لو انتا شغال في فيصل وبيتك في أكتوبر، أو شغلك ف المعادي وبيتك ف امبابة، أو ما بين أي نقطتين بيقعو علي خط مستقيم عامة في القاهرة، ف الزحمة اللي بتقابلها رايح جاي ده شئ عادي، ومش عيب، العيب انك متستفيدش بالزحمة دي بأي شكل من الأشكال…
طبعا انتا ف الزحمة معاك موبايلك، الهيدفونز بتاعتك، وممكن التابلت بتاعك، وسواء كنت في عربيتك أو ف اوتوبيس أو ميكروباص، ممكن تعمل الحاجات دي، وتستفيد..!
  • اسمع أغاني أو موسيقي

large-439683743495587599

“لذلك خلق الله الساوندكلاود”، لو انتا من محبي فنان معين ممكن تعمل الDiscography  بتاعته وتسمعها بالترتيب الزمني بتاعها، هتلاقي نفسك بتعيد اكتشاف الفنان ده، وهتحبه بشكل مختلف.
لو انتا مش بتحب الأغاني، وده عادي، ممكن تتجه للموسيقي الكلاسيك، اسمع هايدن، شتراوس، بيتهوفن، موتسارت، اسمع سمفونية وقسمها مثلا ع الأيام، هتفرق معاك جدا.
اسمع أغاني عمرك ما سمعتها قبل كدة، اسمع تراكس من دول تانية، دور مثلا ف جوجل علي Top Russian Singers  واعمل سيرش بالاسم واسمع حاجة جديدة.
اسمع أغاني فولكلور، اعرف تراث بلدك، اسمع الريس متقال، الريس حفني، اسمع السيرة الهلالية…
المهم تسمع شئ جديد يسليك ويضيفلك.
  • اتعلم لغة جديدة.

من أسهل الحاجات اللي ممكن تتعمل ف الزحمة، سواء كانت فوق الأرض، أو ف المترو، هي انك تتعلم لغة جديدة، سواء عن طريق برامج زي “Doualingo” أو تراكس باللغة دي مثلا، دور علي كورسات ودي مفيش أكتر منها وخصص من وقتك ربع ساعة بس هتتعلم فيهم، وهتفرق معاك جدا، اللي بيتعلم أكتر من لغة بيوسع مدارك ثقافته وبيفكر بشكل مختلف وبيحافظ علي مخه من قلة الاستخدام.
  • اقرا كتاب

  • مستر-بن
أوبشن ممتاز ليك لو انتا مش م الناس اللي بتصدع من اهتزازات المواصلات، هات كتاب، واقراه، خليه ف شنطتك، خليه ف ايدك، اقرا منه كل يوم صفحة او اتنين، وهتحس انك عديت بوابة Narnia  لا هتحس بالوقت، ولا بالطريق، وهتنسي القرف والعوادم والزحمة.
لو مش بتحب القراية، أو ملكش طققان عليها، ممكن تعمل كتاب سماعي Audio Book  الانترنت مليان تشكيلة ممتازة من كل الأعمال الأدبية والعلمية ككتب مسموعة ومؤخرا فيه أكتر من كتاب عربي بقي سماعي، ممكن تحمل الحاجات دي وتسمع، هتفرق معاك جدا بردو.
  • اقرا الميل بتاعك.

كل واحد مننا جواه عيل صغير، سايب الميل بتاعه بيعمل Sync ع التليفون ومش بيقرا ولا ميل، بما انك قاعد فاضي، افتح الميل كدة واقراه رسالة رسالة، ورد ع المسكين اللي مكلف خاطره وحطك ف ميل.
  • نظم التايم لاين بتاعك في فيسبوك.

كتير م الناس بتشتكي ان التايم لاين بتاعها ف فيسبوك يشل، لو اخدت كل يوم خمس دقايق بس بتطهر التايم لاين مش هتحس بالقرف تاني، اعمل انفولو للناس المزعجة، خبي صفحات الأخبار، اعمل لايك لصفحات علمية وثقافية، او صفحات بنات، ابعد عن صفحات المشاكل والاعترافات، مزعجة جدا، خبي صفحات الحوادث والناس اللي بتنشر صور عنيفة اعملها انفولو، املا التايم لاين بالسلام والمعلومات والثقافة، خلي الفيسبوك مصدر راحة مش مصدر ازعاج.
  • اعمل To-Do List بالحاجات  اللي هتعملها لما تروح.

لو انتا زي حالاتي بتشتغل م البيت، أو وراكي شغل بيت وأولاد، نظمي هتعملي/هتعمل ايه ف البيت لما تروح، صدقني الخطط الصغيرة دي بتنظم اليوم بشكل لا يصدق، اكتب عاوز تعمل ايه بكرة ف الشغل، اكتب انتا وراك ايه، قسم الدنيا، النظام حلو مفيش كلام..!
  • اعمل المكالمات اللي مكسل تعملها.

المكالمات الرخمة، قريبك الغلس اللي مراته ولدت، بنت عم مراتك اللي رجعت من ليبيا، صاحب البيت الي عاوز فلوس الاسانسير، كل دي مكالمات لازم تتعمل والهروب منها مش مفيد، بما انك قاعد ف الزحمة وتليفونك ف جيبك، وكدة كدة متكدر، افتح الموبايل واتصل بكل الحاجات اللي انتا مأجلها دي، الموضوع هيفرق معاك وهتوفروقت وحرقة دم..انتاكدة كدة دمك محروق م الزحمة…!
  • اتفرج علي فيلم.

  • smartphone-3d-movie
اخر حاجة باحب اعملها انا شخصيا في الزحمة اني باتفرج علي أي حاجة، حلقة برنامج، حلقة مسلسل، فيلم مش عارف أشوفه، وهكذا، عن تجربة شخصية مكانش عندي وقت في رمضان اتفرج علي مسلسلات، كنت بحمل حلقة المسلسل اللي حبيت اتابعه ع التليفون واتفرج عليها كل يوم وانا رايحة الشغل ف الباص، لحد ما المسلسل خلص، وهكذا كل سنة.
لأن أغلب الوقت انا باحمل الحاجة وتتركن متفرجش عليها، لكن لو أخدتها ع الموبايل مثلا هتفرج عليها متقسمة علي يومين تلاتة وده أفضل بكتير من اني افضل مأجلة كل حاجة..!