ليه لازم تحبي راجل تلاتيني ؟ اهو ده سؤال ذكى من ست ذكيه واعيه ناضجه شاطره عايزة مصلحتها العاطفيه وزى ما احنا متفقين ودايما بنقول ان بحر العلاقات واسع عاوز عويم شاطر يا تغرق فيه بمزاجك؛ اهى الرجاله عامله بالظبط زى البحر يا تلبسي مايوه وتعومى يا تقعدى عالشط تتفرجى يا تلبسي مايوه شرعي وانتى ونصيبك فالموج يا هتعرفي تنطى وهو عالى يا هتستسلمى وتشربي ملح الميه كله
بس الاكيد ان الحب في سن التلاتينات ليه طعم تانى ساعات بيبقى عاقل وراسي وهادي وناضح وساعات يودى فداهيه بس الاكيد اكتر ان الرجاله بتحلو في سن التلاتين بتحلو في الكلام والشكل والحنيه والقسوه والزعل والحكايات
زى الفاكهه المستويه
مافيش شك ان سن العشرين سن الهبل والتنطيط والانبساط الغير مبرر الانبساط اللى مش محسوب ولا معمول حسابه بس فيه هيبه كده الرجاله بتبقى فيها اول ماتكسر سن التلاتين فالجنون بيقل نوعا ما او بمعنى اصح بيقى جنونه بشكل عاقل اكتر بيحسب بعقله اى علاقه داخل فيها ، هو طفل وعارف انه طفل بس بعد التلاتين بيبقى طفل واعى ناضح عارف وبيفهم فالستات اكتر فهيقدر يحتويكي اكتر من واحد في العشرين .
سيطرة
مش عايزين نكدب بقى لان مافيش ست او بنت مابتحبش ان حبيبها يكون شخصيته ضعيفه ، فالراجل بعد سن التلاتين بيبقى مسيطر بعض الشيي او كل الشيي حسب بقى شخصيته ولكن الاهم انه هيبقى راجل يعتمد عليه ويا هناكى يا سعدك لو الراجل ده ناجح في شعله فهيبقى عايز دايما يحافظ على النجاح ده ، عايزك جزء منه او على الاقل ما تبقيش سبب فشله المهم اللي لازم تفهميه ان سن التلاتين فالرجاله سن بيسيطر على نفسه وعلي شغله وعليكي ، خلي بالك سيطره الراجل حلوه في حاله واحده بس وهو انه يبقى سوى نفسيا مش سيطره من اجل قمعك بس .
مش عايزك تتغيري
الراجل العاقل الراسي مابيقبلش ابدا ان الست تتغير عشانه وده ميزان سن التلاتين هو هيبقى عارف كويس انك بتغيري حاجات بسيطه فيكي عشان بتحبيه وعشان ترضيه بس هيطفش لو غيرتى نفسك كلك على بعضك لان الراجل فالسن ده شكاك وزى ما غيرتى نفسك عشانه هو هيبقى عارف انك ممكن تتغيري عشان حد تاني فتجنبي انك تفضلى تذلى امه بكلمه اتغيرت عشانك دى خليكي على طبيعتك هيقدر انك على راحتك معاه وهيفهمك .
لعيب تحدى محترف
شوفي يا بنتى يا حبيبتى العلاقات العاطفيه لومشيت على وتيره واحده من الانبساط او من النكد والمشاكل بتبقى في منتهى الملل ومن اهم مميزات راجل التلاتين انه بيديكي مساحه تتحديه في شويه حاجات بل بالعكس هو بطبيعه سنه بيحب يلعب لعبه التحدى ومش هيزعل لو انتى كسبتى في الاخر الراجل العاقل دايما بيحب الست الذكيه تعرف تلعب امتى وتعرف تضعف امتى وتعرف تقوى امتى وتحتاجه امتى فالعبي معاه ماتخافيش .
هيعلمك
راجل التلاتين لما بيحب واحده بجد بيحب دايما يعلمها حاجات جديده يحب يحكيلها عن حاجات ماتعرفهاش يحب ينصحها خاصتا لو هى اصغر منه وحتى لو في نفس سنه فثقه التلاتيني في نفسه كفيله بانه يحاول يسقيكى من علمه ومعرفته معلش حتى لو كل اللى بيقوله ده انتى عارفاه فقدرى انه عايزك تفهمى كل حاجه فحاولى تتعلمى منه كل اللى هيقوله الراجل لما بيوصل للتلاتين ويختارك تحبيه ويحبك بيبقى شاف ولف ودار كتير وغالبا الراجل التلاتيني فى السن ده مشاعره مبتبقاش هبله والتفاصيل بتفرق معاه وبيبقى مركز فى كل حاجه اكتر واكتر فسيبيه يا ستى ينصحك حد طايل راجل فاهم فالزمن ده .
وشك هينور
مكدبش ابدا اللى قال ان العلاقه العاطفيه المريحه المفهومه اللي فيها الراجل اكبر من الست عاقل ووعاكى وراكز بتخلى شكلكوا انتوا الاتنين احلى والضحكه ليها مكان وسطكوا والزعل مدته قصير والراحه والتفاهم عمره اطول كل ده مش هيحصل الا لو كان الراجل ناضح فاهم عايز واهم حاجه عايز دى عشان اللى عايز علاقه حلوة طويله وناجحه بيخليها فعلا كده وطول ما ده موجود وشك دايما هيبقى منور وبيضحك ، الراجل التلاتيني يا بنتى اه مشاكله كتير بس حبه حلو وغالبا بتبقى دقنه حلوة برضوا .
حضنه حلو
خلينا نتفق على ان متطلبات راجل التلاتين مش زى عيال العشرين اظن الرساله وصلت بس لما بيقلب عيل وطفل الحضن ساعيتها والاحتواء بيبقى فعلا بالنسباله راحه وبيت وده مش كلام اغاني صدقيني .
اتاكدى ان احلى قصص الحب هى قصه الراجل التلاتيني السن انتى كمان لو مريتى بتجربه زى دى احكيلنا ليه الرجاله حلوة فالتلاتينات