الخاين

حاجة أكيدة ومفيهاش نقاش ولا جدال، أن الخيانة جريمة غير مقبولة وملهاش مبرر. بس للأسف معظم الأحيان، الخاين بيدي مبررات لخيانته ويحاول على قد ما يقدر ييطلع نفسه مش غلطان أو يحمل مسؤولية تصرفاته وذنبه للبنت اللي هو خانها.

للأسف بردو بنات كتير أوي بتصدق المبررات دي وتسامح، ومش بعيد كمان تحس بالذنب. بس الحقيقة المبررات دي كلها بتبقى مجرد حجج الشخص الخاين بيحاول يداري بيها عن ذنبه عشان مفيش خاين عايز يعترف أنه خاين.

والدليل أن معظم اللي بيخونوا بيقولوا تقريبًا نفس المبررات، وعشان نثبتلكوا قررنا نجمعلكوا أكتر مبررات مشتركة بين اللي بيخونوا:

1. “الرجالة كلها كدة. المهم اني برجعلك انتي في الآخر”

الخاين

النسخة العربي ل”Boys will be boys” وكدة. والحقيقة المؤسفة ان المبرر ده بيتقال من ستات زي ما بيتقال من رجالة. على أساس انه كراجل في الDNA بتاعه انه يكون خاين. وده مش بس حاجة غير مقبولة وبتغش الست في انها تقبل بوضع المفروض متقبلوش. لأ ده كمان بيظلم رجالة كتير مش طبيعتهم كدة ولا حاجة. وبتحطهم في خانة واحدة مع الرجالة الخاينة.

2. “انتي السبب، ما انا لو لقيت اللي بدور عليه معاكي مكنتش دورت عليه برا”

الخاين

اكتر “سبب” منتشر ومستفز في نفس الوقت الحقيقة. لأنه اللي بيقولوا مش بس بيكون خاين، لأ ده خاين وأناني وبجح ما شاء الله. وفوق كل ده جبان. لأنه مش بس بيتهرب من المسؤولية، لأ ده بيشيلها للست اللي هو خانها، اللي هي الضحية. يعني ده زي اللي يضربك بالقلم ويقولك ايه اللي جاب وشك عند ايدي كدة.

3. “العلاقة بقت فاترة مبقناش زي الاول”

مبرر من المبررات اللي الراجل الخاين بيعلق عليها خيانته للست اللي مرتبط بيها هي ان العلاقة بينهم بقت “فاترة” او اتغيرت عن اول ما ارتبطوا. ودي حاجة طبيعين ومسؤوليتهم هما الاتنين، بما انهم هما الاتنين مرتبطين ببعض، يعني المفروض المسؤولية مشتركة. بس لسبب ما رجالة بتتعامل انها مسؤلية الست لوحدها وده -لسبب ما بردو- يبررلهم انهم يخونوا ويعملوا اللي هو عايزه من باب انه بيعاقبها تقريبًا مش عارفة.

4. “أنا عملت كدة من كتر حبي ليكي”

دي واحدة من الMind games اللي بادئة تظهر بقوة على الساحة مؤخرًا للأسف. دي لما الولد يخونك واما تواجهيه يقولك انه عمل كدة من كتر ما بيحبك. اه والله. في اللي هيقولك  أنه من كتر من كتر ما بيحبك، خاف وعقله الباطن خلاه يعمل حاجة غبية عشان هو عنده “commitment issues” وخايف يتعلق بيكي وكدة. في بردو اللي ممكن يقولك أنه عمل كده أما اتخانقتوا مثلًا عشان كان “موجومع أوي” أما حس أنك بتضيعي من ايده، فالخيانة كانت نوع من أنواع المسكن تقريبًا مش عارفة. المهم يعني أنه هيخترع أي حدوتة عشان يثبت بيها أنه خانك من كتر حبه ليكي يا عيني.

5. “مكنتش في وعيي، كانت غلطة ومش هتتكرر”

الخاين

النوع ده أقلهم بجاحة الحقيقة لأنه على الأقل بيعترف أنه غلط. ومبيحاولش يشيل حد تاني اللوم. بس فيه مشكلة تانية، وهو أنه بيعتبر الخيانة دي حادثة مثلًا أو زلة لسان، كأنه داس على رجلك، فاللي هو “آسف بس خلاص حصل خير”. وبيبقى شايف أنه عمل حاجة كبيرة أوي أنه إعتذر فأنتي ازاي مش عايزة تسامحيه “ده حتر برنا بيسامح يعني”! المشكلة الحقيقة مش عنده بس، المشكلة في أن فكرة الخيانة في عقليات كتير في مجتمعنا بتعتبر “غلطة بريئة” وبتتسامح عادي. وعشان كدة النوع ده بيحس أنه مظلوم لو مسامحتيهوش.

في أنواع تانية كتير من الراجل الخاين وأعذار تانية أو “إشتغالات تانية” بمعنى أصح. بس زيهم زي دول، كلهم مش صادقين، وكله أي كلام بيقولوه عشان ميشيلوش الذنب غلطهم.

والحقيقة أن الفكرة مش في الأعذار اللي بيقولوها، الفكرة أنهم شايفين للخيانة أعذار أصلًا. وده اللي لازم يتغير، ولازم كل راجل وكل ست يبقوا داخلين العلاقة عارفين أن الخيانة دي مش خيار متاح أساسًا ومش “غلطة” عادية” وأنهم لو خانوا، مش هيكون في فرصة تانية.