مخدرات

مش مفاجأة لأي حد أن تعاطي المخدرات والعقاقيرالمخدرة في مصر زاد بشكل مرعب، وأن نسبة الإدمان عندنا عالية، ولا أن المخدرات بقى بيتعامل معاها على أنها بونبوني.

بس اللي كان مفاجأة أننا نكتشف أن الموضوع وصل أن نسبة تعاطي المخدرات بين المصريين وصلت -بشكل رسمي- ل10.4 % وده أكتر من ضعف المعدل العالمي للتعاطي واللي بيكون حوالي 4% في الدولة الواحدة.

الكلام ده بناءً على إحصائيات صندوق مكافحة وعلاج الإدمان والتعاطى اللي عاملاه وزارة التضامن الإجتماعي. والحقيقة دي مكانتش المفاجأة الوحيدة اللي الإحصائيات دي عرفتهالنا.

تعاطي المخدرات في مصر

آخر إحصائيات لصندوق مكافحة وعلاج الإدمان والتعاطي وضحت التالي: 

– 27.5 % من اللي بيتعاطوا مخدرات في مصر ستات، 72.2% رجالة.

– الترمادول هو أكتر عقار مخدر عليه إقبال في مصر ونسبة تعاطيه وصلت في 2018 ل36.2%!

– بعد الترامادول أعلى نسبة تعاطي كانت في الحشيش ووصلت ل26%، وجه بعده الهيروين بنسبة تعاطي وصلت ل18.3%.

– 87% من الجرايم اللي حصلت في مصر في 2018 كان سببها المخدرات.

– الحد العمري الأدنى لتعاطي المخدرات نزل لسن 9-10 سنين.

دي مش الأخبار الوحيدة المتعلقة بالمخدرات اللي سمعناها مؤخرًا. في آواخر 2018، القاهرة جت في المركز الخامس عالميًا في قائمة المدن الأكثر إستهلاكًا للحشيش في العالم لإستهلاكها  32.59 طن في 2018 بس، وده بناءً على تقرير Weed Index السنوي.

صحيح أن الكلام ده كله يخوف ويقلق، بس ده مش معناه أن الدنيا كلها سودة. الحقيقة أن مجهودات صندوق مكافحة وعلاج الإدمان والتعاطى على مدار الكام سنة اللي فاتوا عملوا فرق وأثروا فعلًا على الوضع بطريقة إيجابية.

نص الكوباية المليان

– حملات التوعية اللي عملها صندوق مكافحة وعلاج الإدمان والتعاطي على السوشيال ميديا وفي التلفزيون بالتعاون مع فنانين ونجوم مصريين جذبت إنتباه أكتر من 60 مليون مصري.

– المكالمات اللي استقبلها الخط الساخن التابع للصندوق لمساعدة حالات التعاطي والإدمان زادت بنسبة 400% في 2018.

– الصندوق قدروا يساعدوا 116,000 متعاطي في 2018.

– بفضل حملات الإختبار المفاجئ اللي صندوق عملها في، نسبة تعاطي المخدرات بين سواقين الأتوبيسات وعربيات النقل التقيل انخفضت من 24% إلى 12% خلال السنة اللي فاتت.

اللي بنحاول نقوله هو أن زي ما في وحش، في حلو. وأن التغيير الإيجابي اللي حاصل بسبب مجهودات صندوق مكافحة وعلاج الإدمان والتعاطي وغيره بيدل أن في أمل أن الوضع يكون أحسن. لكن ده مش هيحصل غير لو كلنا ساعدنا و حاولنا نوجه مجهوداتنا في حل المشكلة دي، ممكن في يوم من الأيام تتحل نهائيًا.

لو عايز تعرفوا أكتر عن مجهودات صندوق المكافحة وتقدروا تعملوا ايه عشان تساعدوا تقدروا تزوروا صفحتهم على الFacebook.