اكيد لا لسه موصلش معاك للمرحلة دي .. بس عموما الراجل اللي مبيردش او مبيكلمش صاحبته / مراته زي ما كان متعود هو فالاغلب السبب بيكون انت …او هو هيقولك كده وش .
وفالنهاية انت محتاجة تعرفي هو فعلا انت عجباه او بيحبك او هيكمل معاكي ؟ ولا هو بيتسلي و زهق ؟
الاسباب في كام نقطة (حسب تفكير الكاتب/ة المتواضع ) :
بيلعب بيكي
علي طريقة الافلام الدرامية الاوفر …. اللي للاسف حقيقة معظم الرجالة اللي بتختفي من حياتك فجاة او تتجاهلك عن عمد بتكون لامؤاخذة يابنتي خدت غرضها وخلعت .. وهنا مش بالضرورة يكون شئ جنسي … ممكن يكون مل وزهق …. قضي شوية وقت ظريف وبح خلاص مبقتش مهتم ..الراجل ممكن بسهولة يهتم بالست حتي في مكاملة تليفون مدام معملش ده يبقي هو مش عايز خلاص … او لما تحسي انه بيعاملك وحش وتسأليه وتتخانقي هيقولك الحقيقة عادي مش زي الستات اللي ممكن تسالها فالاغلب رايها مخالف لحالتها … الرجالة بتقول فالوش ومبتقولش معلش … وبرضه لو طول فالعلاقة من غير ما يبقي فيه شئ واضح يعني مبيقولش لاصحابه انه مصاحبك/مرتبط بيكي/ مبيفكرش يتقدملك (ده لو متصاحبين من سنتين تلاتة اقل واجب)
ده بيودينا للسبب التاني
هو مش عارف عايز ايه
المشكلة دي عند الرجالة والستات فاغلب الوقت … الستات طول الوقت بتفكر وبترسم مستقبل للعلاقة بينما الرجالة معظمهم مش كده وممكن وقت ما يفكر انه مش عارف بتكون شعرة ما بين هو فعلا عايزك ولا عايز يخلع … هنا مش غلط حد بس اعتقد بيبقي محتاج شوية وقت زي ما انتي بتبقي اوقات محتاج وقت تعرفي بس اكيد ميطولش فيه …لانه لو طول معناه انه خلاص هو عرف بس بيستهبل
مش جاهز … (لو مش النهاردة يبقي بكرة)
بدون ما مخك يروح لبعيد … دي تكملة للنقطة السابقة بس للعلاقات اللي لسه بتتبدي … يعني البنات – اغلبهم – زنانين في فكرة بداية العلاقة (انت ليه مش بتعرفني باصحابك – انت ليه مش كاتب اننا متصاحبين عالفيسبوك – هي فلانة عارفة انك مصاحب ولا لا) … لو في اول العلاقة الرجل حتي لو بيحبك فهو مبيحبش يحس انه متوتر طول الوقت او في حد فوق دماغه لانه هيبقي مش مرتاح حتي لو بيحبك وبتوحشيه ممكن ميردش او ينفضلك موقتا … حلك هنا اتاكي عالصبر .
مقلق منك …
تقدري تقولي خايف يعني ؛ ودي بسيطة ؛ هو لو في علاقة صريحة معاك او في اولها…يبقي متخوف من حاجتين :
الاولي انه يكرر اخطاء سابقة معاكي ؛ يعني يلاقي نفس المشاكل في كل البنات اللي عرفهم فيكي … وده مش عيب ومحتاج يتطمن فقط
تاني حاجة انه يخاف يخسر مكتسبات العزوبية او كونه مفهم كل الناس انه مش مرتبط ولا ناوي ؛ يعني صاحبته فالشغل وفالنادي وفالجيم وفالنايت كلاب وفي الجونة وفي دهب وفيسبوك وتويتر وسناب شات وانستجرام …. (هِتعدي كتير وراه) … ف ده تستحمليه شوية بس مدام نفضلك وبيتهرب بالطريقة اعرف انه مشغول بحد من اللي فوق دول عادي يعني نو افينس .
مكسوف :
نقطة غريبة بس حقيقية جدا او لو حبينا نقولها بشكل الطف واكثر حداثية (بيخاف من الكوميتمنت) … مش الستات بس اللي جبناء في الحب او العلاقات كمان الرجالة ودول اسوء نوع حقيقي … ده محتاج احتواء شديد وبعد شوية هتلاقي هو اللي بيجري وراكي وبيغرقك مشاعر بس فالاغلب هتبتدي انت تنفضيله .
ابحث عن المرأة
كل الكلام اللي فوق لطيف بس طبيعي اول ما صاحبك/جوزك ميردش عليكي …اول حاجة تيجي في دماغك انه بيخونك وش … او كما قالت احد الممثلات في فيلم أرض الخوف لاحمد زكي (الديوك نطاطة والرجالة عطاطة) .
