على قد ما مسلسلات رمضان السنة دي فيها وجوه جديدة كتير واخدين أدوار بطولة ومسيطرين على الساحة، وعلى قد ما المسلسلات مبهرة والأداء مفاجئ، فيه نجوم معينة بننتظرهم كل سنة وننتظر أعمالهم بفارغ الصبر مختفيين السنة دي من على الساحة.

وبالرغم من أن الإختيارات كتير، إختفاء النجوم دول سايب فراغ كبير وعامل فرق مع كل اللي بيحبوهم. عشان كدة قررنا نفتكرهم إنهاردة ونقولهم وحشتونا.

1. عادل إمام

لأول مرة من 2012، مسلسلات رمضان ميكونش فيها مسلسل للزعيم. ناس كتير وحتى اللي مكانوش بيتفرجوا على مسلسلات كانوا بيستنوا مسلسل عادل إمام من السنة للسنة من حبهم للفنان العظيم. والسنة دي زي كل سنة كلنا كنا مستنيين مسلسل الزعيم الجديد “فالانتينو” اللي كان مفروض هيتعرض رمضان ده. لكن قبل رمضان بوقت قصير، أُعلن أن المسلسل هيخرج من سباق رمضان 2019 ومش هيتم عرضه، من غير ما يتم إعلان السبب ورا ده بشكل رسمي.

بس الناس منسيتهوش…

2. يسرا

بالنسبة لأي حد بيتابع مسلسلات كل سنة -سواء من جيل التسعينات ولا الثمانينات-، يسرا عامل أساسي كل رمضان. على مدار سنين الفنانة الكبيرة عودتنا على ظهورها كل سنة بمسلسل جديد أحسن من اللي قبله. فطبعًا -وزي كل سنة- السنة دي كنا مستنيين مسلسها الجديد “بيت العيلة” بفارغ الصبر. وطبعًا بردو أما عرفنا أنه ملحقش يجهز ومش هيتعرض السنة دي، حسينا أن مسلسلات رمضان السنة دي مهما كانت حلوة هتبقى ناقصة كتير.

وبالنسبة لناس كتير كان “ملهاش طعم”…

3. يوسف الشريف

على مدار 6 سنين بس، يوسف الشريف قدر يعلق الناس بشغله المختلف ويخلي جمهوره مخلص ليه ولنوع الفن المميز اللي مفيش غيه بيقدمه. بس السنة دي وللسنة التانية على التوالي، يوسف الشريف مختفي من الساحة ولأسباب غير معروفة. بس مع أنها تاني سنة يغيب فيها عن مسلسلات رمضان، جمهوره مش ناسيه، ولسه مفتقدين الحس الغموضي اللي مسلسلاته بتضفيه لرمضان ومستمرين في طلبهم برجعوه.

مش بس بيطالبوا، في ناس عملت إضراب عن مسلسلات رمضان 2019 كلها لحد ما يرجع!

4. نيللي كريم

على الرغم من أن مسلسلات نيللي كريم بقالها 6 سنين بس جزء من الروتين الرمضاني بتاعنا، إلا أن على مدار الكام سنة دول نيللي إمتازت بنوع معين من الدراما والأدء التمثيلي اللي خلاها تختلف عن كل منافسيها في سباق مسلسلات رمضان. مش بس كدة، نوعية وجودة مسلسلات نيللي خلت جمهورها -زي جمهور يوسف الشريف- يخلصلها ويستنى شغلها من السنة للسنة، عشان كانوا مستنيين مسلسل رمضان 2019 “النصابين” بفارغ الصبر. فطبيعي لما متعرضش ناس كتير أوي اتصدمت وحسوا بفراغ كبير وإختلاف عن كل سنة.

لدرجة أنهم مكانوش عارفين يحسوا بمسلسلات رمضان أساسًأ من غيرها…

5.كريم عبد العزيز

مع أن كريم عبد العزيز مش معودنا على ظهوره الدائم في رمضان، إلا إن ظهوره وإن كان قليل بيعلم مع الناس وبيأثر فيهم. وده اللي حصل في رمضان 2017 لما قدم مسلسل الزيبق، وأما وعد الناس بجزء تاني منه الناس استنته بفارغ الصبر في رمضان 2018 وتاني في رمضان 2019، بس متعرضش.

عشان كدة السنة دي أما كريم نزل إعلان عن فيلمه الجيد “الفيل الأزرق 2″، ناس كتير أوي طالبوه بالزيبق 2 ولاموه على الإنتظار الطويل والتأخير في ظهوره. 

دول وغيرهم كتير من نجوم إستنينا نشوفهم على تلفزيوناتنا رمضان ده، بس لأسباب مختلفة غابوا عننا السنة دي. ويمكن ده يكون أفضلهم لأي سبب من الأسباب، بس ده مش معناه أننا مش مفتقدينهم وحاسين بغيابهم.

انتوا مين من الفنانين مفتقيدينهم في مسلسلات رمضان 2019؟ عرفونا في الcomments وقولولهم وحشتونا!