما الست الوالدة جالها الطلق وصرخت صحت الحاج من أحلى نومة أول كلمة قالتهاله كانت: عايزة ماما، كلملى ماما. ومن هنا بدأ ارتباطك بعيلة أمك، ُهَم كانوا أول حد جنبك وقت ولادتك حتى وانت لسه مشوفتش الدنيا بعينك! وبالتالى فتحت عينك عالدنيا حرفيا لقيتهم أول ناس قدامك بعد باباك ومامتك.
كل الحاجات بتفكرنى
من بعد ولادتك لحد ما بتبتدى تكون واعى بالأحداث اللى بتحصل حواليك، بتكتشف انك طول الوقت ُمحاط بعيلة أمك؛ لأنها أولا كانت شبه مقيمة عند أهلها بعد ولادتك عشان حد ياخد باله من سيادتك وهى تعبانة فى الفترة اللى بعد الولادة على طول وبعدين شوية وأجازة الوضع بتاعتها بتخلص ولازم تنزل الشغل فهتسيبك عند مين غير مامتها؟! وهكذا بقى لحد ما توصل لسن الحضانة، هتفضل مقيم تقريبا فى بيت أهل مامتك فهيبقوا شبه ُهَم اللى ربوك فطبيعي لما تكبر تبقى كل ذكريات طفولتك بتفكرك بيهم أوتوماتيك.
ست الكل ولكن..
أكل ماما بالنسبالك هو رقم واحد ومفيش حد أيا كان هو مين يقدر يعلى عليه ده غير انك مبترتاحش تاكل من ايدين أى حد غيرها، بس بما انك اتربيت وسط أهل مامتك ففى الغالب القاعدة دى استثناءها بيكون جدتك وخالتك اللى كبرت أصلا وانت بتاكل من ايديهم فبالتالى التلاتة ُهَم منافسين الطبخ الحقيقين فى حياتك.
الخال والد
عمرنا ما سمعنا ان العم والد أو أى مقولة جابت سيرة عيلة الأب، لكن وعينا عالدنيا واحنا بنسمع دايما ان الخال والد، ولو خالك قالك حاجة فى وسط نقاش قدام بقية العيلة بتلاقى أهلك على طول بيزعقولك عشان تسمع كلامه بحجة ان الخال والد..
جدو حبيبي
دايما جدك لأمك له مكان مختلف عندك غير حتى بقية عيلة الأم! مش مكانة أب على قد ما هى حد حنين فى المطلق وفى صفك على طول مهما عملت، بيدافع عنك قدام كل العيلة وبينه وبينك هيعرفك غلطك، كل الحواديت اللى اتحكيتلك وانت صغير كانت منه هو، أول حد علمك القراية وحببك فيها كان هو، لما كنت تتزنق فى فلوس وماما وبابا يقولوا لأ هو اللى كان بيديك ويقولك اشترى اللى نفسك فيه وملكش دعوة بحد. جدو لوحده كان سبب كافى انى أفضل عيلة ماما على عيلة بابا
