فيه أفلام بتضحكنا، وأفلام بتسلينا، وأفلام بتبكينا، وأفلام تانية بتعمل معانا الصح ف أفكارنا…
أفلام كتير انا شفتها، ومن أول مرة مفهمتش أي حاجة، ف استنيت لما الفيلم خلص وبعد كدة قلت “ها، فين الشرح؟” مفيش..! وبفضل طول الفيلم واخدة مود “الترجمة هتنزل امتي؟” وحاجة عظيمة أوي والله..!
النهاردة جبتلكم عشر أفلام، مش مترتبين، بس هما سحلوني ف الأفكار من أول مرة شفتهم فيها، ودخلوني ع الانترنت عشان أقرا الفانز كاتبين ايه، وحاجة منتهي اللخبطة..!
  1. Fight Club

couverture-facebook-tag-fight-club

قاعدة رقم واحد عن فيلم “Fight Club”: محدش فهم الفيلم ده من أول مرة، ولو بيقولك كدة ف هو بيعيش عليك أو قرا عن الفيلم قبل ما يشوفه، ف بقي بالنسبة ليه عادي….
تيمة ان البطل عنده سكيزوفرينيا وقت ما الفيلم نزل مكانتش متداولة ولا أي حاجة، كان مثلا ممكن يطلع شبح، يطلع بيهزر، بس الفيلم ده بصراحة بعتنا جامد أوي، بعتنا لدرجة انه احتل مرتبة متقدمة ف أعظم 250 فيلم علي IMDB.
  1. Shutter Island

shutter-island-b1

فيلم shutter island  من أجمل أفلام ليوناردو ديكابريو ومارتن سكورسيزي عامة، بس الفيلم ده فضل لحد دلوقت شئ غامض بالنسبة ليا، هل ليو مجنون فعلا؟ ولا ليو مش مجنون؟؟ كم التعبيرات والانفعالات الي طلعت منه في الفيلم كانت كفيلة انها تجيله الأوسكار في شوال، بس متفهمش ليه سنتها محدش عزم عليه بأوسكار ليه..!
ده بردو كان م الأفلام الي خلتني أسيرش وراها كتير عشان أفهم الPlot  بتاعتها، بس ف النهاية استمتعت بالأداء التمثيلي اكتر من اي حاجة تانية .
  1. Interstellar

interstellar_multi-multi4-3

حصة الفيزيا الي بهدلتنا وراها من سنتين.! كل الناس دخلت الفيلم حارجة تقول مش فاهمين، هو الفيلم سهل جدا يا جماعة، بيتكلم عن البعد الرابع الي هو “الزمكان”، وده حاجة كدة م…ما علينا انا اتلخبطت لما جيت أفكر، الفيلم نفسه بتفضل فيه مش فاهم فيه أي حاجة طول ماهو شغال، بعد كدة بتفهم ف الاخر ان ماثيو ماكونهي هو الي كان بيزق الكتب وبيكتب بالتراب وبيزاولنا طول الفيلم، يا أخي حرام عليك 😀
inception-fiction-movie-best-8496
ليوناردو دي كابريو تاني، عااااااااااشق للأفلام العجيبة واكلة دماغي..! بيدخل علينا كريستوفر نولان في تحفة جديدة، لأني بصراحة بعتبر انسبشن أكتر فيلم مفهوم نولان عمله، مثلا انا احتجت أشوف The Prestige  بتاع ست مرات عشان أفهمه، كذلك Memento  لكن انسبشن بينول نصيب الأسد في الشهرة والجدل الي كان حواليه وقت عرضه، Inception  بيتكلم عن قرصنة أحلام، يابانيين، شركات، لا وعي، حاجة عظيمة، يبقي الجدل العظيم في نهايته، لما الناس كلها كانت بتتخانق هل “دوم كوب” رجع للحقيقة ولا لسه بيحلم زي ماهو
  1. The Matrix Trilogy

