شم النسيم

شم النسيم داخل علينا وعلى قد ما دي حاجة جميلة وربيع وأعياد وإحتفالات ومناسبات مفرحة وكدة، في مشكلة كبيرة. وهي أن البلد ريحتها بتقلب فسيخ ورنجة وبصل في شم النسيم وكلنا بنتنح من اللي بناكله.

ومع أن ده بيحصل كل سنة، عمرنا ما بنحرم ولا نبطل أكل عشان بصراحة الفسيخ والرنجة يستاهلوا التضحية. فبدل ما نحرم نفسنا، جبنالكوا شوية حلول بديلة ممكن تلجأولها عشان تساعدكوا نتفادى الآثار الجانبية لجرائم شم النسيم اللي كلنا عارفينها.

1. مترو الأنفاق فيه سم قاتل

أيا كانت المشاوير اللي عندك أو الظروف اللي هتتحط فيها، مهما حصل إياك والمترو. ليه؟ مكان مغلق ضيق تحت الأرض مليان بناس لسه واكلة فسيخ ورنجة وبصل. فعلًا مش فاهم ليه؟

2. معجون سنانك هو صديقك الصدوق

سواء بتغسل سنانك كتير ولا أصلًا مبيشغلكش الموضوع ده، في يوم شم النسيم، لا إستغناء عن معجون السنان خالص. لو بتغشل سنانك في العادي مرتين في اليوم، في شم النسيم، إغسلهم 5 مرات.

ومش بس سنانك، حاجة مش كل الناس تعرفها، معجون السنان حل سحري لمشكلة ريحة الإيدين اللي كلنا بنعاني منها بعد الأكل ونخلص البرفان بتاعنا عليها. لو غسلت إيديك بمعجون السنان كويس هيساعد الريحة تروح بسهولة.

3. بصل بدون لمون لا يجوز

إستخدام اللمون بالنسبة لنا في شم النسيم هو أننا نعصره على الفسيخ والرنجة والسردين والسلطة، وعلى قد ما ده إستخدام مهم طبعًا وكل حاجة، في إستخدام تاني بنفس الأهمية وهيحللنا مشاكل كتير وهو أننا نغسل بيه إيدينا وسنانا أول ما نخلص أكل. هيساعد يودي ريحة الظفارة وينضف بواقي الأكل فلما تغسل إيديك بالصابون بعد كدة، تنضف أسرع.

4. القرنفل هو الحل

لو الأكلة كانت قوية ولا اللمون ولا معجون السنان جايببين نتيجة، عليك بالقرنفل. لو حطيت كام حباية قرنفل في بقك بعد الأكل وسيبتهم لمدة 5 دقايق مثلًا، القرنفل هيودي كل الروايح المتبقية في بقك من الأكل بالذات البصل والثوم وهيخلي بوقك ريحته منعشة، والحلو أنه مش حل مؤقت، يعني مش شوية والروايح هترجع، ده حل دائم لأن القرنفل ريحته قوية جدًا فهي اللي بتفض في بقك وبتغطي على أي روايح تانية.

5. الدنيا ربيع والجو فسيخ

عادة منتشرة عندنا في مصر أننا بنروح نقضي شم النسيم في الجناين والحدائق، على أساس ربيع وكدة. بس الموضوع ده هيخليك عرضة لكل آثار شم النسيم من روائح و تتنيح وعيال صغيرة، فالأحسم أنك تتجنب التجمعات في الجناين، ولو عايز تقضي اليوم مع أخلك أو صحابك ممكن تتجمعوا في بيت حد فيكو وأهو البيت يكون ستر وغطا على الجريمة اللي هتحصل.

6. القيلولة جزء لا يتجزأ من الوجبة

حقيقة علمية محدش يختلف عليها هي أن بعد الأكل، كلنا بنتنح، هيطلع واحد يقول “لأ أنا مبتنحش أنا”، هقوله لأ بتتنح بس أنت مبتعرفش أنك متنح. فأحسن ما نقلب زومبي كلنا، بعد الأكل كل واحد لازم ياخدله تعسيلة كدة صغيرة عشان يتعافى من آثار اللي كله قبل ما يرجع يختلط ببني آدمين ويبهدلهم معاه.

ده على إعتبار طبعًا أن كلنا أجازة، بس لو أنت مش أجازة بعد الشر وعملتوا الجريمة دي في الشغل، فغالبًا هتنام أنت وكل زمايلك على مكاتبكوا بردو.

سواء عملتوا بالنصايح دي ولا لأ، حاجة واحدة لازم كلنا نعملها في شم النسيم وهي أننا ننبسط كتير وناكل أكتر. ده شم النسيم بردو يعني! فانبسطوا وكلوا وقضوه مع اللي بتحبوهم وميهمكوش حاجة، هو يوم وهيخلص. كل شم نسيم ووجبة ممينة واحنا طيبين!