أي حد فينا بيروح الجيم بيبقى جواه “الشحات مبروك” و”ممدوح فرج” بس محتاج حاجة تطلعه .. حاجة تديك “باور” وتخليك عايز تاكل الحديد وتقفل الأوزان!
لو سألتني إيه هي الحاجة دي، هقولك هي ومفيش غيرها، “الموسيقى”، أي حد بيروح “الجيم”وماشي في سكة الـ”Bodybuilding” عارف أهمية “الأغاني” في التمرين، وأن هي طريقة الـ”Motivation” الأقوى والأهم.
بس طبعاً مش أي نوع من الموسيقى والأغاني، يعني أكيد أغاني سيلين ديون ولارا فابيان مثلاً مش هتعمل منك “روني كولمان”، دي تسمعها يا حبيبي وأنت بتتمشى بالعربية مع خطيبتك على الكورنيش.
جمعت لكم أجمد 10 أغاني تسمعها في الجيم، وأغلبهم من الأغاني المفضلة ليا أنا شخصياً، حط سماعتك وشغل الأغاني وطلع “الوحش” اللي جواك.
1- Rob Bailey&The Hustle Standard – Hungry
الأغنية دي اسم على مسمى، هتخليك “جعان” تمرين وعايز تشيل أوزان أكتر!
2- Nathaniel Dawkins – Bring It On
الأغنية اللي كانت ضمن الـ”Soundtrack” الخاص بسلسلة أفلام “Undisputed” .. الأغنية وأجزاء الفيلم التلاتة من الحاجات اللي هتديك “Motivation” للتمرين.
3- The XX ft. Kanye West – Touch The Sky
الأغنية دي عبارة عن Mash Up أو “مزيج” عمله منتج موسيقي اسمه كارلوس سيرانو بين أغنية “Touch The Sky” بتاعت Kanye West وموسيقى “Intro” بتاعت فريق The XX ..
4- Eminem – Till I Collapse
مينفعش نعمل القايمة دي، من غير ما تكون أغنية “Till I Collapse” موجودة، الأغنية دي تعتبر من كلاسيكيات الـ”Motivation”.
5- Drake – Trophies
أغنية مش متواجدة كتير في قوائم أفضل أغاني “الجيم”، لكن بالنسبة لي من أشد الأغاني اللي ممكن تحمسك في التمرين، أغاني “درايك” بالنسبة لي من أكتر الحاجات اللي بتديني “باور” في التمرين وده مش رأيي لوحدي، ده كان رأي نجمة البوب “إيلي جولدينج” كمان!
6- Rob Bailey&The Hustle Standard – Beast
التواجد الثاني للثنائي ده في القائمة، وده طبيعي لأن أغانيهم كلها أصلاً معمولة مخصوص للجيم وكلها جامدة وأنصحكم تسمعوها. أغنية Beast مفيش جيم مش بيشغلها تقريباً، وتم استخدام ريمكس للأغنية في فيلم “Southpaw” للنجم جيك جلينهال. وأنصح برضه بمشاهدة الفيلم.
Juicy J, Wiz Khalifa, Ty Dolla $ign – Shell Shocked ft. Kill The Noise &Madsonik 7-
أغنية جديدة نوعاً ما بس لا غنى عنها في الجيم، وهي كانت من أغاني الـ”Soundtrack” الخاص بفيلم Teenage Mutant Ninja Turtles عنها في الجيم، وهي كانت من أغاني الـ”Soundtrack” الخاص بفيلم Teenage
8- 2Chainz&Wiz Khalifa – We Own It
أغنية فيلم Fast&Furious 6 .. ومن أشد الأغاني اللي ممكن تسمعها وأنت بتشيل الأوزان!
9- Meek Mill, Jhene Aiko & Ludwig Goransson- Lord Knows/Fighting Stronger
من أغاني فيلم “Creed”، آخر فيلم للنجم سيلفستر ستالون واللي يعتبر تكلمة لسلسلة “روكي” الشهيرة، الأغنية والفيلم من أكتر الحاجات اللي ممكن تديك “Motivation” في الحياة مش في الجيم بس!
10- Fort Minor –Remember The Name
واحدة من أشهر أغاني ال”Motivation”، اتهرست في إعلانات وأفلام وفيديوهات كتير، بس مينفعش متكونش موجودة في القائمة دي.
دول كانوا أفضل 10 أغاني ممكن تسمعهم/تسمعيهم في الجيم .. قولوا لنا هل سمعتم حاجة منهم قبل كدة ولو عندكم أغاني تانية أشد متبخلوش علينا في التعليقات.