matrix1

بما اني كان عندي وقت فراغ عظيم مؤخرا خصوصا في أسبوع العيد، قررت اني أسحل نفسي مع سلسلة “المصفوفة” ماتريكس، بصراحة لما شفت الأفلام تاني السؤال الي عمره 16 سنة عرفت أجاوب عليه لما سألت نفسي وانا عيلة صغيرة: ايه الفيلم ده؟
وبفضل الله فهمت الفيلم بعد ما قريت خمس كتب، وشفت تلات أفلام طويلة، وست أفلام انيميشن متحركة بتتكلم ف نفس الموضوع، وقضيت تلات تيام في نقاش علي reddit علي مايتيركس، لدرجة اني مبقتش فاهمة أي حاجة خالص، وتقريبا فقدت تمييزي ما بين الواقع والماتريكس والخيال وزايون وليلة كبيرة أوي سعادتك..!

6. Birdman 

3c1e3e35d8bdd7bdabba7171b2032c04

من أغرب الأفلام اللي انا شفتها مؤخرا، الأبطال شكلهم عجيب، ، كفاية أصلا أول مشهد فصلني من “مايكل كيتون” بطل مراهقتي، انا ولحد دلوقتي مبعتبرتش ان فيه باتمان غير مايكل كيتون، ومهما جابو باتمانات، هو مايكل كيتون برضه 😀
الأحداث عامة غامضة متعرفش تفرق بين الي ف دماغ البطل وبين الحقيقة، حتي النهاية متشابكة وغامضة، ومتعرفش هو انتحر ولا طار ولا عمل ايه..!
  1. Cloud Atlas

cloud_atlas_poster_7

انا مش فاهمة بصراحة ايه الي يجبر الراجل الكبارة توم هانكس يشترك ف فيلم زي ده 😀  هو عبارة عن سبع حواديت، مفيش واحدة ليها علاقة بالتانية، ومفيش واحدة ف زمن التانية، هو الفيلم فيه كولكشن ممثلين عظيم، والبعته اللي الواحد بيتبعتها ف كل حدوتة ان كل ممثل كان ليه دور ف القصة، حتي ولو صامت، ف توم هانكس طلع مرة ست ف قصة، ومرة طلع أسمر، وهالي بيري مرة طلعت راجل، ومرة طلعت شقرا ومرة طلعت صينية، وهكذا، هتفهم قصدي لما تشوف تتر النهاية في الفيلم، وهتتصدم
  1. Being John Malkovich

free-download-bluray-1080p-720p-movie-google-drive-being-john-malkovich-usa-1999-spike-jonze-cameron-diaz-eric-weinstein-john-cusack-ned-bellamy

أحد أغرب الأفلام الي انا شفتها ف حياتي، بيحكي عن باب سحري بيدخل الناس جوة دماغ الممثل “جون مالكوفيتش” والي طالع بشخصيته الحقيقية، ناس عمالة بتنط ف دماغ ناس، وشكل عجيب لكاميرون دياز وجون كيوزاك، بصراحة انا لما شفته مفهمتش أي حاجة، بس كسلت أدور علي الانترنت
  1. Oldboy

601905

طبعا لو قررت تضحي بسلامتك النفسية وأعصابك، وتشوف الفيلم ده، ياريت تشوف النسخة الكوري منه، لأن النسخة الأمريكي مش حلوة ، النسخة الكوري اللي هتسهرك ليالي طويلة من بشاعة وقسوة الفيلم، ف النهاية أكيد هتفهم كل حاجة، بس فجأة هتلاقي نفسك رجعت أحمق تاني، الي هو منين بيودي علي فين؟ طب الراجل قتل نفسه ليه؟ طب هو عمل فيه كدة يه؟ وأسئلة وجودية كتير أوي، وف الاخر تقوم تشنق نفسك ف رجل السفرة..

