حبيبتي وصاحبتي، كل بنت قمورة وكل ست مطحونة ما بين شغلها وبيتها وجوزها، صحباتي الحلوين، احنا مخدناش م الرجالة غير “وجع القلب” وبس…
من قلب موجوع لكل القلوب الموجوعة في الدنيا، وليكي انتي وبس خمس أسباب لازم تكبري عشانهم دماغك، ومتركزيش مع الراجل اللي ف حياتك، عشانك انتي وبس..!
ليه لازم تاخدي بريك من الراجل بتاعك، لأسباب كتير، وكلها أكيد تهمك..!
  1. صحتك بالدنيا

hqdefault

مخدناش من الرجالة كستات غير وجع القلب، المرارة، الضهر، القلق، حرقة الأعصاب، لما بتبعدي عن الراجل كل الحاجات دي بتبعد أوتوماتيك، كأنك شلتي حمل رهيب من علي كتافك، مش هتفضلي قلقانة ولا عليه ولا بسببه، كأنها راحة سلبية للاعب، سايب ملاعب الكورة وقاعد بيلعب بلاي ستيشن..!
  1. ميستاهلوشي

images

أثبتت الدراسات الحديثة في جميع أنحاء العالم بداية من مصر الجديدة لحد شبرا الخيمة، ان مفيش راجل بقي راجل، زي ما أثبتت بالظبط ان “مفيش صاحب بيتصاحب”،  هتزعلي علي ايه؟ علي واحد بيحرق دمك ليل نهار؟ علي واحد مش بيطفي وراه نور الأوضة وهو خارج؟ علي واحد مش بيعرف يسلق لنفسه بيضتين؟ طيب بلاش دول، هتزعلي علي واحد لو سبتيه لوحده ساعة هترجعي تلاقيه شابك ف أي تاء تأنيث معدية؟ ما أظنش، مفيش راجل يستاهل انك تحرقي دمك عشانه عامة..!
  1. خف تعوم

images (1)

لما الناس بتكبر، وتقرب من بعض أوي، بتكون تقيلة علي قلب بعض، زاتس واي بالمناسبة انت ليه لازم تسيب بيت أهلك وانتا عندك 25 سنة، عشان أكتر من كدة حد فيكوا هيغتال التاني..! ف ما بالك بواحد  وشك ف وشه، قايمين نايمين مع بعض، بتعملوا كل حاجة مع بعض، أكيد محتاجين تبعدوا شوية عشان يبقي فيه مساحة صحية للحياة بعد كدة..!
  1. أجازة

images (2)

لو احنا بنشتغل عند بعض ف حياة بعض، ف اكيد انا من حقي اني آخد أجازة م المنصب بتاعي ف حياتك، زي ما انتا محتاج تاخد أجازة، وتعمل Handover  للDuties  بتاعتك لحد تاني وهكذا، الشركات كلها شغالة كدة، ولما الموظف انتاجيته بتقل مديره بيديله أجازة مش بيقف علي دماغه بالكرباج عشان يزود انتاج..! انتي مش تور ف ساقية، أجزي..دلعي نفسك..!
  1. تجديد..تقييم…اعادة تفكير

فيلم كدبة كل يوم

آخر خطوة وأهم سبب لأنك تاخدي بريك من الراجل، انكم بتكونوا بتمروا بمرحلة مفصلية في علاقتكم، ومش عاوزين تاخدوا قرار متسرع، وباقيين علي بعض، ف الحل الأخير ليكم انتو الاتنين هي “البريك” وفيها بتعيدوا تقييم العلاقة وتشوفوا لو كل واحد مش عارف يعيش من غير التاني ولا لأ، ولا الموضوع ميستحقش تضحية ومش عاوزين نكمل…
المهم في النهاية لما تاخدي البريك ده، مترجعيش بعديه تعيطي، أو تقطعي الأجازة من نصها، وأتمنالك أجازة سعيدة في كل الأحوال، بيه، او من غيره..!