يختلف معنى “احلى شئ فى العالم “من شخص لشخص . فبالنسبة لى و معى الكثيرين هو “النوم”. وعلشان الحلو ميكملش بيقوم عقلنا الباطن بتأليف احلام غريبة تقلق نومنا واحيانا منعنا من الوصول للنوم اصلا وبحكم حالة الحب بيني وبين سريري عملت ابحاث عن تجربة شخصية علشان ابعد عن الكوابيس و اوصل لحالة النوم الهادي السعيد. لو عاوز احلام عجيبة , او الباكدج كله كوابيس و ارق :
1. مشاهدة الافلام و خاصا لو كان فيلم جديد ؛ لان فى المشاهدة الاولي يتعلق فى العقل الباطن ببعض احداث الفيلم بدون ترتيب وياسلام لو كان الفيلم خيالى مثل هاري بوتر او رعب زي SAW
2. الاكل قبل النوم مباشرة له اضرار كثيرة مثل المقولة الشائعة بأنه”يكتم على النفس و يجيب كوابيس”والوقت الصحيح هو الاكل قبل النوم ب 3 ساعات ؛ وعن تجربة ساعة واحدة احيانا تكفى
3. المنبهات : الكافيين بأنواعه شاى؛ قهوة؛ نسكافية؛ مشروبات غازية؛ شوكولاتة .. و المفاجأة الكبرى “التفاح” الذى يعتبر منبه اقوى من الكافيين.
4. انشغالك بمواعيدك الصباحية والخوف من عدم رن المنبه يؤدى للصحيان اكثر من مرة اثناء النوم ؛ فمن الافضل كتابة جدولك فى ورقة ؛ وبالنسبة للمنبه انت بس قول لمامتك بمعاد صحيانك و هي هتصحيك قبلها بساعة
5. حل العاب الذكاء (السودوكو – الكلمات المتقطعة….) اذا لعبت قبل النوم بتركيز ستتحول احلامك الى ارقام و حروف تطير و مربعات
6. و نفس الدوشة السابقة لكن بدون ارقام او حروف تكون بعد اللعب على الفيس بوك و الانترنت(وعن تجربة شخصية قضيت اسبوع فى تحمير الفراخ و تقطيع البصل بسبب لعبة عن المطبخ)
7. اما القراءة فهي سلاح ذو حدين؛ احيانا تكون السبب فى نوم هادئ و احيانا تتحول لاحلام عجيبة حسب طبيعة الكتاب اللي قريته
8. الاكتئاب و البكاء و تذكر كل الاشياء المؤدية اليهم ؛ يسبب اضرار صحية مثل الصداع و عدم القدرة على النوم و زيادة ضربات القلب
9. مذكرة ليلة الامتحان… يفضل وجود فاصل بين الدراسة والنوم؛ علشان يقل التوتر و تتجنب الكوابيس الخاصة بورق الامتحان و الاسئلة التى لا تعرف اجابتها (بلاش رعب فى النوم كفاية اللجنة)
10. واخيرللبنات نصيحة من زميلة تجنبى البصة الليلية على الفيس بوك ؛ مش لازم تحرقى دمك بمين اتخطبت ومين اتجوزت ومين عملت عيد ميلادها في مركب ومين سفرت بره مصر و مين بتغير صورتها كل ساعتين (حرقة الدم ديه تتعمل الصبح علشان متحلميش انك بتخنقى واحدة صحبتك)
من اكبر مشاكل النوم الغير مستقر و الاحلام الغريبة مشكلتين لا حل لهم:
1)حالة المرض الشديد و هنا تبدأ احلام العيانين .
2)بعد الرجوع من المناسبات الاجتماعية الضخمة,الافراح و اعياد الميلاد……,و بعدها تكون الاحلام عبارة عن صورة غريبة من نفس الاحتفال ,وكأنك بتتفرج على فيديو بايظ للحفلة (للأسف كل مناسبتنا ليلية)
ولمحبى اكل الرز مع الملايكة :
1. نقضيها عشاء خفيف : مشروب ساخن خالى من الكافيين (ينسون – حليب) او اكل موز و منتجات الالبان و البيض (تساعد الجسم على الاسترخاء) و بالطبع قبل النوم بأكثر من ساعة
2. مشاهدة شئ هادئ مثل الكارتون او المسلسلات الست كوم
3. مشاهدة فيلم او مسلسل رومانسي (طبعا تركى) علشان تحسى ان الدنيا لسه بخير …ده طبعا للبنات فقط
4. حمام ساخن بيريح الاعصاب و يساعد على النوم الهادئ.
5. الاغانى قبل النوم و خاصة الهادئة تساعد على النوم بسهولة( وطبعا المهرجانات نأجلها للصبح علشان بتفوق )
6.الرغى من باب الفضفضة مع صديق(ة) او الاهل بتقلل من التوتر و تساعد على الاستعداد للنوم (لا اتكلم على الحبيبة ذو ال3و4 ساعات فى التليفون)
7. وضع روتين من الاهتمام بالنفس قبل النوم ؛ زي التسريح او وضع كريم (يمشي ولاد وبنات عادي)