 

10.predestination

predesa

بريديستينيشن باختصار هو أعقد فيلم أجنبي انا شفته لحد دلوقتي، مفهمتش منه حاجة، والنهاية بتاعته عدتها تلات مرات، وجبت شروح ف الفيلم وفيديوهات، وحاولت أفهم أي حاجة بس فشلت، لذك الي بيقول انه فاهمه، باكرر انه فاهم فيلم بريديستينيشن ياريت نضربه بالقلم علي وشه، الأبطال الي مثلوه محدش منهم فهم حاجة، كفاية كذب بقي 😀
بس دول كانو أكتر عشر أفلام مش مفهومين بالنسبة ليا، طبعا لسه فيه كتير، والقايمة طويلة، لو عندك أفلام تاني مش فاهمها شاركنا بيها، وخلينا نحاول نفهمها سوا .

 


المقال يعبر عن رأي الكاتب وليس بالضرورة رأي المجلة .
  • Muhammad Hegazy

    kol dah ganb donnie darko aflam sahla 😂

  • Adel

    11- The Fountain. Hugh Jackman

  • Nour ELdeen Egela

    عندك ٢٥ سنة و مش عارفة تفهمى cloud atlas ولا fight club ولا predestination ولا oldboy؟؟
    يخربيت التعليم المجانى #نو اوفنس

  • Mohamed Atwa

    Enemy 2013
    اتفرج عليه هتفضل مكتئب كام يوم انك مفهمت حاجه و هتيجي تضيفه للقايمة اللطيفة دى او تكتب مقال جديد عنه لوحده 😂😂😂😂

  • Fathy Abd El Satar

    Fight club سهل جدا الا ان فيه غلطة واحدة ازاي البطل كان بيصارع نفسة في الشارع وده شد ناس تانية تنضم اذا كان هو شخص واحد!!!
    Matrix فلم اسهل من السهولة ممكن تعتبرة ما بعد ترمنيتور مثلا البشر علشان يقضوا على الالات حجبو الشمس فالالات استخدمت البشر كبطاريات للشحن! اظن دي سهله اللي فايقين بيحاربوا الماتركس لحرية البشر من جديد وفي النهاية الالات تتحد مع البشر للخلاص من الفيرس اللي بتكولها من الداخل!
    Predestination محتاج انك تفهم افكار السفر عبر الزمن لكن المعضلة هي الفرخة ولا البيضة لمابتكتشف ان البنت هيا الام وكمان هيا الاب لنفسها بس في ازمنة مختلفة وتكتشف كمان ان المفجر هو نفسه العميل اللي بيحاول يوقف التفجيرات!
    Cloud atlas فلم فعلا خرافي واظن مقصود تكرار الشخصيات في ادوار مختلفة علشان توصل فكرة ان الظروف المختلفة ممكن تغير طبيعة النفس لو اعتبرنا ان الموضوع بيحكي عن تناسخ الارواح اللي انا عن نفسي لا اؤمن بها بالطبع
    Shtter island, bird man, inception مش مفهومين بمعنى الكلمة
    باقي الافلام لسة مشفتها بس ان متشوق ليها فعليا!

  • عبد الرازق سمير

    لأ
    ده انتي تجيبي ورقة وقلم وتقعدي تكتبي ورايا بقا

    1) Donnie Darko
    2) 12 Monkeys
    3) 2001: A SPACE ODYSSEY
    4) Inherent Vice.
    5) the prestige
    6) total Recall 2012
    7) Eternal Sunshine Of The Spotless Mind
    8) Primer
    9) Momento
    10) Mulholland Drive
    11) Mr. Nobody
    12) American Psycho
    13) Vanilla Sky (2001)
    14) Number 23

  • Mohammed Galal

    البتاع ده “مش هقول مقال” اوحش وأغبي حاجه قريتها في حياتي

  • Mohamed Farid

    اللي قالك انك بتكتبي كويس ظلمك وظلمنا معاكي