رغم إن أم كلثوم ماتت من أكثر من أربعين سنة إلا إن لسه ليها معجبين ومحبين. معجبين قد يكونوا اتولدوا بعد وفاتها بسنين. أم كلثوم بالنسبة لمحبيها أو سميعتها زي ما كانت بتوصف جمهورها، مش مجرد مطربة. أم كلثوم اللي يحبها هيلاقيها تدخلت في تفاصيل حياته بصورة مرعبة. دول عشر حاجات لو عندك يبقى انت غرقان في حب الست لشوشتك.
لما تبص في ساعتك وتقوم تمشي عشان الساعة 12 وحفلة الست هتشتغل على الراديو
طبعاً سماع أم كلثوم في الراديو شيء تاني، بيخليك تعيش جو الحفلة وكإنك عايش في وقتها وبتسمعها لايف. دا غير إنه في مستوى أعلى، فيه ناس عندهم هواية الفرجة ع الحفلات ومتابعة تأثر الجمهور.
إنك متعرفش تنام عشان معرفتش دي أغنية إيه من لحنها
أوقات كتير بنسمع مقدمة أغنية لأم كلثوم ومنعرفش دي أغنية إيه. هنا بيبدأ الضغط على خلايا مخك إنك لازم تعرف دي أغنية إيه. في الحالات دي “شازام” صديقك الصدوق.
إنك تقول لحد بحب أسمع أم كلثوم القديم ومتعرفش توضح موقفك
طبعاً سميعة أم كلثوم عارفين إن أم كلثوم القديم تعني مرحلة ما قبل تعاونها مع عبد الوهاب. وطبعاً صعب تشرح لحد إن أم كلثوم ليها حاجات جديدة وقديمة. لإن أم كلثوم في حد ذاتها قديمة. بس محبي أم كلثوم بس اللي عارفين إن فيه قديم للقديم.
لما تبقى بتتمشى في الشارع وتقف عند أي محل مشغل حفلة الست في الراديو عشان انت بتحب الأغنية دي
بيبقى صعب تفسر موقفك، لو انت ماشي وسمعت الست بتغني من محل ووقفت قدامه. وهيبقى عجيب جداً لو سألك صاحب المحل إزاي يقدر يساعدك، وانت تقوله مش عايز حاجة، أنا بحب الأغنية دي
لما تلاقي كلمة من أغاني أم كلثوم نطت في دماغك مع كل موقف
زي لما يتأخر حد على معاده معاك وأول ما تشوفه تقوله فات المعاد. أو زي لما حد يعصبك فالشغل فتلاقي نفسك بتغني إنما للصبر حدود. أو لما حد يسأل عليك بعد طول غياب فتقوله لسه فاكر كان زمان.
الحزن الدفين اللي بتحس بيه لما تعجب بحد ويطلع مبيحبش الست
دي أزمة رهيبة، لإنك هتضطر تسمع أم كلثوم بقية عمرك لوحدك ومش هتلاقي حد يشاركك سهرة سماع الست. دا غير إن كل الكلام الرومانسي اللي حافظه مش هيساعدك في حياتك العاطفية
الصبر، لو عندك استعداد تسمع مقدمة موسيقية نص ساعة عشان تعرف دي أغنية إيه، فانت تقدر تعمل أي حاجة
كل اللي بيحبوا أم كلثوم نفسهم طويل وصبرهم ملوش حدود. الساعة بتاعة أغنية أم كلثوم بتعدي هوا بالنسبالهم. فحذاري من تتحداهم في النفس الطويل
لو علاقتك بأهلك أفضل
محبين أم كلثوم في أي سن وشكل ولون بيقدروا بعض. يعني لو عندك مشاكل عائلية، صدقني قعدة بتسمعوا فيها الست سوا هتحل كل الخلافات. الأم كلثومي يفهم الأم كلثومي اللي زيه.
لما متكتفيش بسماع الأغاني وتبقى عايز تعرف قصة كل أغنية
أغاني أم كلثوم مش مجرد أغاني، كل أغنية وراها حكاية واللي بيسمعوا الست بيبقوا عايزين يعرفوا كل حاجة عن أغانيها. يعني الأغنية دي اتكتبت امتى وفين، وكان مين اللي هيلحنها. والتغييرات اللي أم كلثوم عملتها فيها.
لما تتعصب لما تسمع لقب ” أم كلثوم الثانية”
لإنك مؤمن إن أم كلثوم واحدة بس ومش هتتكرر
